1 Samuel 19:1-24
19 Asha tiempo qꞌuipaca Saulca paipaj churi Jonatanmanpish, paita tucui sirvijcunamanpish Davidta huañuchinata yuyacushcatami huillarca.
2 Pero Jonatanca Davidta cꞌuyashcamantami paipaj yaya ima nishcataca Davidman tucuita parlashpa cashna nirca: “Ñuca yaya Saulca cantami huañuchisha nin. Caya tutamanta ladoca cuidaripangui. Can maipi miticunata mashcashpa chaipi saquiringui.
3 Ñucaca can maipi cashca lugar cꞌuchullamanmi ñuca yayahuan risha. Ñuca yayamanca canmantami parlasha, pai canmanta ima nijta yachaj chayashpaca huillashatajmi” nircami.
4 Chaimi Jonatanca paipaj yaya Saulmanca Davidmantaca allita parlarca. Jonatanca: “Reyca paita sirvij Davidpaj contraca ima juchata mana ruranachu can. Paica cambaj contraca ima juchata mana rurashcachu. Tucui pai rurashcaca cambaj allipajmi cashca.
5 Davidca huañuna cashpapish Goliat* runatami huañuchirca. Pai chaita rurashcamantami Jehová Diosca tucui israelitacunata quishpichirca. Canllatajmi chaita ricushpaca achcata cushicurcangui. Shinaca ¿culpata mana charij Davidpaj yahuarta jichashpa, paita yangamanta huañuchishpaca imamantataj juchata ruragringuiyari?” nircami.
6 Saulca Jonatán nishcata cazushpami: “Causaj Jehová Diospaj shutipimi jurani, paitaca manataj huañuchishachu” nishpa shuj ari ninacuita rurarca.
7 Chai qꞌuipaca Jonatanca Davidta cayashpami paiman tucuita parlarca. Chai huashami Saúl maipi cashcaman paitaca pusharca. Chaimi Davidca ñaupa shinallataj sirvishpa catirca.
8 Asha tiempo qꞌuipaca cutinllatajmi macanacui tiyai callarirca. Davidca filisteocunapaj contra macanacunaman llujshishpami achcacunata huañuchirca. Chaimantami filisteocunaca Davidmanta miticushpa rircacuna.
9 Shuj punllaca Saulca paipaj huasipimi paipaj maquipi lanzata charishpa tiyacurca. Chaipimi Jehová Diosca mana alli yuyaicuna* Saulta llaquichichun saquirca. Cutin Davidca arpatami tocacurca.
10 Saulca Davidtami lanzahuan patapi clavanata munarca. Pero chai lanza ama japichun David ladoyajpimi chai lanzaca patapi clavarirca. Chaimantami Davidca chai tutallataj chaimanta miticushpa rirca.
11 Chai huashaca Saulca huaquin runacunatami Davidpaj huasita chapashpa, cayandij punllata paita huañuchichun cacharca. Pero Davidpaj huarmi Micalca: “Cunan tutallataj mana caimanta pacalla rishpaca caya punllaca huañunguimi” nishpami advirtirca.
12 Chai ratomi Micalca Davidta ventanata uriyashpa miticushpa richun ayudarca.
13 Chaimi Micalca shuj santota* japishpa Davidpaj camapi sirichirca. Umata churana ladomanca chivo millmahuan rurashca mallatami churarca. Qꞌuipaca jahua churanahuanmi cꞌatachirca.
14 Saúl cachashca runacuna Davidta japinaman shamujpica Micalca: “Paica ungushcami can” nircami.
15 Chashna nijpimi Saulca pai cachashca runacunataca Davidta cutin ricunaman cachashpaca: “Paita huañuchingapajca camandij apamunguichij” nirca.
16 Chai runacuna yaicushpaca camapi shuj santo siricushcatami japircacuna. Shinallataj David umata churana ladomanca chivo millmahuan rurashca mallata churashcatami japircacuna.
17 Saulca Micaltaca: “¿Imamantataj ñucata umarcangui? ¿Ñuca contra pacalla richunca ima nishpataj saquircangui?” nishpami tapurca. Chashna nijpimi Micalca: “Davidca ‘¡Ñucata richun saqui, mana cashpaca cantami huañuchisha!’ nircami” nishpa cutichirca.
18 David chaimanta miticushpa llujshishpaca Samueltami Ramá llajtapi ricunaman rirca. Chaipimi Saúl tucui imallata rurashcata Samuelman parlarca. Chai qꞌuipaca ishquindijmi Nayot lugarman rishpa chaipi saquirircacuna.
19 Tiempo qꞌuipaca Saulmanca: “Davidca Ramá llajtapi tiyaj Nayot lugarpimi can” nishpami huillarcacuna.
20 Chai ratomi Saulca huaquin runacunata Davidta japichun cacharca. Chai runacuna chaiman chayashpaca ashtahuan mayorlla caj profetacuna huillacujta, Samuelpish shayarishpa paicunata pushacushcatami ricurcacuna. Saúl cachashca runacunapish Diospaj espirituta chasquishpami profetacuna shina rimai callarircacuna.
21 Saúl chaita yachaj chayashpaca shujtaj runacunatami cacharca. Paicunapish profetacuna shinami rimai callarircacuna. Chaimi Saulca tercer grupo runacunata cacharca. Paicunapish profetacuna shinami rimai callarircacuna.
22 Chaimantami Saulca paillataj Ramá llajtaman rirca. Saulca Secú lugarpi tiyaj yacuta tandana jatun jutcumanmi chayarca. Chaiman chayashpaca: “¿Samuelpish, Davidpish maipitaj can?” nishpami tapurca. Chashna tapujpimi: “Ramá llajtapi tiyaj Nayot lugarpimi can” nishpa cutichircacuna.
23 Ramá llajtapi tiyaj Nayot lugarman ricushpami Saulca Diospaj espirituta chasquirca. Chaimantami paica Ramá llajtapi tiyaj Nayot lugarman chayangacama tucui ñanta profeta shina rimarishpa rirca.
24 Chaiman chayashpaca Saulpish paipaj ropata anchuchishpami Samuelpaj ñaupajpica profeta shina rimai callarirca. Saulca tucui chai punllapish, tucui chai tutapish pambapimi lluchulla* siricurca. Chaimantami paitaca “¿Saulpish profetachu canyari?” nincuna.
Notacuna
^ Hebreo rimaipica: “filesteo” ninmi.
^ Hebreo rimaipica: “shuj mana alli espíritu” ninmi.
^ Hebreo rimaipica: “terafim” ninmi. “Terafim” shimita huasha diccionariopi ricui.
^ O “ucu churanallahuan”.
