1 Samuel 21:1-15
21 Tiempo qꞌuipaca Davidca Nob llajtamanmi rirca. Chaipimi sacerdote Ahimélec carca. Ahimelecca Davidta ricushpaca manchaimantami chujchui callarirca. Paica: “¿Imamantataj canlla cangui? ¿Imamantataj canhuanca mana pi can?” nishpami tapurca.
2 Davidca sacerdote Ahimelecmanca cashna nishpami cutichirca: “Reymi ñucamanca shuj ruraita rurachun mingarca. Pero paica: ‘Canman imata rurachun mingashcataca ni pi ama yachaj chayachun. Shinallataj canman cushca mandashcacunatapish ama piman huillangui’ nircami. Chaimantami ñucahuan caj runacunataca shuj lugarpi paicunahuan tupangapaj cayashcani.
3 ¿Micungapajca imallatapish charinguichu? Pichca tandallatapish micungapaj cuhuai. Mana cashpaca can imalla charishcata cuhuai” nircami.
4 Pero sacerdote Ahimelecca Davidmanca: “Diospajlla chꞌicanyachishca tandallatami charini. Shujtaj tandataca mana charinichu. Diospajlla chꞌicanyachishca tandataca cambaj runacuna huarmicunahuan mana chayarishcacuna cajllapimi cui tucuni” nishpami cutichirca.
5 Chashna nijpimi Davidca sacerdote Ahimelecmanca: “Shujtaj cutincunapi macanacunaman llujshishca shinallatajmi ñucanchijca ni pi huarmicunahuan mana chayarinacushcanchij. Macanacuicunaman siempre rishpaca ñucahuan caj runacunaca paicunapaj cuerpocunataca jucha illajtami charishcacuna. ¡Cunancarin paicunaca ashtahuanmi jucha illajcuna can!” nishpa cutichirca.
6 Chaimi sacerdote Ahimelecca Diospajlla chꞌicanyachishca tandata paiman curca. Chai tandallatami paica charirca. Diosman cushca cai tandataca Diospaj carpa huasipi Jehová Diospaj ñaupajmantami anchuchishcacuna carca. Chai tandataca cunanlla rurashca tandahuanmi cambiana punllapi cambiashcacuna carca.
7 Chai punllaca Saulta sirvijcunapuramanta shuj runaca Jehová Diospaj ñaupajpi saquirina cashcamantami chaipi cashca carca. Paica Saulpaj michijcunata pushajmi carca. Paica edomitacunapuramanta Doeg shuti runami carca.
8 Davidca sacerdote Ahimelectaca: “¿Manachu canca shuj espadata, mana cashpaca shuj lanzata charingui? Rey mingashcata utca pajtachina cashcamantami ñuca espadatapish, ñuca macanacunacunatapish mana apamushcani” nircami.
9 Chashna nijpimi sacerdoteca: “Elá pugru pambapi filisteo Goliat runata can huañuchishcapaj espadallatami charini. Chai espadaca pañohuan pilluchishcami efod huasha ladopi can. Canman cungapajca chaillatami charini. Can munashpaca apailla” nirca. Chashna nijpimi Davidca: “Ari, ñucaman cuilla. Cashna laya shujtaj espadaca mana tiyanchu” nirca.
10 Chai punllaca Davidca chaimanta rishpami Saulmanta miticushpa catirca. Qꞌuipaca Gad llajtamanta rey Akís maipi cashcamanmi chayarca.
11 Rey Akista sirvijcunaca paimanca: “¿Manachu cai Davidca Israel llajtata mandaj rey can? ¿Manachu paimantaca bailashpa, cantashpaca:‘Saulca mil gentecunatami huañuchishca,cutin Davidca diez mil gentecunatami huañuchishca’ nishpa cantarcacuna?” nircacunami.
12 Davidca paicuna nishcacunapimi yuyarca. Chaimantami Gad llajtamanta rey Akismantaca achca manchaita charirca.
13 Chaimi paica yuyaita chingachij shina tucushpa paicunapaj chaupipica loco shina comportarirca. Shinallataj chai llajtaman yaicuna pungucunapimi maipishcachun aspi callarirca. Paipaj chꞌucatapish barbas urita shutuchunmi saquirca.
14 Chaita ricushpami rey Akisca paita sirvijcunamanca: “¡Cai runaca locomari! ¿Imapajtaj ñucapajmanca pushamushcanguichij?
15 ¿Manachu ñucaca ña achca lococunata charini? ¿Imapajtaj shujtaj locohuanca ñucapajman apamunguichij? ¿Cancunaca paitaca ñuca huasiman yaicuchichunchu munanguichij?” nircami.
