1 Samuel 18:1-30
18 David Saulhuan parlanacushpa tucuchincami Davidca Jonatanhuan alli amigocuna tucui callarirca. Jonatanca pai cꞌuyarij shinallatajmi Davidta cꞌuyai callarirca.
2 Chai punllamantami Saulca Davidtaca paita sirvij cachun, paipaj yayapaj huasiman tigrachunpish mana saquirca.
3 Jonatanca pai cꞌuyarij shinallatajmi Davidta cꞌuyarca. Chaimi Jonatanpish, Davidpish shuj ari ninacuita rurarcacuna.
4 Ashtahuancarin Jonatanca pai churashca sin mangas churanata llujshichishpami Davidman curca. Shinallataj macanacunaman rina ropatapish, paipaj espadatapish, paipaj arcotapish, paipaj cinturontapishmi curca.
5 David macanacunaman llujshi callarishpaca Saúl maiman cachajpipish paica siempremi mishaj* carca. Chaimi Saulca macanacuiman rij runacunata David mandachun churarca. Chaica Saulta sirvijcunapajpish, tucui israelitacunapajpish allimi ricurirca.
6 Davidpish, soldadocunapish filisteocunata mishashpa tigramujpica Israelpi tiyaj tucui llajtacunamanta huarmicunami rey Saulta tupanaman llujshijcuna carca. Paicunaca panderetacunahuan, quimsa cuerdata charij instrumentocunahuan cantashpa, cushicushpa, bailashpami llujshijcuna carca.
7 Mishashcamanta cushicushpa cantaj huarmicunaca:
“Saulca mil gentecunatami huañuchishca,cutin Davidca diez mil gentecunatami huañuchishca” nishpami cantarcacuna.
8 Chai cantashcata uyashpami Saulca mana munashpa yallitaj pꞌiñarirca. Saulca: “Davidmantaca diez mil gentecunatami huañuchishca nincunamari. Pero ñucamantaca mil gentecunallatami huañuchishca nincunami. ¡Cunancarin paita rey cachun agllanallamari illan!” nircami.
9 Chai punllamantami Saulca Davidpi ña mana confiarca.
10 Cayandij punllaca Saulpaj yuyaicuna paillatataj llaquichichunmi Diosca saquirca. Chaimi Saulca paipaj huasipica loco laya comportari* callarirca. Davidca shujtaj cutincuna shinallatajmi arpapi tocacurca. Chaimi Saulca paipaj maquipi charicushca lanzata
11 Davidpajman shitarca. Saulca: “¡Paitaca lanzahuanmi patapi clavasha!” nishpami yuyarca. Chaimantami Saulca ishqui cutin lanzahuanca Davidta shitarca. Pero chai ishqui cutinmi Davidca Saulmanta quishpirirca.
12 Jehová Dios Davidhuan cashcamantami Saulca Davidta mancharca. Pero Saulmantaca Diosca ñami caruyashca carca.
13 Chaimi Saulca Davidtaca paipaj ladomanta caruyachishpa 1.000 gentecunata pushaj cachun churarca. Soldadocuna macanacuipi cajpica Davidmi pushaj* carca.
14 Jehová Dios Davidhuan cashcamantami David tucui ima rurashcapish alli llujshij carca.
15 Davidhuan tucui ima rurashcapish alli llujshijta ricushpami Saulca Davidta manchai callarirca.
16 David macanacuicunapi paicunata pushaj cashcamantami Judapaj familiamanta runacunapish, Israelpaj caishuj familiacunamanta runacunapish paita cꞌuyajcuna carca.
17 Saulca: “Paitaca ñuca propio maquihuanca mana huañuchishachu. Filisteocunapaj maquipi huañuchun” nishpami yuyaj carca. Chaimi Saulca Davidmanca: “Ñuca punta ushushi Merab shutitami canhuan cazarachun cusha. Ñucata mana manchashpa sirvichun, Jehová Diospaj macanacuicunapipish macanacuchunllami mañani” nirca.
18 Shinapish Davidca Saultaca: “¿Ñucapish, Israelpi tiyaj ñuca yayapaj familiapish pitaj canchijyari? ¿Ñucapish reypaj yerno cangapajca pitaj caniyari?” nishpami tapurca.
19 Shinapish Saulpaj ushushi Merab Davidhuan cazarana horas chayajpica, Saulca meholatitacunapuramanta Adrielhuanmi paipaj ushushitaca ña cazarachishca carca.
20 Saulpaj caishuj ushushi Micalmi Davidmanta enamorarishca carca. Chaita Saulman huillajpica chai noticiaca Saulpajca alli shinami ricurirca.
21 Saulca: “Cunantajca ñuca ushushita paihuan cazarachun cushpami Davidtaca trampapi urmachisha. Chashnami paica filisteocunapaj maquipi huañunga” nishpami yuyarca. Saulca caihuanca ña ishqui cutinmi Davidmanca: “Canca cunanmi ñuca yerno tucungui” nirca.
22 Shinallataj Saulca paita sirvijcunamanca: “Davidmanca pacalla rishpa: ‘Reyca canhuanca cushillami can. Reyta tucui sirvijcunapish cantami cꞌuyancuna. Chaimanta reypaj yerno tucui’ nigrichij” nishpami mandarca.
23 Saulta sirvijcuna Davidman chashna nijpica Davidca: “Ñucaca yangalla, huajchaca maitataj reypaj yernoca tucushayari” nishpami cutichirca.
24 Saulta sirvijcunaca David ima nishcatami paiman parlarcacuna.
25 Pero Saulca paicunataca: “Davidmanca: ‘Paipaj ushushimanta shuj preciota pagachunca 100 filisteocunapaj charishca aicha mirga carata pꞌitishpa apamuchunllami mañan. Paipaj contracunata tigra llaquichingapajmi chaita mañan’ ninguichij” nircami. Saulca David filisteocunapaj maquipi huañuchunmi chashna yuyacushca carca.
26 Saulta sirvijcuna Davidman chaita huillajpimi Davidca reypaj yerno tucunata munarca. Chaimantami manaraj tiempo pajtajpi
27 Davidca paihuan caj runacunahuan llujshishpa 200 filisteocunata huañuchirca. Chashnami Davidca paipaj yerno tucungapaj chai runacunapaj charishca aicha mirga carata pꞌitishpa reypajman apamurca. Chaita ricushpami Saulca paipaj ushushi Micaltaca Davidpaj huarmi tucuchun paiman curca.
28 Saulca Jehová Dios Davidhuan cashcata, paipaj ushushi Micalpish Davidta cꞌuyashcatami cuentata curca.
29 Chaita ricushpami Saulca Davidta ashtahuan manchai callarirca. Chai horasmantami Saulca paipaj tucui causaipi Davidpaj contra tucurca.
30 Filistea llajtamanta mandajcuna macanacuiman cada llujshishcapimi Saulpaj tucui macanacujcunamantaca David ashtahuan macanacushpa mishaj carca. Chaimantami paipaj shutica yallitaj respetashca carca.
Notacuna
^ O “imatapish alli yuyashpa ruraj”.
^ O “profeta shina comportari”.
^ Hebreo rimaipica: “gentecunapaj ñaupajpi yaicuj, llujshij” ninmi.
