1 Samuel 2:1-36
2 Chaimi Anaca cashna mañarca:
“Ñuca shunguca Jehová Diosta yuyarishpami cushicun.Jehová Diosmi ñucamanca fuerzata cun.*
Can ima shina quishpichishcamantami cushicuni.Chaimantami ñuca contracunamanca mana manchashpa cutichini.
2 Jehová Dioslla, can shina jucha illajca* pi mana tiyanchu.Can shina Diosca shujtajca pi mana tiyanchu.Ñucanchij Dioslla, canllami jatun rumi shina sinchi cangui.
3 Jatun tucushpa rimanata saquichij.Cancunapaj shimimantaca jatun tucushca rimaicuna ama llujshichun.Jehová Diosca tucuita yachaj Diosmi can.Chaimantami paica gentecunapaj ruraicunataca cashcata rurashpa juzgan.
4 Paimi sinchi runacunapaj arcocunata pꞌaquin.Pero fuerza illajcunaca fuerzatami chasquincuna.
5 Ñaupaman achca micunata charijcunaca micunata charingapajmi trabajana can.Pero yaricaihuan cajcunaca ña mana yaricaihuan pasancunachu.
Huahuata mana charinata valij huarmica cunanca canchis* huahuacunatami charin.Pero achca huahuacunata charijca paillami saquirishca.
6 Jehová Diosmi causaitapish cun, causaitapish quichun.Paimi Pambana Jutcuman* uriyachin, paillatajmi Pambana Jutcumantapish llujshichin.
7 Jehová Diosmi pobreyachin, paillatajmi charijyachin.Paillatajmi humillachin, paillatajmi jatunyachin.
8 Humildetaca ñutu allpamantami jatarichin,pobretaca montonashca ushpamantami* jatarichin.Chashnami paitaca mandajcunapaj tiyarinapi tiyachin,alli nishca lugarpipish churan.
Allpapaj cimientocunaca Jehová Diospajmi,chai jahuapimi granota pꞌucuj allpataca churashca.
9 Paica tucui shunguhuan paita sirvijcunatami cuidan,pero millaicunataca amsapimi upallachin.Runaca paipaj fuerzallamantaca mana mishai tucunchu.
10 Jehová Diosca paipaj contra macanacujcunataca ñutungami,*paicunahuan pꞌiñarishcataca jahua pachamanta cꞌulun nichishpami ricuchinga.
Jehová Diosca tucui allpa pachatami juzganga.Paipaj reymanca podertami cunga.Paipaj agllashcamanca fuerzatami cunga” nircami.
11 Chai qꞌuipaca Elcanaca Ramapi saquirij paipaj huasimanmi tigrarca. Pero paipaj churica sacerdote Elihuanmi Jehová Diosta sirvishpa saquirirca.
12 Elipaj churicunaca yallitaj millaicunami carca. Jehová Diostapish mana respetajcunachu carca.
13 Paicunaca gentecuna apamushcacunamanta sacerdotecuna japina cashcallataca mana japijcunachu carca. Chaipaj randica cashnami rurajcuna carca: shuj runa sacrificiocunata cucujpica sacerdoteta ayudaj runaca shuj jatun trinchehuan shamushpami aicha tꞌimbucujpi
14 maijan mangapipish chai trincheta satishpa aichata llujshichij carca. Chashnami sacerdoteca chai jatun trinchehuan tucui llujshichishca aichahuan saquirij carca. Siló llajtaman rij tucui israelitacunatami chashna rurajcuna carca.
15 Shinallataj huirata rupachishpa manaraj cushnichijpimi sacerdoteta ayudaj shuj runaca chai sacrificiota ruracuj runataca: “Sacerdoteman aichata cusachun cui, paica tꞌimbushca aichataca mana munanchu. Paica chahua aichallatami munan” nij carca.
16 Chai sacrificiota cuj runaca “Puntapica maijanpish huirata rupachishpami cushnichinaraj can. Qꞌuipami can munashcahuan saquiri tucungui” nijmi carca. Chashna nicujpirajmi chai sacerdoteta ayudajca: “Mana, chai aichata cai rato cui. Mana cashpaca ñucallatajmi quichusha” nij carca.
17 Jehová Diosman cuna ofrendata mana respetashcamantami sacerdotecunata ayudajcunapaj juchacunaca Jehová Diospaj ñaupajpica yallitaj mana alli ricurirca.
18 Samuelca huahuaraj cashpapish linomanta rurashca efodta* churarishcami* Jehová Diospaj ñaupajpi sirvij carca.
19 Shinallataj cada huatami paipaj mamaca sin mangas shuj uchilla churanata ruraj carca. Paipaj cusahuan Silopi cada huata sacrificiota cunaman rishpami sin mangas churanataca Samuelpaj apaj carca.
20 Elica Elcanatapish, paipaj huarmi Anatapishmi bendiciarca. Elica: “Cambaj huarmica Jehová Diosmanmi shuj huahuata cushca. Chaita rurashcamanta Jehová Dios canman shuj huahuata cai huarmihuan cuchun” nircami. Chai qꞌuipaca paicunaca paicunapaj huasimanmi tigrarcacuna.
21 Jehová Dios Anata ayudajpimi paica cutin chichu saquirirca. Chashnami quimsa churicunata, ishqui ushushicunata charirca. Cutin huahua Samuelca Jehová Diospaj ñaupajpimi huiñashpa catirca.
22 Elica ñami yallitaj mayorlla carca. Pero paipaj churicuna tucui israelitacunata imata ruracujtaca allimi yacharca. Tandanacuna carpa huasi pungupi sirvij huarmicunahuan chayarinacujcuna cashcatapish paica allimi yacharca.
23 Elica paipaj churicunataca: “¿Imamantataj caicunata ruranguichij? Tucui gentecunami cancuna mana allicunata rurashcata huillancuna.
24 Ñuca huahuacunalla, chaita ruranata saquichij. Jehová Diospaj pueblo cancunamanta ima nicushcaca mana allichu can.
25 Shuj runa caishuj runapaj contra juchata rurajpica paimantami maijanpish Jehová Diosta mañai tucunga. Pero shuj runa Jehová Diospaj contra juchata rurajpica, ¿pitaj paimantaca mañangayari?” nircami. Shina nijpipish paicunaca paicunapaj yaya ima nishcata mana cazurcacunachu. Chaimantami Jehová Diosca paicunata huañuchinata* decidishca carca.
26 Cutin huahua Samuelca ashtahuanmi huiñashpa catirca. Paica Jehová Diospajpish, gentecunapajpish ashtahuan cꞌuyashcami tucurca.
27 Diosta sirvij shuj runa Elipajman rishpami cashna nirca: “Jehová Diosca cashnami nin: ‘¿Cambaj ñaupa yayapaj familiamanca* Egiptopi cajpi, paicuna faraonpaj sirvijcuna cajpica manachu ñuca pi cashcata achijta ricuchircani?
28 Israelpaj tucui familiacunamantaca cambaj ñaupa yayami sacerdote shina ñucata sirvingapajca agllashca carca. Paica ñuca altarpi sacrificiocunata rurangapaj, inciensota rupachingapaj,* ñuca ñaupajpi efodta churaringapajmi agllashca carca. Chaimantami cambaj ñaupa yayapaj familiamanca israelitacuna* ninahuan rupachishca ofrendacunamanta asha aichata japichun saquircani.
29 ¿Cancunaca imamantataj ñuca huasipi ñuca sacrificiota, ñuca ofrendata cuchun mandashcataca mana valichinguichij? ¿Imamantataj cambaj churicunataca ñucatapish yalli jatunyachingui? ¿Cancunaca imamantataj ñuca pueblo Israel apamushca ofrendacunamanta ashtahuan alli partecunata japishpa gordoyacunguichij?
30 Israelitacunapaj Jehová Dios nishca shimicunaca caicunami can. Paica: “Cambaj familiapish, cambaj ñaupa yayapaj familiapish siempremi ñucata sirvingacuna* nishcaca ciertomi can” ninmi. Shinapish cunanca Jehová Diosca: “Cutin chaita rurachunca mana saquishachu. Ñucata jatunyachijcunataca jatunyachishami. Pero ñucata pꞌiñajcunataca pꞌiñashami” ninmi.
31 Ricui, cambaj podertapish,* cambaj yayapaj familiapaj podertapish ñuca tucuchina tiempoca cꞌuchuyamucunmi. Cambaj familiamantaca mayoryangacama ni pi mana causangachu.
32 Israelitacunapaj tucui allita rurai punllacunaca canca ñuca huasipica cambaj ñaupajpi shuj contratami charingui. Shinallataj cutinca cambaj familiapica shuj mayor runaca ña mana tiyangachu.
33 Cancunamanta shuj runatami ñuca altarpi sirvichunca saquisha. Paica achca llaquicunatami apamunga.* Chaimantami cambaj ñahuicunapish amsayanga. Ashtahuanpish cambaj huasipi saquirijcunataca casi tucuicunatami espadacunahuan huañuchingacuna.
34 Ñuca nicushcacuna mana llulla cashcata yachachunca cai señaltami churani. Cambaj ishqui churicuna Hofnipish, Finehaspish ishquindijmi shuj punllallapi huañungacuna.
35 Chai qꞌuipaca tucuita alli pajtachij shuj sacerdotetami ñucapaj agllasha. Paica ñuca shungu munashcacunatami pajtachinga. Paipaj huahua huahuacunatapish huiñaipaj sacerdote shina sirvichunmi saquisha. Paica ñuca agllashcatami siempre sirvinga.*
36 Cambaj familiamanta saquirijcunaca paipaj ñaupajpi cumurishpami trabajota, micunata mañangapaj shamungacuna. Paicunaca: “Ñucanchij micunata charingapaj sacerdote shina trabajangapaj shuj trabajota cuhuai” ningacunami’ ninmi” nircami.
Notacuna
^ Hebreo rimaipica: “Ñuca gachuca Jehová Diospimi alzarin” ninmi. “Gachu” shimita huasha diccionariopi ricui.
^ “Jucha illaj” shimita huasha diccionariopi ricui.
^ O “siete”.
^ O “Seolman”. Cai shimica huañushcacuna samaricujta ricuchingapajllami can. “Seol” shimita huasha diccionariopi ricui.
^ O “uchupamantami”. Caitaca “basureromantami jatarichin” nishpapishmi traducishcacuna.
^ Caitaca “Jehová Dioshuan macanacujcunaca mancharishcami saquiringacuna” nishpapishmi traducishcacuna.
^ Hebreo rimaipica: “chumbillirishcami” ninmi.
^ “Efod” shimita huasha diccionariopi ricui.
^ O “paicunapaj causaita quichunata”.
^ Hebreo rimaipica: “huasimanca” ninmi.
^ Caitaca “sacrificiocunata rupachishca cushnita huichiyachingapaj” nishpapishmi traducishcacuna.
^ Hebreo rimaipica: “Israelpaj churicuna” ninmi.
^ Hebreo rimaipica: “ñuca ñaupajpi puringacuna” ninmi.
^ Hebreo rimaipica: “rigratapish” ninmi.
^ O “cambaj almatami fuerza illajta saquinga”.
^ Hebreo rimaipica: “ñaupajpi puringa” ninmi.
