1 Samuel 10:1-27
10 Chai qꞌuipaca Samuelca botellapi charishca aceiteta japishpami Saulpaj umapi tallirca. Paica Saulta muchashpami cashna nirca: “Jehová Diosmi paipaj pueblota* can mandachun canta agllashca.
2 Cunan ñucata saquishpaca canca Raquelta pambashca jutcu cꞌuchutami pasangui. Zelzapi saquirij Benjaminpaj allpapimi ishqui runacunahuan tupangui. Paicunaca: ‘Can mashcacushca burrocunataca ñami japishcacuna. Cunanca cambaj yayaca burrocunamantaca ña mana sustarishcachu can. Ashtahuanpish paica cancunamanta sustarishpami: “Ñuca churica mana tigramushcaca, ¿imatataj rurashayari?” nishpa puricun’ ningacunami.
3 Canca chai lugarmantaca Taborpi tiyaj jatun yuracama ringui. Chaipimi quimsa runacunahuan tupangui. Paicunaca Betel llajtapi Diosta adoranamanmi huichiyacungacuna. Paicunamanta shujca quimsa malta chivota, shujca quimsa tandata, shujca jatun jarra vinotapishmi apangacuna.
4 Chai runacunaca cantaca ¿allillachu cangui? nishpa tapushpami ishqui tandata cungacuna. Paicuna cujpica canca japinguilla.
5 Chai qꞌuipaca Diospaj loma nishcamanmi chayangui. Chaipica filisteocunapaj grupo soldadocunami tiyan. Chai llajtaman chayashpaca adorana lugarmanta* profetacuna uriyamucujtami ricungui. Paicunaca profetacuna parlashca shinami parlashpa ricungacuna. Shinallataj paicunapaj ñaupajpica cuerdata charij shuj instrumentohuan, panderetahuan, flautahuan, arpahuanmi gentecunaca tocashpa ricungacuna.
6 Canmanpish Jehová Diospaj espiritumi poderta cunga. Chaimi canpish profetacuna parlashca shina paicunahuan parlashpa ringui. Chaipimi canca shujtaj runa shina tucungui.
7 Tucui cai cosascuna pasajta ricushpami Dios canta ayudacushcata cuentata cungui. Chaimanta can tucui imalla rurai tucushcata rurailla.
8 Chai qꞌuipaca canraj Guilgal llajtaman uriyai. Chai llajtapimi rupachishca sacrificiocunata cungapaj, Dioshuan alli tucungapaj sacrificiocunatapish cungapaj canhuan tupanacusha. Chaipi canchis punllacunata ñuca chayangacama shuyangui. Chaipimi can imata rurana cashcataca huillasha” nircami.
9 Samuelta saquingapaj Saúl vueltata cujpimi Diosca Saulpaj shunguta cambiai callarirca. Chaimi paica shujtaj runa shina tucurca. Chai punllami Samuel tucui nishcacunaca pajtarirca.
10 Chaimantaca Saulpish, paita sirvijpish lomaman rishpaca profetacunahuanmi tuparca. Chai ratomi Diosca paipaj espirituhuan Saulmanca poderta curca. Chaimi Saulca paicunahuan tandanacushpaca profetacuna parlashca shina parlai callarirca.
11 Saúl profetacunahuan ricujpi, profetacuna shina parlacujta ricushpami ñaupaman paita rijsijcunaca caishujmanta chaishujmanta: “¿Quis runapaj churihuanca imataj tucushcayari? ¿Saulpish profetachu canyari?” nircacuna.
12 Chashna tapujpimi paicunapuramanta shuj runaca: “¿Tucui paicunapaj yayaca pitaj can?” nirca. Chaimantami “¿Saulpish profetachu canyari?” nishcaca tiyan.
13 Saulca profetacuna shina rimanata saquishpaca adorana lugarmanmi rirca.
14 Qꞌuipaca Saulpaj yayapaj huauquica Saultapish, paita sirvijtapish: “¿Maimantaj rircanguichij?” nishpami tapurca. Chashna tapujpimi Saulca: “Burrocunata mashcanamanmi rircanchij. Pero mana japircanchijchu. Chaimantami Samuelta ricunaman rircanchij” nishpa cutichirca.
15 Chashna nijpimi Saulpaj tioca: “¿Cancunamanca Samuelca imatataj nirca? Parlaichijlla” nishpa tapurca.
16 Chaimi Saulca paipaj tiomanca: “Burrocunataca ñami japishcacuna nishpa huillarca” nirca. Pero, canca reymi tucungui Samuel nishcataca Saulca paipaj tiomanca imata mana huillarcachu.
17 Samuelca Mizpá llajtapimi israelitacunataca Jehová Diospaj ñaupajpi tandachirca.
18 Chashna tandachishpaca israelitacunamanca cashnami nirca: “Israelitacunapaj Jehová Diosca caitami nin: ‘Ñucami israelitacunataca Egipto llajtamanta llujshichircani. Egipto llajtapaj maquimantapish ñucami quishpichircani. Cancunata llaquichij tucui llajtacunata mandaj reycunamantapishmi quishpichircani.
19 Pero cancunapaj tucui llaquicunamanta, tucui problemacunamanta cancunata Quishpichij, cancunapaj Diosta mana chasquishpami: “¡Ima cajpipish! Ñucanchijta mandachun shuj reyta nombrai” nircanguichij. Cunanca cada familiapura, huaranga huaranga gentecunapura Jehová Diospaj ñaupajpi cancunapaj puestocunapi shayarichij’ ninmi” nircami.
20 Chaimi Samuelca Israelpaj tucui familiacunataca huashan huashan cꞌuchuyachirca. Chashna cꞌuchuyachijpica Benjaminpaj familiami agllashca carca.
21 Benjaminpaj familiata agllashpaca paicunapuramanta cada familiatami cꞌuchuyachirca. Chaimantami matritacunapaj familia agllashca carca. Ultimopica Quis runapaj churi Saulmi agllashca carca. Pero paita mashcashpaca mana maipi japircacunachu.
22 Chaimi huaquincunaca Jehová Diostaca: “¿Chai runaca caipichu can?” nishpa tapurcacuna. Chashna tapujpimi Jehová Diosca: “Chai runaca cancuna apamushca cosascunapaj chaupipimi miticushca can” nishpa cutichirca.
23 Chaimi callpashpa paita mashcanaman rircacuna. Paita japishpaca chai cosascuna chaupimantami llujshichircacuna. Saúl israelitacunapaj chaupipi paipaj puestopi shayarijpica tucuicunamanta yalli altomi carca. Saulca tucuimanta yalli jatun cashcamantami umahuan shujtajcunata pasaj carca.
24 Samuelca tucui israelitacunamanca: “¿Jehová Dios agllashca runata ricunguichijchu? Pai layaca israelitacunapurapica shujllapish mana tiyanchu” nircami. Chashna nijpimi tucuicuna: “¡Viva rey Saúl!” nishpa caparircacuna.
25 Chaimi Samuelca reycuna imata mañana derechota charishcata israelitacunaman intindichirca. Chaitaca shuj libropi quillcashpami chai librotaca Jehová Diospaj ñaupajpi churarca. Qꞌuipaca tucui israelitacunatami paicunapaj huasiman tigrachun nirca.
26 Saulca Guibeapi caj paipaj huasimanmi rirca. Paita compañachunca Jehová Diosmi macanacujcunapaj shungupi rina munaita churarca.
27 Shinapish huaquin millai runacunaca: “¿Cai runaca maitataj ñucanchijtaca quishpichingayari?” nircacunami. Chai millai runacunaca Saulta pꞌiñashpami paimanca ima regalotapish mana aparcacuna. Pero Saulca imata mana nishpami upalla saquirirca.