1 Samuel 20:1-42
-
Jonatán Davidman achca cꞌuyaita ricuchishcamanta (1-42)
20 Davidca Ramá llajtapi tiyaj Nayot lugarmantami miticushpa rirca. Paica Jonatanta ricunaman rishpaca: “¿Imatataj rurashcani? ¿Ñucata huañuchisha* nichunca cambaj yayapaj contraca ima juchatataj rurashcani?” nishpami tapurca.
2 Chashna tapujpimi Jonatanca: “¡Canca mana huañunguichu! ¡Chaitaca ama yuyaillapishchu! Ricui, ñuca yayaca ñucaman manaraj huillashpaca imatapish mana rurangachu. ¿Chaitaca imamantataj ñucamanca pacangayari? Canca mana huañunguichu” nishpa cutichirca.
3 Pero Davidca cutin cutin jurashpami: “Cambaj yayaca can ñucata cꞌuyashcataca allimi yachan. Paica: ‘Jonatán ama sufrichunca pai mana yachaj chayanami alli canga’ nishpami yuyanga. Causaj Jehová Diospaj shutipi, cambaj shutipimi jurani. Ñuca huañunapajca ashallami illan” nirca.
4 Jonatanca Davidmanca: “Can imata mañashcatami canmantaca rurasha” nircami.
5 Chaimantami Davidca Jonatanmanca: “Cayaca llullu lunami can. Ñucaca reyhuan micungapajmi tiyarina cani. Shinapish caita rurashun: canca ñuca richunmi saquina cangui. Ñucaca quimsa punllacunatami chishiyangacama campopi miticushpa saquirisha.
6 Cambaj yaya ñuca mana chaipi cashcata cuentata cujpica paimanca: ‘Davidca paipaj llajta Belenman utca ringapaj cachahuai nishpami rogarirca. Chaipimi cada huata shuj sacrificiota tucui paipaj familiahuan cungapaj rirca’ ningui.
7 Pai ‘Allimi can’ nijpica ñucata mana huañuchisha nishcatami yachasha. Pero pai pꞌiñarijpica ñucata huañuchingapaj decidido cashcatami yachasha.
8 Ñucaman mana tucurij cꞌuyaita ricuchi. Canca canta sirvij ñucahuanca Jehová Diospaj ñaupajpimi shuj ari ninacuita rurarcangui. Pero ñuca ima culpata charijpica canllataj ñucata huañuchi. ¿Imapajtaj cambaj yayamanca ñucata entreganguiyari?” nircami.
9 Chashna nijpimi Jonatanca: “¡Maitataj chaita ninguiyari! Ñuca yaya canta huañuchingapaj decidido cashcata yachaj chayashpaca, ¿manachu canmanraj huillaiman?” nirca.
10 Chaimi Davidca Jonatanmanca: “Pero ¿cambaj yaya ñucahuan pꞌiñarishca cashcataca pitaj huillangayari?” nishpa tapurca.
11 Shina nijpimi Jonatanca Davidmanca: “Shamui, campoman jacu” nishpa cutichirca. Chaimi ishquindij campoman rircacuna.
12 Jonatanca Davidmanca cashnami nirca: “Caya punlla cashpa, mana cashpaca cayandij pasashca punlla casi cai horas shinallatajmi ñuca yaya imata yuyacushcataca yachaj chayasha. Caimantaca israelitacunapaj Jehová Diosmi testigo can. Ñuca yaya canhuan* mana pꞌiñarishca cashcata yachashpaca canman huillachunmi pita cachasha.
13 Ñuca yaya canta huañuchisha nishcata yachaj chayashpa, can quishpirichun mana huillajpica Jehová Dios ñucata* sinchita castigachun. Jehová Dios ñuca yayahuan cashca shinallataj canhuanpish cachun.
14 Ñuca causacujpiraj, ñuca huañushca qꞌuipapish Jehová Diospaj mana tucurij cꞌuyaita ricuchishpa catingui.
15 Ñuca familiaman mana tucurij cꞌuyaita huiñai huiñaicama ricuchinataca amataj saquingui. Jehová Dios cambaj tucui contracunata cai allpamanta tucuchijpipish chashna cꞌuyaita ricuchinataca ama saquingui” nircami.
16 Chashnami Jonatanca Davidpaj familiahuan* shuj ari ninacuita rurarca. Shinallataj paica: “Davidpaj contracunataca Jehová Diosmi castiganga” nircami.
17 Jonatanca Davidhuan alli amigocuna tucushcatami cutin jurachirca. Jonatanca pai cꞌuyarij shinallatajmi Davidta cꞌuyarca.
18 Jonatanca Davidmanca cashnami nirca: “Cayaca llullu lunami can. Can tiyarina chushajlla cashcata ricushpami ñuca yayaca canta mashcanga.
19 Quimsa punllapicarin can mana chaipi cashcata ricushpami cantaca ashtahuan mashcanga. Cutin canca shujtaj punlla* maipi miticushca lugarllamantaj shamushpami cai rumi cꞌuchupi saquirina cangui.
20 Ñucaca quimsa flechacunataca imata apuntacuj shinami rumi ladoman shitasha.
21 Ñucata sirvijta cachashpaca: ‘Flechacunata mashcanaman ri’ nishami. Paita: ‘¡Ricui! Flechacunaca ashtahuan cꞌuchumanmi can, japigri’ ñuca nijta uyashpaca canca tigramui tucunguimi. Chaita uyashpaca tucui alli cashcata, ima peligropish manataj tiyashcatami yachangui. Chaitaca causaj Jehová Diospaj shutipimi jurani.
22 Pero chai huambrata: ‘¡Ricui! Flechacunaca ashtahuan carumanmi can’ ñuca nijta uyashpaca chaimanta ringui, Jehová Diosmi can chaimanta richun munan.
23 Ñuca canhuan ari ninacuita rurashcataca Jehová Dios huiñai huiñaipaj testigo cachun” nircami.
24 Shinaca Davidca campopimi miticurca. Ña llullu luna chayajpica reyca paipaj micuna mesapimi tiyarirca.
25 Reyca pai siempre tiyarinapimi pata cꞌuchupi tiyacurca. Saulpaj chꞌimbapurapica Jonatanmi tiyacurca. Cutin Saulpaj ladomanca Abnermi tiyacurca. Pero David tiyarinaca chushajllami carca.
26 Chai punllaca Saulca imata mana nircachu. Paica paipaj shungupica: “Davidca imami tucushcanga. Chaimantami mapa canga. Ari, chaimi canga, paica manaraj chuyayarishcachu canga” nishpami yuyarca.
27 Pero cayandij punllapish* David tiyarinaca chushajmi catirca. Chaimi Saulca paipaj churi Jonatantaca: “¿Jesepaj churica imamantataj cainapish, cunanpish micunamanca mana shamushca?” nishpa tapurca.
28 Jonatanca Saulmanca cashna nishpami cutichirca: “Davidca Belenman ringapaj cachahuai nishpami rogarirca.
29 Davidca: ‘Ñuca familiaca shuj sacrificiotami ñuca llajtapi ruragrin. Ñuca propio huauquimi chaiman richunca mañarca. Chaiman richun saquihuai. Caita rurana cambaj ñaupajpi alli ricurijpica ñuca huauquicunata ricunaman ringapaj permisota cuhuai’ nircami. Chaimantami paica reypaj mesamanca mana shamushca” nircami.
30 Shina nijpimi Saulca yallitaj pꞌiñarishpa Jonatantaca cashna nirca: “¡Imapajpish mana sirvij huarmipaj mana cazuj churi! ¿Can Jesepaj churi parte cashcataca mana cuentata cushcatachu yuyangui? ¡Chaita rurashpaca cambajpish, cambaj mamapajpish shuj pingaimi cangui!
31 Jesepaj churi cai allpapi causashpa catijpirajca canpish, cambaj mandanapish mana seguro cangachu. Chaimanta pitapish Davidta mashcanaman cachai. Paica huañunatajmi* can” nircami.
32 Shinapish Jonatanca paipaj yaya Saulmanca: “¿Imamantataj paica huañuna can? ¿Paica imatataj rurashca?” nishpami cutichirca.
33 Chaimi Saulca Jonatanta huañuchisha nishpa lanzahuan shitarca. Chashna rurajpimi Jonatanca paipaj yaya Saúl Davidta huañuchingapaj decidido cashcata cuentata curca.
34 Chai ratomi Jonatanca mesamanta yallitaj pꞌiñarishca jatarirca. Llullu luna segundo punllapica paica imata mana micurcachu. Jonatanca Davidmanta, paipaj propio yaya Davidta humillashcamantapishmi mana alli sintirirca.
35 Tutamanta ladomanca Jonatanca Davidhuan parlanacushca shinami campoman rirca. Chaimanca Jonatanca paita sirvij shuj joven runatapish pushashpami rirca.
36 Chaipimi Jonatanca paita sirvijmanca: “Ñuca shitashca flechacunata callpashpa mashcagri” nirca. Chashna nijpimi paita sirvijca chai flechacunata callpashpa mashcanaman rirca. Shinapish Jonatanca shuj flechatami paita sirvijmanta ashtahuan caruman shitarca.
37 Jonatán flechata shitashca lugarman paita sirvij chayajpica Jonatanca: “¿Manachu chai flechaca ashtahuan carupi can?” nishpami caparirca.
38 Shinallataj Jonatanca: “¡Apurai! ¡Utca callpai! ¡Tiempota ama pirdichu!” nishpami caparirca. Jonatanta sirvijca flechacunata japishpami paipaj amopajman tigrarca.
39 Shinapish paita sirvijca ima pasacushcataca mana cuentata curcachu. Jonatanhuan, Davidllahuanmi ima tucushcataca intindircacuna.
40 Chai qꞌuipami Jonatanca paita sirvijman macanacunacunata cushpaca: “Caicunata llajtaman apashpa ri” nirca.
41 Davidca ura ladoman saquirij chai cꞌuchulla lugarpimi miticushca carca. Jonatanta sirvij chaimanta rijpimi Davidca chaimanta llujshishpa quimsa cutin pambacama Jonatanpaj ñaupajpi cumurirca. Chai qꞌuipaca paicunapurami caishujmanta chaishujmanta ugllarinacushpa huacarcacuna. Pero Davidmi ashtahuantajca huacarca.
42 Jonatanca Davidtaca: “Tranquilo rilla, ñami ishquindij Jehová Diospaj shutipi jurashcanchij. Jurashpaca ñucanchijca: ‘Canhuanpish, ñucahuanpish, cambaj huahuacunahuanpish, ñuca huahuacunahuanpish shuj ari ninacuita rurashcamanta Jehová Dios huiñai huiñaipaj testigo cachun’ nircanchijmi” nircami.
Chai qꞌuipaca Davidca rircallami. Cutin Jonatanca llajtamanmi tigrarca.
Notacuna
^ O “Ñuca causaita quichusha”.
^ Hebreo rimaipica: “Davidhuan” ninmi.
^ Hebreo rimaipica: “Jonatanta” ninmi.
^ Hebreo rimaipica: “huasihuan” ninmi.
^ Hebreo rimaipica: “trabajana punlla” ninmi.
^ Hebreo rimaipica: “llullu lunapaj cayandij punllapish” ninmi.
^ Hebreo rimaipica: “Paica huañuipaj churimi” ninmi.
