1 Samuel 22:1-23
22 Chaimanta David rishpaca Adulam llajtapi tiyaj jutcupimi miticurca. Paipaj huauquicuna, paipaj tucui familiapish chaita yachaj chayashpaca pai maipi cashcamanmi uriyarcacuna.
2 Shinallataj problemacunata charijcunapish, dibicunata charijcunapish, paicunapaj causaihuan mana cushilla cajcunapishmi Davidhuan tandanacurcacuna. Davidmi paicunapaj pushaj tucurca. Paihuanca 400 runacunami carca.
3 Chai qꞌuipaca Davidca chaimantaca Moabpi saquirij Mizpé llajtamanmi rirca. Chaipimi Moab llajtamanta reymanca: “Ñucamanta Dios imata ruragrishcata yachangacama ñuca yayatapish, ñuca mamatapish cancunahuan caipi saquirichun saquipai” nirca.
4 Davidca paicunataca Moab llajtamanta reyhuanmi saquirca. Davidpaj yaya mamaca David urcucunapi miticushpa puringacamami tucui tiempota chaipi saquirircacuna.
5 Asha tiempo qꞌuipaca profeta Gadca Davidtaca: “Urcucunapi miticushpaca ama saquirichu. Judapaj allpaman ri” nircami. Pai chashna nijpimi Davidca chaimanta rishpa Héret bosqueman yaicurca.
6 Saulca Davidtapish, paihuan caj runacunatapish ricushcatami yachaj chayarca. Chai noticiataca Guibeá lomapi tiyaj tamarisco yura ucupi Saúl tiyacujpimi huillarcacuna. Saulca paipaj maquipimi lanzata charicurca. Paita tucui sirvijcunapish paipaj muyundijpimi carcacuna.
7 Saulca paipaj muyundijpi caj paita sirvijcunataca cashnami nirca: “Benjaminpaj familiamanta runacuna, caita uyapaichij. ¿Jesepaj churi Davidca ñuca cushca shinallatajchu allpacunata, uva chagracunata cancunaman cunata yuyanguichij? ¿Cancunataca 1.000 gentecunata, 100 gentecunata pushajcuna cachun churana cashcatachu yuyanguichij?
8 ¡Tucui cancunami ñucapaj contraca tandanacushcanguichij! ¡Cancunamantaca ni maijan Jesepaj churihuan ñuca churihuan shuj ari ninacuita rurashcataca mana huillashcanguichijchu! Ñucataca ni pi mana llaquinguichijchu. Ñucata sirvij pacalla chapashpa llaquichichun ñuca propio churi ayudacushcatapish mana huillashcanguichijchu. Cunanllatajmi chashna tucushca” nircami.
9 Edomitacunapuramanta Doeg runami Saulta sirvijcunata pushaj carca. Paica cashna nishpami cutichirca: “Jesepaj churi Nob llajtaman chayashpa Ahitubpaj churi Ahimelecta ricunaman shamujtami ricurcani.
10 Shinallataj Ahimelecca Davidmantami Jehová Diosta tapurca, micunatapishmi curca. Filisteo Goliatpaj espadatapishmi paiman curca” nircami.
11 Chai ratomi rey Saulca sacerdote Ahitubpaj churi Ahimelectapish, paipaj yayapaj familiamanta caj tucui sacerdotecunatapish cayanaman cacharca. Paicunaca Nob llajtapimi carcacuna. Chaimantami tucui paicunaca rey maipi cashcaman rircacuna.
12 Chaimi Saulca: “¡Ahitubpaj churi, ñucata uyai!” nirca. Chashna nijpimi Ahimelecca: “Caipimi cani, ñuca amito” nishpa cutichirca.
13 Saulca: “¿Imamantataj canpish, Jesepaj churipish tandanacushpa ñucapaj contra canguichij? ¿Imamantataj paimanca tandatapish, shuj espadatapish curcangui? ¿Imamantataj Davidmantapish Diosta tapurcangui? Paica ñuca contrami can. Paica ñucata llaquichisha nishpami pacalla chapacun. Cunanllatajmi chashna tucushca” nircami.
14 Chaita uyashpaca Ahimelecca reymanca cashnami cutichirca: “¿David laya canta alli sirvij shujtaj runaca tiyanchu? Davidca reypaj yerno, canta cuidaj guardiacunata mandaj, cambaj huasipipish respetashcami can.
15 Ñucaca achca cutinmi Davidpaj shutipi Diosta tapurcani, mana cunanllachu tapushcani. ¡Ñucaca can ima nicushcataca mana nunca rurashachu! Ñuca amito, ñucatapish, ñuca yayapaj familiamanta cajcunatapish ni pita ama culpaichu. Tucui caicuna pasacushcataca mana yachashcanichu” nircami.
16 Chashna nijpimi reyca: “¡Ahimélec, canca huañunguimi! Canpish, cambaj yayapaj familiamanta cajcunapish tucuicunami huañunguichij” nirca.
17 Chashna nishpaca reyca paipaj muyundijpi caj guardiacunataca:* “¡Richij, Jehová Diospaj sacerdotecunata huañuchichij! ¡Paicunaca Davidpaj ladomi tucushcacuna! ¡Paicunaca David miticushpa puricushcata yachashpapish ñucamanca imata mana huillashcacunachu!” nircami. Pero reypaj guardiacunaca Jehová Diospaj sacerdotecunataca mana huañuchisha nircacunachu.
18 Rey Saulca edomitacunapuramanta Doeg runatami: “¡Canllataj rishpa huañuchigri!” nishpa mandarca. Chaimantami Doeg runallataj chai rato sacerdotecunata huañuchirca. Chai punllaca linomanta rurashca efodta churashca 85 runacunatami huañuchirca.
19 Shinallataj Doeg runaca sacerdotecunapaj Nob llajtapi causaj gentecunata, cꞌaricunata, huarmicunata, huahuacunata, llullu huahuacunata, torocunata, burrocunata, ovejacunatami huañuchirca.
20 Shinapish Ahimelecpaj churi Abiatarca miticushpa rishpami Davidhuan tandanacurca. Ahimelecca Ahitubpaj churimi carca.
21 Abiatarca Davidmanca: “Saulca Jehová Diospaj sacerdotecunatami huañuchishca” nircami.
22 . Chaita uyashpaca Davidca Abiatarmanca cashnami nirca: “Chaitaca yacharcanimi. Chai punllapi edomitacunapuramanta Doeg runata ricushpaca pai Saulman huillana cashcatami yacharcani. Cambaj yayapaj tucui familiata huañuchishcamantaca ñucami culpayuj cani.
23 Ñucahuan saquiri, ama manchaichu. Maijanpish canta huañuchisha* nijca ñucata huañuchisha nicuj shinallatajmi canga. Cantaca ñucami cuidasha” nircami.
