1 Samuel 13:1-23
13 Saulca [?]* huatacunata charishpami rey tucurca. Paica ishqui huatacunatami israelitacunata mandarca.
2 Saulca 3.000 israelitacunatami paipaj soldadocuna cachun agllarca. Paicunapuramantaca Micmash lugarpi, Betelpi saquirij urcucunapimi 2.000 cꞌaricuna Saulhuan carcacuna. Cutin 1.000 runacunaca benjaminitacunapaj allpapi tiyaj Guibeá llajtapimi Jonatanhuan carcacuna. Caishuj runacunataca paicunapaj huasicunamanmi* tigrachun mandarca.
3 Chai qꞌuipaca Jonatanca Gueba llajtapimi filisteocunapaj grupo soldadocunata macanacushpa misharca. Chaitami filisteocunaca uyarcacuna. Saulca tucui Israelpimi gachucunapi tocachun, ima tucushcatapish hebreocunaman huillachun mandarca.
4 Shinallataj tucui israelitacunaca: “Saulca filisteocunapaj grupo soldadocunatami macanacushpa mishashca. Chaimantami cunanca filisteocunaca israelitacunataca pꞌiñan”* nishcatami uyarcacuna. Chaimi huillajcunaca runacunata Guilgal llajtapi Saulhuan tandanacuchun cayarcacuna.
5 Filisteocunaca israelitacunahuan macanacungapajmi tandanacurcacuna. Paicunaca 30.000 macanacuna carretacunata, 6.000 caballopi purijcunata, mama cucha uripi tiyaj arena shina achca soldadocunatami charirca. Filisteocunaca Micmash lugarmanmi huichiyarcacuna. Cai lugarca Bet-Aven llajta inti llujshin ladomanmi carca. Chaipimi carpa huasicunapi saquirircacuna.
6 Israelmanta runacunaca paicunapaj contracuna paicunahuan macanacunaman shamujta yachashpami yallitaj manchashpa jutcucunapi, cꞌacacunapi, jatun pata rumicunapi, allpa ucupi rurashca cuartocunapi, yacuta tandana jutcucunapi miticurcacuna.
7 Huaquin hebreo runacunaca Jordán jatun yacuta chꞌimbashpami Gad allpaman, Galaad allpamanpish chayarcacuna. Pero Saulca Guilgal llajtapirajmi carca. Paihuan chaipi saquirij tucui runacunapish manchaimantami chujchucurcacuna.
8 Samuel nishca shinami Saulca canchis punllacunata chaipi shuyarca. Pero Samuelca Guilgal llajtaman mana shamurcachu. Chaimantami Saulhuan caj runacunaca paita saquishpa ri callarircacuna.
9 Chaimi Saulca: “Rupachishca sacrificiota cungapaj, Dioshuan alli tucungapaj sacrificiocunatapish cungapaj animalcunata apamuichij” nirca. Chashnami paica rupachishca sacrificiota cui callarirca.
10 Pero Saúl rupachishca sacrificiota cushpa tucuchincami Samuelca chaiman chayarca. Chaimi Saulca paita tupashpa saludanaman* llujshirca.
11 Samuelca: “¿Canca imatataj rurashcanguiyari?” nircami. Chaimi Saulca: “Gentecuna ñucata saquishpa ri callaricujtami ricurcani. Canpish shamushami nishca punllapica mana shamurcanguichu. Filisteocunapish Micmash lugarpimi tandanacucurcacuna.
12 Ñucaca: ‘Filisteocunaca ñucapaj contrami Guilgalpi macanacunaman shamungacuna. Jehová Diospaj ayudatapish mana mañashcanichu’ nishpami yuyarcani. Chaimi rupachishca sacrificiota cunataj cashcata ricurcani” nircami.
13 Samuelca Saulmanca: “Canca mana yachaj shinami rurashcangui. Cambaj Jehová Dios mandashcatapish mana cazushcanguichu. Jehová Diosta can cazushca cajpica cambaj huahua huahuacunataca Israelpi mandachunmi huiñai huiñaipaj saquinman carca.
14 Pero cunanca cambaj mandanaca mana huiñai huiñaipajchu canga. Jehová Diosca paipaj shunguta cushichij shuj runatami agllanga. Paitami Jehová Diosca paipaj pueblota pushaj cachun churanga. Canca Jehová Dios mandashcataca mana rurashcanguichu” nircami.
15 Chaimantaca Samuelca Guilgal llajtamanta llujshishpami benjaminitacunapaj allpapi tiyaj Guibeá llajtaman huichiyarca. Saúl paihuan saquirij runacunata cuentajpica tucuica casi 600 runacunami carca.
16 Saulpish, paipaj churi Jonatanpish, paihuan saquirij runacunapish benjaminitacunapaj allpapi tiyaj Gueba llajtapimi saquirircacuna. Cutin filisteocunaca Micmash lugarpimi carpa huasicunapi saquirishcacuna carca.
17 Filisteocunapaj carpa huasicunamantaca quimsa grupo soldadocunami llujshircacuna. Shuj grupoca Oframan rina ñantami rircacuna. Chai ñanca Sual allpaman rina ladomanmi carca.
18 Shujtaj grupoca Bet-Horonman rina ñantami rircacuna. Cutin último grupoca lomaman rina ñantami rircacuna. Chai lomamantami Zeboím pugru pambaca ricurij carca. Chashnami paicunaca chaquishca pamba ladoman rircacuna.
19 Chai tiempopica Israel llajtapica fierrohuan trabajaj ni shuj runallapish mana tiyarcachu. Filisteocunaca: “Hebreocuna shuj espadatapish, shuj lanzatapish rurachunca mana saquinachu canchij” nishcacunami carca.
20 Tucui israelitacunaca yapuna rejacunata, picocunata, hachacunata, hocescunata afilachinamanmi filisteocuna maipi cashcaman uriyajcuna carca.
21 Israelitacunaca yapuna rejacunata, picocunata, rastrillocunata,* hachacunata, tujsina garrochacunata afilachishcamantami shuj pim* nishcata pagajcuna carca.
22 Macanacuna horasca Saulhuan, Jonatanhuan caj runacunaca espadatapish, lanzatapish mana charircacunachu. Saúl, paipaj churi Jonatanllahuanmi macanacunacunata cacharircacuna.
23 Filisteocunapaj shuj grupo soldadocunaca Micmash pugru pambata pasaj chaqui ñanmanmi rishcacuna carca.
Notacuna
^ Hebreo quillcashcapica mashna huatata charishcaca mana ricurinchu.
^ Hebreo rimaipica: “carpa huasicunamanmi” ninmi.
^ O “israelitacunaca filisteocunapaj millanayachishca tucushca”.
^ Hebreo rimaipica: “bendicianaman” ninmi.
^ Cai rastrilloca quimsa filocunatami charirca.
^ Caica ñaupa tiempopi pesangapaj shuj medidami carca. Shuj pimca casi 0.67 siclocunatami charirca. Ayuda B14-ta ricui. “Pim” shimita huasha diccionariopi ricui.
