1 Samuel 12:1-25
12 Chaimantami Samuelca tucui israelitacunamanca cashna nirca: “Tucui cancuna mañashcatami rurashcani. Shinallataj cancunata mandachunpish shuj reytami agllashcani.
2 ¡Caipimi cancunata pushaj* reyta charinguichij! Ñucaca ñami mayorlla, puzu uma cani. Caipimi ñuca churicunapish cancunapurapi can. Ñucaca jovenmantapachami cunan punllacunacama cancunata pushacushcani.
3 Caipimi cani. ¿Maijanpaj torota, maijanpaj burrota ima horaca quichushcanichu? ¿Pita llaquichishpa, umashpa shuhuashcanichu? ¿Imata mana ricushca laya tucungapaj ñucaca camarita japishcanichu? Chaita rurashca cajpica Jehová Diospaj ñaupajpi, pai agllashca reypaj ñaupajpi imata nichijlla. Chaitaca ñucaca cancunaman pagashallami” nircami.
4 Paicunaca: “Pita llaquichishpa, umashpaca mana shuhuashcanguichu. Imatapish pimanta mana japishcanguichu” nishpami cutichircacuna.
5 Paicuna chashna nijpimi Samuelca: “Jehová Diospish, pai agllashca reypish ñucata imamanta juchachinata mana charishcataca* testigomi can” nirca. Chashna nijpimi paicunaca: “Paimi testigo can” nishpa cutichircacuna.
6 Chaimi Samuelca israelitacunataca: “Caimantaca Jehová Diosmi testigo can. Paimi cancunapaj ñaupa yayacunataca Moiseshuan, Aaronhuan Egipto llajtamanta llujshichirca.
7 Cunanca cancunapaj puestocunapi shayarichij. Cancunapaj, cancunapaj ñaupa yayacunapaj tucui alli cosascunatapish* Jehová Dios rurashcata yuyaipi charishpami Jehová Diospaj ñaupajpi cancunata juzgagrini.
8 Egipto llajtamanmi Jacobca yaicurca. Tiempohuanca cancunapaj ñaupa yayacunaca llaquicunatami charircacuna. Chaimi Jehová Diosta ayudachun mañarcacuna. Chaimantami Jehová Diosca Moisesta, Aaronta Egipto llajtamanta cancunapaj ñaupa yayacunata llujshichichun cacharca. Chashnami paicunaca cancunapaj ñaupa yayacunataca caipi causachun pushamurcacuna.
9 Pero cancunapaj ñaupa yayacunaca paicunapaj Jehová Diostami cungarircacuna. Chaimi Diosca Hazor llajtapi soldadocunata mandaj Sisarapaj maquipi, filisteocunapaj maquipi, Moab llajtamanta reypaj maquipi paicunataca saquirca.* Paicunami cancunapaj ñaupa yayacunapaj contraca macanacujcuna carca.
10 Chashna macanacunaman shamujpimi israelitacunaca Jehová Diosta ayudachun mañarcacuna. Paicunaca: ‘Jehová Dioslla, canta saquishpami Baal shuti, Astoret shuti rurashcalla dioscunata sirvishpa juchata rurashcanchij. Pero cunanca canta sirvingapaj ñucanchij contracunapaj maquimanta quishpichihuai’ nircacunami.
11 Jehová Diosca Jerubaalta, Bedanta, Jefteta, Samueltami cancunapaj muyundijpi caj contracunapaj maquimanta quishpichichun cacharca. Chaimi cancunaca imata mana manchashpa causanguichij.
12 Ashtahuanpish ammonitacunata mandaj rey Nahás llaquichinaman shamujpica cutin cutinmi cancunaca ‘¡Shuj reytami charishun ninchij!’ nircanguichij. Pero cancunapaj Reyca Jehová Diosmi can.
13 Cancuna agllashca, mañashca reyca caipimi. ¡Ricuichij! Jehová Diosmi cancunapaj shuj reyta agllashca.
14 Cancuna Jehová Diosta manchajpi, paita sirvijpi, pai nishcata uyajpi, Jehová Diospaj mandashcacunata cazujpi, cancunapish, cancunata mandaj reypish Jehová Diosta sirvijpica tucui imapish allimi llujshinga.
15 Pero Jehová Dios nishcata mana uyajpi, Jehová Dios mandashcacunata mana cazujpica cancunata, cancunapaj yayacunatami Jehová Diospaj maquica castiganga.
16 Cunanca cancunapaj puestocunapi shayarichij, Jehová Dios cancunapaj ñaupajpi mancharina ruraita ruragrijta ricuichij.
17 ¿Manachu cunanca trigota cosechana tiempo can? Jehová Diostami cꞌulun nichishpa tamyachichun mañagrini. Chashna ricushpami cancunaca shuj reyta mañashpa, Jehová Diospaj ñaupajpi mana allita rurashcata yachaj chayanguichij” nircami.
18 Chai qꞌuipaca Samuelca Jehová Diostami rogarishpa mañarca. Chaimi Jehová Diosca chai punllapi cꞌulun nichishpa tamyachirca. Chashna tamyachijpimi tucui israelitacunaca Jehová Diostapish, Samueltapish yallitaj mancharcacuna.
19 Tucui israelitacunami Samuelmanca: “Ñucanchijmanta cambaj Jehová Diosta mañahuai. Ñucanchijca mana huañusha ninchijchu. Shuj reyta mañashpami ñucanchij juchacunataca ashtahuan mirachishcanchij” nircacuna.
20 Chaimi Samuelca tucui israelitacunamanca cashna nirca: “Ama manchaichijchu. Cierto cancunaca tucui cai mana alli cosascunatami rurashcanguichij. Pero cunanca Jehová Diostaca amataj saquinguichij. Cancunapaj tucui shunguhuan Jehová Diosta sirvichij.
21 Yanga dioscunata catishpa Diosmanta ama caruyanguichij. Cai yanga dioscunaca cancunata mana ayudai tucunchu, mana quishpichi tucunchu. Paicunaca imapajpish mana valij rurashcalla dioscunami can.
22 Paipaj jatun shutimantami Jehová Diosca cancunataca mana saquinga. Jehová Diosca cancuna paipaj pueblo cachunmi agllashca.
23 Ñuca partemantaca cancunamanta Diosta mañanataca mana saqui tucunichu. Diosta mañanata saquishpaca Jehová Diospaj ñaupajpimi juchata rurasha. Shinapish cancunapaj causaipi allita rurachun, cashcata rurachunmi yachachishpa catisha.
24 Pero cancunaca Jehová Diosta manchaichij. Paitaca cashcata rurashpa, tucui shunguhuan sirvichij. Dios cancunamanta yallitaj sumaj alli cosascunata rurashcatapish yuyarichij.
25 Cutin mana allita ruranata manataj saquijpica cancunapish, cancunapaj reypish tucuchishcami canguichij” nircami.
Notacuna
^ Hebreo rimaipica: “cancunapaj ñaupajta purij” ninmi.
^ Hebreo rimaipica: “ñuca maquipi imata mana japishcataca” ninmi.
^ O “tucui cashcata rurashcacunatapish”.
^ Hebreo rimaipica: “cꞌaturca” ninmi.
