1 Samuel 14:1-52
14 Shuj punllaca Saulpaj churi Jonatanca paipaj macanacunata apashpa ayudaj runamanca: “Jacu, caishuj ladopi caj filisteocunapaj carpa huasicunaman chꞌimbashun” nircami. Pero chaitaca paipaj yayamanca mana huillashcachu carca.
2 Saulca Guibeá llajta canlla ladocunapimi saquiricurca. Migrón lugarpi tiyaj granada yura ucupimi carca. Shinallataj paihuanca 600 runacunami carca.
3 (Chai tiempopica efodtaca sacerdote Ahiyami apaj carca. Ahiyaca Ahitubpaj churimi carca. Ahitubca Icabodpaj huauquimi carca. Icabodca Finehaspaj churimi carca. Finehasca Elipaj churimi carca. Elica Silopimi Jehová Diospaj sacerdote carca). Jonatán chaimanta rishcata soldadocunaca mana yacharcacunachu.
4 Jonatanca filisteocunapaj carpa huasicunamanmi chayasha nirca. Chaiman rina chaqui ñancunapica quirucuna shina ishqui jatun cꞌacacunami tiyarca. Shuj cꞌacaca Bozez shutimi carca. Caishuj cꞌacaca Sené shutimi carca.
5 Janaj ladoman caj jatun cꞌacaca shuj pilar shinami carca. Chai jatun cꞌacaca Micmash chꞌimba ladomanmi carca. Cutin caishuj jatun cꞌacaca ura ladomanmi carca. Chai jatun cꞌacaca Gueba chꞌimba ladomanmi carca.
6 Chaimi Jonatanca paipaj escudota apajmanca: “Circuncisionta mana rurashca runacuna saquiricuj carpa huasicunaman chꞌimbashunchij. Jehová Diosca ñucanchijta ayudangapishchari. Jehová Dios munashpaca ñucanchij achca cajpipish, ashalla cajpipish paicunata mishachunmi ayudanga. Paitaca imapish mana jarcangachu” nirca.
7 Chaimi escudota apajca: “Cambaj shungupi ima alli cashcataca rurailla, can maita risha nishcataca rilla. Can maita rijpipish ñucaca catishallami” nirca.
8 Jonatanca cashnami nirca: “Chai runacuna maipi cashcaman chꞌimbashun. Chashnami paicuna ñucanchijta ricuchun saquishun.
9 Chai runacuna ‘¡Ñucanchij cancunapajman chayangacama casijlla chaipi saquirichij!’ nijpica, chaipimi ñucanchijca saquirishun. Ñucanchijca chaipi saquirishpami paicuna maipi cashcamanca mana huichiyashun.
10 Pero paicuna ‘¡Ñucanchijhuan macanacungapaj huichiyamuichij!’ nijpica ñucanchijca huichiyashunllami. Chashna nijpimi Jehová Dios paicunata ñucanchij maquipi entregana cashcata yachashun” nircami.
11 Chaimi Jonatanpish, paipaj escudota apajpish carpa huasicunapi caj filisteocuna paicunata ricuchun saquircacuna. Shinallataj filisteocunaca: “¡Ricuichij! Hebreocunaca paicuna miticushca jutcucunamantamari llujshicuncuna” nircacunami.
12 Qꞌuipaca carpa huasicunapi caj soldadocunaca Jonatanmanpish, paipaj escudota apajmanpish: “¡Shamuichij, ñucanchijcuna pi cashcatami cancunamanca yachachishun!” nircacunami. Chashna nincami Jonatanca paipaj escudota apajmanca: “Ñucata cati, Jehová Diosca paicunataca israelitacunapaj maquipimi entregagrin” nirca.
13 Chaimi Jonatanca paipaj maquicunahuan, chaquicunahuan llucashpa huichiyarca. Paipaj escudota apajpish paitami catishpa rirca. Jonatanca ñaupashpami filisteocunata huañuchishpa rirca. Huashataca paipaj escudota apajmi Jonatán mana huañuchishcacunataca huañuchishpa catirca.
14 Cai punta macanacuipica Jonatanpish, paipaj escudota apajpish media hectárea campopimi* casi 20 runacunata huañuchircacuna.
15 Carpa huasicunapi caj soldadocunapish, jatun cꞌaca quinripi caj soldadocunapish mancharishcami carcacuna. Shinallataj israelitacunahuan macanacuchun cachashca soldadocunapishmi mancharishca carcacuna. Chaimi allpaca chujchui callarirca. Diosca filisteocunapurapi manchana yuyaitami churarca.
16 Benjaminitacunapaj allpapi tiyaj Guibeá llajtapi caj Saulpaj chapaj runacunaca paicunapaj contracunapaj carpa huasicunapi bulla tiyashcatami uyarcacuna.
17 Saulca paihuan caj runacunamanca: “Caimanta pi rishcata yachangapaj listata pasachipaichij” nircami. Listata pasajpica Jonatanpish, paipaj escudota apajpish mana chaipi cashcatami yachaj chayarcacuna.
18 Chaimi Saulca Ahíya runataca: “¡Diospaj Arcata apamui!” nishpa mandarca. (Chai tiempopica* Diospaj Arcaca israelitacunahuanmi carca).
19 Sacerdotehuan Saúl parlacujpirajmi filisteocunapaj carpa huasicunapica bullaca ashtahuan ashtahuan mirashpa catirca. Chaimi Saulca sacerdotetaca: “Can imata ruracushcataca chaipi saqui”* nirca.
20 Chashna nijpimi Saulpish, paihuan caj runacunapish tandanacushpa macanacunaman rircacuna. Chaipica filisteocunapura musparinacushpami caishujmanta chaishujmanta paicunapaj espadacunahuan macanacucujta ricurcacuna.
21 Shinallataj ñaupaca hebreocunaca filisteocunapaj ladomi tucushcacuna carca. Cai hebreocunami filisteocunahuan carpa huasicunaman huichiyashcacuna carca. Paicunami Saulhuan, Jonatanhuan caj israelitacunahuan tandanacurcacuna.
22 Efraín urcucunapi miticunaman rij israelitacunaca filisteocuna miticushpa ricujtami uyarcacuna. Chaimi paicunapish macanacuiman rishpa filisteocunata catircacuna.
23 Chai macanacuica Bet-Aven llajtacamami chayarca. Chai punllami Jehová Diosca israelitacunata quishpichirca.
24 Pero Israelmanta runacunaca chai punllaca shaicushcacunami carca. Saulca israelitacunataca: “¡Ñuca contracunata mishangacama maijan runapish manaraj chishiyajpi imallatapish* micushpaca maldicishca cachun!” nishpami jurachishca carca. Chaimi chai runacunamantaca ni maijan imallatapish mana micushcacuna carca.
25 Chaimantaca tucuicunami bosqueman chayarcacuna. Chai pambacunapica achca mielmi tiyaj carca.
26 Chai bosque chaupiman chayashpaca miel shutucujtami ricurcacuna. Pero Saúl paicunata jurachishcata manchashcamantami chai mieltaca ni maijan mana probasha nircacuna.
27 Shinapish Jonatanca soldadocunata paipaj yaya jurachishcataca mana uyashcachu carca. Chaimantami paica paipaj maquipi charicushca varata chutashpa vara puntata mielpi satirca. Chashnami paica mielta probashpaca cutin fuerzasta charirca.*
28 Paicunamanta shuj soldadoca: “Cambaj yayaca ñucanchijtaca shuj sinchi juramentotami rurachirca. Paica: ‘¡Maijan runapish cunan imata micushpaca maldicishcami canga!’ nircami. Chaimantami tucui caipi cajcunaca shaicushcacuna can” nircami.
29 Pero Jonatanca cashnami cutichirca: “Ñuca yaya cashna jurachishpaca gentecunataca achcatami sufrichishca. Ricuichij, ñucaca cai asha mielta probashpallami cutin fuerzasta charini.
30 Contracunapaj quichumushca cosascunamanta soldadocuna cunan punlla micushca cajpica ñucanchijca ashtahuan filisteocunatami tucuchinchijman carca” nircami.
31 Chai punllaca soldadocunaca Micmash lugarmanta Ayaloncamami filisteocunataca mishashpa tucuchircacuna. Chashna macanacushcamantami paicunaca yallitaj shaicushca saquirircacuna.
32 Chaimi macanacuimanta tigramuj soldadocunaca quichushca cosascunata ucui jahua japingapaj utca rircacuna. Paicunaca ovejacunata, vacacunata, bizicunata japishpami pambapi huañuchircacuna. Chashnami paicunaca yahuarhuan caj aichata micurcacuna.
33 Chaimi Saulmanca: “Ricui, macanacuimanta tigramuj runacunaca yahuarhuan caj aichata micushpami Jehová Diospaj ñaupajpi juchata ruracuncuna” nishpa huillarcacuna. Chashna nijpimi Saulca: “Cancunaca jatun juchatamari rurashcanguichij. Rato, caiman shuj jatun rumita singuchimuichij” nirca.
34 Chaimi Saulca: “Gentecunapurapajman rishpa: ‘Cada uno cancunapaj torota, cancunapaj ovejata caipi huañuchichij. Qꞌuipaca micuichij. Pero yahuarhuan caj aichata micushpa Jehová Diospaj ñaupajpi jatun juchata ama ruraichijchu’ nichij” nircami. Chaimi paicunaca chai tutaca cada uno paipaj torota apashpa chaipi huañuchircacuna.
35 Chaipimi Saulca Jehová Diospaj shuj altarta rurarca. Chai altartami paica punta cutin Jehová Diospaj rurashca carca.
36 Chai qꞌuipaca Saulca: “Filisteocunata catirashpa llaquichingapaj tuta uriyashunchij. Chashnami pacaringacama paicuna charishca cosascunataca tucuita quichushun. Paicunamantaca ni maijanta causaihuan mana saquishunchu” nircami. Chashna nijpimi Saulhuan caj runacunaca: “Cambaj ima alli cajpica chaita rurashunllami” nishpa cutichircacuna. Shinapish sacerdoteca: “Caimanta Dios ima nishcata caipi tapushunchij” nircami.
37 Chaimi Saulca Diostaca: “¿Filisteocunata catirashpa llaquichingapaj uriyashunchu? ¿Paicunataca israelitacunapaj maquipichu entregagringui?” nishpa tapurca. Shinapish Diosca chai punllaca imata mana cutichircachu.
38 Chaimi Saulca cashna nirca: “Cancuna, soldadocunata mandajcuna, caiman shamushpa pi cunan punlla juchata rurashcata tapuichij.
39 Israelitacunata quishpichij causaj Jehová Diospaj shutipimi jurani. Maijanpish cai juchata rurashca cashpaca huañunatajmi can, ñuca churi Jonatán cashpapish huañunatajmi can” nircami. Pai chashna nijpica imata pi mana cutichircachu.
40 Saulca tucui israelitacunataca: “Cancunaca shuj ladoman tucuichij. Ñucapish, ñuca churi Jonatanpish caishuj ladomanmi tucushun” nircami. Chashna nijpimi paicunaca: “Cambaj ima alli cajpica chaita rurashunllami” nircacuna.
41 Chaimi Saulca Jehová Diosmanca: “¡Israelitacunapaj Dioslla, pi juchayuj cashcata cai Tumimhuan agllahuai!” nirca. Chashna nijpica Jonatanpish, Saulpishmi agllashca llujshircacuna. Cutin caishujcunaca culpa illajmi saquirircacuna.
42 Chaipimi Saulca: “Ñuca, mana cashpaca ñuca churi Jonatán juchata rurashcata yachangapajca sorteaichij” nirca. Chashna sorteajpica Jonatanpajmi urmarca.
43 Saulca Jonatantaca: “¿Imatataj rurarcangui? Huillai” nircami. Jonatanca: “Ñuca maquipi charicuj vara puntahuanmi ashalla mielta probarcani. ¡Caipimi cani! ¡Huañuna cashpapish huañushallami!” nishpami cutichirca.
44 Chashna nijpimi Saulca: “Jonatán, can mana huañujpica Dios ñucata sinchita castigachun” nirca.
45 Pero runacunaca Saulmanca: “¿Jonatanca huañunachu can? ¡Paica mana huañunachu can! Jonatanmi israelitacunataca quishpichirca. Causaj Jehová Diospaj shutipimi juranchij. Paipaj ajchallapipish ni pi mana tuparingachu.* Cunan tucui chaicunata rurangapajca Jonatanca Diospaj ayudatami chasquirca” nircacunami. Paicuna chashna Jonatanta quishpichijpimi paica mana huañurca.
46 Chaimi Saulca filisteocunata catinata saquirca. Filisteocunapish paicunapaj allpamanmi tigrarcacuna.
47 Rey Saulca Israel llajtapica paipaj mandanatami sinchiyachirca. Shinallataj Israel llajta muyundijpi caj tucui contracunahuanmi macanacurca. Moabitacunahuan, ammonitacunahuan, edomitacunahuan, Zobá llajtamanta mandaj reycunahuan, filisteocunahuanmi macanacurca. Maipi macanacunaman rishpapish paica mishajtajmi carca.
48 Mana manchashpa macanacushpami amalequitacunata misharca. Israelitacunatapish paicunapaj contracunapaj maquimantami quishpichirca.
49 Saulpaj churicunaca Jonatán, Isví, Malki-Súa shuticunami carca. Paica ishqui ushushicunatapishmi charirca. Punta ushushica Merab shutimi carca. Catij ushushica Mical shutimi carca.
50 Saulpaj huarmica Ahimaazpaj ushushi Ahinoam shutimi carca. Cutin Saulpaj soldadocunata mandajca Saulpaj tío Nerpaj churi Abnermi carca.
51 Saulpaj yayaca Quis shutimi carca. Nerca Abnerpaj yayami carca. Cutin Nerca Abielpaj churimi carca.
52 Saúl mandacui punllacunapica filisteocunahuanmi Saulca sinchita macanacuj carca. Chaimantami Saulca shuj sinchi, mana manchaj runa ricurijpica paipaj soldado cachun tandachij carca.
Notacuna
^ Hebreo rimaipica: “shuj campopi shuj yunta huagra yapuna chaupi rahua” ninmi. Caipica shuj punllapi yapuna chaupi allpamantami parlacun.
^ Hebreo rimaipica: “punllapica” ninmi.
^ Hebreo rimaipica: “Cambaj maquita anchuchi” ninmi.
^ Hebreo rimaipica: “tandata” ninmi.
^ Hebreo rimaipica: “ñahuicunaca achijyarca” ninmi.
^ O “Paipaj umamantaca ni shuj ajchallapish mana urmangachu”.
