1 Samuel 15:1-35
15 Samuelca Saulmanca cashnami nirca: “Jehová Diosmi israelitacunata mandaj cachun canta agllachun ñucata cachashca. Cunanca Jehová Dios canman ima nishcata uyai.
2 Jahua pacha soldadocunata mandaj Jehová Diosca cashnami nin: ‘Egipto llajtamanta israelitacuna llujshijpica amalequitacunami paicunapaj contra macanacurcacuna. Chaimantami amalequitacunataca castigasha.
3 Cunanca can amalequitacunahuan macanacunaman rishpa paicunatapish, paicuna imalla charishca tucui cosascunatapish tucuchi. Shujllatapish causaihuanca ama saquingui.* Cꞌaricunata, huarmicunata, huahuacunata, llullu huahuacunata, torocunata, ovejacunata, camellocunata, burrocunatapish huañuchingui’ ninmi” nircami.
4 Chaimi Saulca Telaim lugarpi soldadocunata tandachishpa tucui runacunata yuparca. Chaipica chaquillahuan purij 200.000 soldadocuna, Judapaj familiamanta 10.000 runacunami tiyarca.
5 Saulca Amalecpaj llajtacamami chayarca. Chaipimi paipish, paipaj soldadocunapish amalequitacunahuan macanacungapaj pugru pamba cꞌuchupi miticurcacuna.
6 Saulca quenitacunataca: “Cancunaca israelitacuna Egipto llajtamanta llujshijpica mana tucurij cꞌuyaihuanmi paicunata tratarcanguichij. Chaimanta cancunapish amalequitacunahuan ama tucuchishca cangapaj paicunamanta caruyashpa richij” nircami. Chashna nijpimi quenitacunaca amalequitacunamanta caruyarcacuna.
7 Chai qꞌuipaca Saulpish, paipaj soldadocunapish Havilá allpamanta Sur nishca llajtacamami amalequitacunataca mishashpa rircacuna. Sur nishca llajtaca Egipto llajta cꞌuchupimi can.
8 Paicunaca tucui gentecunatami espadahuan huañuchircacuna. Pero amalequitacunata mandaj rey Agagtaca causajtami japircacuna.
9 Saulpish, paipaj soldadocunapish Agagtaca mana huañuchircacunachu. Shinallataj carnerocunata, ashtahuan alli huirayashca ovejacunata, vacacunatapish mana huañuchircacunachu. Tucui imapish ashtahuan valishca cosascunataca mana tucuchircacunachu. Pero tucui paicunapaj mana sirvishcata, paicuna mana munashcataca tucuimi tucuchircacuna.
10 Chaimi Jehová Diosca Samuelmanca cashna nirca:
11 “Saulta rey cachun ñuca agllashcamantaca llaquirinimi. Paica ñucata catinatami saquishca. Ñuca mandashcacunatapish mana cazushcachu” nircami. Chaita uyashpami Samuelca yallitaj preocuparishpa Jehová Diosta tucui tuta mañashpa pasarca.
12 Cayandij punllaca Samuelca utca jatarishpami Saulta tupanaman rirca. Pero Samuelmanca: “Saulca Carmeloman rishpami paillataj jatunyaringapaj chaipi shuj jatun rumita shayachirca. Chai qꞌuipaca paica chaimanta rishpami Guilgalman uriyarca” nishpami huillarcacuna.
13 Samuel Saulhuan ña tupanacushpaca Saulca: “Jehová Dios canta bendiciachun. Ñucaca Jehová Dios nishcacunata cazushcanimi” nircami.
14 Pero Samuelca: “Shinaca ¿imamantataj ovejacunapish, vacacunapish huacacujta uyani?” nishpami tapurca.
15 Samuel chashna tapujpimi Saulca: “Chai animalcunaca amalequitacunapajmi carca. Ñuca soldadocunami ashtahuan alli ovejacunata, vacacunata cambaj Jehová Diosman sacrificiocunata cungapaj nishpa mana huañuchircacuna. Pero tucui shujtaj cosascunataca tucuitami tucuchishcanchij” nishpa cutichirca.
16 Chaimi Samuelca Saulmanca: “¡Upalla cai! Jehová Dios tuta ñucaman ima nishcatami huillasha” nirca. Chashna nijpimi Saulca “Huillai” nirca.
17 Samuelca cashnami nirca: “Canca Israelpaj familiacunata pushaj* cachun agllashca horaspish, Jehová Dios israelitacunata mandachun canta agllashca horaspish canca imapaj mana valij shinami sintirircangui. ¿Chaitaca manachu yuyaringui?
18 Chai qꞌuipami Jehová Diosca cantaca shuj mingashcata pajtachichun cacharca. Diosca: ‘Juchata ruraj amalequitacunata tucuchi. Paicunata tucui tucuchingacama macanacui’ nircami.
19 Shinaca ¿ima nishpataj Jehová Dios nishcacunataca mana cazurcangui? Cazunapaj randica, ¡canca chai quichushca cosascunata japingapajmi utca rircangui. Chashnami Jehová Diospaj ñaupajpica mana allita rurashcangui!” nircami.
20 Shina nijpimi Saulca Samuelmanca: “¡Ñucaca Jehová Dios nishcataca cazurcanimi! Chaimi Jehová Dios mingashcata pajtachinaman rircani. Amalequitacunataca tucuimi tucuchircani. Amalequitacunata mandaj rey Agagtapish caimanmi pushamurcani.
21 Cambaj Jehová Diosman Guilgalpi sacrificiota cungapajmi quichushca cosascunamanta ñuca soldadocunaca tucuchishca canamanta alli ovejacunata, alli vacacunata japircacuna” nircami.
22 Chashna nijpimi Samuelca cashna nishpa cutichirca: “¿Imata rurajpitaj Jehová Diosca ashtahuan cushicun? ¿Rupachishca ofrendacunata, sacrificiocunata cujpichu cushicun? ¿Mana cashpaca Jehová Dios nishcata* cazujpichu cushicun? ¡Ricui! Shuj sacrificiota cunapaj randica paita cazunami ashtahuan alli can. Carnerocunapaj huirata cunapaj randica paita cazunami ashtahuan alli can.
23 Mana cazunaca adivinana juchata rurana shinami can. Jatun tucushpa imata ruranaca* magiata ruraj shina, rurashcalla dioscunata* adorana shinami can. Canca Jehová Dios nishcataca mana cazusha nircanguichu. Chaimantami Diospish can rey shina catichunca mana munan” nircami.
24 Chaimi Saulca Samuelmanca cashna nirca: “Gentecunata manchashcamanta, paicuna ima nishcata uyashcamantami Jehová Dios mandashcatapish, can nishcatapish mana cazushpa juchata rurashcani.
25 Cunanca ñuca rurashca juchata perdonapai. Jehová Diospaj ñaupajpi cumuringapaj ñucahuan tigrapai” nircami.
26 Pero Samuelca Saulmanca: “Canca Jehová Dios nishcataca mana cazusha nircanguichu. Cunanca Jehová Diospish can Israel llajtapi rey shina catichunca ña mana munanchu. Chaimantami canhuanca mana tigrasha” nircami.
27 Samuel ringapaj vueltata cujpica Saulca Samuelpaj sin mangas churana filopimi japirirca. Chaimi chai churanaca lliquirirca.
28 Chaita ricushpami Samuelca: “Ima shinami chai churana lliquirirca, chashnallatajmi cunanca Jehová Diosca Israel llajtata mandanamantaca cantaca anchuchishca. Chai mandanataca cantapish yalli alli mandajmanmi cunga.
29 Shinallataj Israelpaj Jatun Diosca pai nishcacunataca pajtachingatajmi. Pai yuyashcatapish mana cambiangachu.* Paica runacuna shinaca paipaj yuyaitaca mana cambianchu” nircami.
30 Chaimi Saulca: “Ciertomi can, juchatamari rurashcani. Pero ñuca pueblopi tiyaj autoridadcunapaj* ñaupajpi, israelitacunapaj ñaupajpi ñucata jatunyachihuai. Ñucahuan tigrai, chashnami Jehová Diospaj ñaupajpi cumurisha” nishpa cutichirca.
31 Shina cutichijpimi Samuelca Saulhuan tigrarca. Saulca Jehová Diospaj ñaupajpimi cumurirca.
32 Shinallataj Samuelca: “Amalequitacunata mandaj rey Agagta apamuichij” nircami. Chaimi Agagca pꞌiñarishpa* paipajman cꞌuchuyarca. Agagca: “Ñucataca ña mana huañuchingacunachu” nishpami yuyashca carca.
33 Shinapish Samuelca: “Canca achca huarmicunapaj churicunatami espadahuan huañuchishpa llaquichircangui. Chashnallatajmi cambaj mamapish churicuna illaj saquirishpa ashtahuan llaquilla canga” nircami. Chashna nishpami Samuelca Guilgal llajtapi Jehová Diospaj ñaupajpi shuj espadahuan Agagtaca huañungacama cutin cutin satirca.
34 Chai qꞌuipaca Samuelca Ramá llajtamanmi rirca. Cutin Saulca Guibeapi tiyaj paipaj propio huasimanmi huichiyarca.
35 Samuelca Saultaca chai punllamantami tucui paipaj causaipi ña mana ashtahuan ricurca. Pero paica Saulmantami yallitaj llaquilla carca. Jehová Diosca israelitacunata mandaj cachun Saulta churashcamantapish yallitajmi llaquirirca.
Notacuna
^ O “Shujllatapish ama llaquingui”.
^ Hebreo rimaipica: “uma” ninmi.
^ Hebreo rimaipica: “Jehová Dios rimashcata” ninmi.
^ O “Paipaj yuyaimanta imatapish ruranaca”.
^ Hebreo rimaipica: “terafim” ninmi. Caipica terafim nishpaca santocunamantami parlacun.
^ O “Paica mana llaquiringachu”.
^ Hebreo rimaipica: “ancianocunapaj” ninmi.
^ Caitaca “confiado” nishpapishmi traducishcacuna.
