1 Samuel 11:1-15
11 Ammonitacunapuramanta Nahás runaca paipaj soldadocunahuanmi Galaad llajtapi carpa huasicunata shayachishpa, Jabespaj contra macanacungapaj huichiyarcacuna. Jabés llajtamanta tucui runacunaca Nahastaca: “Ñucanchijhuan shuj ari ninacuita* rurai, chaita rurajpica cantami sirvishun” nircacunami.
2 Ammonitacunapuramanta Nahás runaca: “Tucui cancunapaj alli lado ñahuita surcuchijpica cancunahuanmi shuj ari ninacuita rurasha. Chashnami tucui israelitacunataca pingaipi saquisha” nishpami cutichirca.
3 Jabés llajtamanta pushajcunaca:* “Tucui Israel llajtaman huillajcunata cachangapaj canchis punllacunata cuhuai. Ñucanchijta quishpichinaman ni pi mana shamujpica ñucanchijllatajmi canman entregarishun” nircacunami.
4 Saúl causacushca Guibeá llajtaman* huillajcuna chayashpaca tucui gentecunamanmi ima tucushcata huillarcacuna. Chaimi tucuicuna yallitaj huacai callarircacuna.
5 Saulca campomantami huagracunata pushashpa shamucurca. Paica: “¿Cai gentecunahuanca imataj tucunyari? ¿Imamantataj tucuicuna huacacuncunayari?” nishpami tapurca. Chashna tapujpimi paicunaca Jabés llajtamanta runacuna ima nishcata parlarcacuna.
6 Chai parlashcata Saúl uyajpica Diosca paipaj espíritu santohuanmi paiman poderta curca. Chaimi Saulca yallitaj pꞌiñarirca.
7 Saulca ishqui torocunata japishpami mirga mirgapi pꞌitirca. Chai pꞌitishca pedazocunataca tucui Israel llajtamanmi huillajcunahuan cacharca. Chai huillajcunaca: “¡Saultapish, Samueltapish mana catisha nij gentecunapaj huagracunahuanca chashnallatajmi tucunga!” nircacunami. Chashna nijpimi gentecunaca Jehová Diosta yallitaj manchai callarircacuna. Chaimi paicunaca shuj yuyailla tucushpa macanacunaman llujshircacuna.
8 Saulca Judapaj familiamanta 30.000 runacunata, Israelpaj shujtaj familiacunamanta 300.000 runacunatami Bézec lugarpi yuparca.
9 Shinallataj huillanaman shamuj runacunamanca: “Galaadpi saquirij Jabés llajtamanta runacunamanca: ‘Caya chaupi punllatami cancunaca quishpichishca canguichij’ nigrichij” nircacunami. Chaimi huillajcunaca chaimanta rishpa Jabés llajtamanta runacunamanca chaita huillarcacuna. Chashna huillajpimi paicunaca yallitaj cushicurcacuna.
10 Jabés llajtamanta runacunaca ammonitacunamanca: “Cayami cancunaman entregarishun. Ñucanchijhuanca cancuna ima munashcata ruranguichijlla” nircacunami.
11 Cayandij punllaca Saulca paihuan caj runacunataca quimsa grupopimi chaupirca. Chashnami ña pacaricujpi* ammonitacunapaj carpa huasicuna chaupiman yaicurcacuna. Chaipimi paicunaca chaupi punllacama ammonitacunata huañuchishpa catircacuna. Mana huañushca ammonitacunaca cada unomi miticushpa urata janajta rircacuna.
12 Gentecunaca Samuelmanca: “¿Saúl ñucanchij rey cachun mana munanchijchu nij gentecunaca picunataj can? Paicunata huañuchingapaj entregaichij” nircacunami.
13 Pero Saulca: “Cunanca Jehová Diosmi israelitacunataca quishpichishca. Chaimantami cunanca shuj runallapish mana huañunga” nircami.
14 Qꞌuipaca Samuelca gentecunamanmi: “Guilgalman jacuchij, chaipi Saúl mandaj cashcata cutinllataj huillangapaj” nirca.
15 Chaimi tucui israelitacunaca Guilgal llajtaman rircacuna. Chaipimi Jehová Diospaj ñaupajpi Saultaca reyta rurarcacuna. Chai huashaca Dioshuan alli tucungapajmi sacrificiocunata Jehová Diosman curcacuna. Saulpish, tucui israelitacunapish chai punllapica yallitajmi cushicurcacuna.
Notacuna
^ O “pactota”.
^ Hebreo rimaipica: “ancianocunaca” ninmi.
^ Hebreo rimaipica: “Saulpaj Guibeaman” ninmi.
^ Caipica casi las 2 de la mañanamanta las 6 de la mañanacama cashcatami parlacun.
