1 Samuel 23:1-29
23 Tiempo qꞌuipaca Davidmanca: “Filisteocunaca Queilá llajtatami llaquichicuncuna, shinallataj trillana pambacunapipish granocunatami shuhuacuncuna” nircacunami.
2 Chashna nijpimi Davidca Jehová Diostaca: “¿Filisteocunapaj contra macanacunaman llujshishachu?” nishpa tapurca. Chashna tapujpimi Jehová Diosca: “Ari, filisteocunapaj contra macanacunaman rishpa Queilá llajtapi causajcunata quishpichi” nirca.
3 Pero Davidpaj runacunaca paimanca: “Judá llajtapi cashparajmari ña manchaihuan canchij. ¡Queilá llajtapi filisteo soldadocunapaj contra macanacunaman rishpacarin yallitajmari manchashun!” nircacunami.
4 Cutinllatajmi Davidca Jehová Diosta tapurca. Chashna tapujpimi Jehová Diosca: “Jatari, Queilá llajtaman uriyai, chaipimi cambaj maquipi filisteocunataca entregasha” nishpa cutichirca.
5 Chaimi Davidca paihuan caj runacunahuan Queilá llajtaman rishpa filisteocunapaj contra macanacurca. Chaipica achcacunatami huañuchirca. Shinallataj paicunapaj huagracunata, ovejacunatami aparca. Chashnami Davidca Queilá llajtapi causajcunataca quishpichirca.
6 Ahimelecpaj churi Abiatarca Davidhuan tandanacungapajmi Queilá llajtaman miticushpa rirca. Paica shuj efodtami apashpa rirca.
7 Saulmanca: “Davidca Queilá llajtapimari” nishpami huillarcacuna. Chashna huillajpimi Saulca: “Diosmi ñucamanca Davidta entregashca.* Paillatajmari pungucunayuj, barracunayuj llajtaman yaicushca. Pero cunanca mana quishpiri tucunchu” nirca.
8 Chaimantami Saulca macanacungapaj, Queilá llajtaman uriyashpa Davidpaj, paihuan caj runacunapaj muyundijpi shayaringapaj paipaj tucui soldadocunata tandachirca.
9 Davidca Saúl paipaj contra imata ruragrishcata yachaj chayashpaca sacerdote Abiatartaca: “Efodta caiman apamui” nircami.
10 Chaimi Davidca cashna nirca: “Israelitacunapaj Jehová Dioslla, Queilá llajtaman Saúl shamusha nicujtami uyashcani. Ñuca culpamantami cai llajtataca tucuchigrin.
11 Israelitacunapaj Jehová Dioslla, canta sirvijman huillahuai. ¿Queilá llajtata pushajcunaca ñucataca Saulpaj maquipichu entregangacuna? ¿Canta sirvij uyashca shinatajchu Saulca ciertotaj caiman uriyamugrin?” nircami. Chashna nijpimi Jehová Diosca: “Ari, paica uriyagrinmi” nishpa cutichirca.
12 Shinallataj Davidca: “¿Ñucatapish, ñucahuan caj runacunatapish Queilá llajtata pushajcunaca Saulpaj maquipi entregangachu?” nishpami tapurca. Chashna tapujpimi Jehová Diosca: “Ari, entregangacunami” nirca.
13 Chai ratomi Davidca paihuan caj casi 600 runacunahuan Queilá llajtamanta llujshircacuna. Chashnami paicunaca miticushpa caiman chaiman puricurcacuna. David Queilá llajtamanta miticushpa rishcata Saúl yachaj chayashpaca paitaca ña mana catishpa rircachu.
14 Davidca chaquishca pambapi tiyaj maita mana chayai tucushca lugarcunapimi miticurca. Chai lugarca Zif chaquishca pambapi tiyaj urcucunapimi carca. Saulca Davidtaca cutin cutinmi mashcashpa catirca. Pero Jehová Diosca paipaj maquipica mana entregarcachu.
15 Hores lugarpi caj Zif chaquishca pambapi David cashpaca Saúl paita huañuchinaman* llujshishcatami yachaj chayarca.
16 Saulpaj churi Jonatanca Hores lugarpimi Davidta ricunaman rirca. Chaipimi paica Jehová Diospi ashtahuan confiachun Davidta ayudarca.
17 Shinallataj Jonatanca Davidmanca: “Ama manchaichu, ñuca yaya Saulca cantaca mana japingachu. Canmi Israelta mandangui, ñucaca cantami apoyasha. Chaitaca ñuca yaya Saulca allimi yachan” nircami.
18 Chashna nishpami Jehová Diospaj ñaupajpi ishquindij shuj ari ninacuita rurarca. Chai qꞌuipaca Jonatanca paipaj huasimanmi rirca. Cutin Davidca Hores lugarpimi saquirirca.
19 Asha tiempo qꞌuipaca Zifmanta runacunaca Guibeá llajtaman, Saúl maipi cashcamanmi huichiyarcacuna. Chaipimi Saulmanca paicunaca cashna nircacuna: “Davidca ñucanchij cꞌuchullapimi miticushca can. Davidca maita mana chayai tucushca Hores lugarpimi can. Chai lugarca Hakilá lomapi, Jesimón ura ladomanmi* can.
20 Ñucanchij reylla, can ima horas uriyamusha nishpaca uriyamuilla. Ñucanchijmi paitaca reypaj maquipi entregashun” nircacunami.
21 Chashna nijpimi Saulca cashna nishpa cutichirca: “Cancuna ñucata llaquishcamanta Jehová Dios cancunata bendiciachun.
22 Richij, pai maipi cashcata, pi ricushcata yachaj chayamugrichij. Pai yallitaj yachaj tucushca cashcatami ñucamanca huillashcacuna.
23 Mai lugarcunapi miticushca cashcata alli yachamugrichij. Pai maipi cashcata alli yachashpaca ñucapajman tigramunguichij. Ñucaca cancunahuanmi risha, pai cai llajtapi cajpica Judapaj familiacunapurapimi* paitaca mashcasha” nircami.
24 Chaimi paicunaca Saulta ñaupashpa Zif llajtaman rircacuna. Chaicamaca Davidpish, paihuan caj runacunapish Maón chaquishca pambapimi carcacuna. Maón chaquishca pambaca Arabá pugru pambapi, Jesimón ura ladomanmi can.
25 Chai qꞌuipaca Saulca paihuan caj runacunahuanmi Davidta mashcanaman shamurcacuna. David chaita yachashpaca Maón chaquishca pambapi saquirij jatun pata rumiman uriyashpami chaipi saquirirca. Saúl chaita yachaj chayashpaca Maón chaquishca pambapimi Davidta mashcai callarirca.
26 Saúl caishuj lado urcuman chayajpica Davidpish, paihuan caj runacunapish chai urcupaj caishuj ladopimi carcacuna. Saulpish, paihuan caj runacunapish Davidtaca ñallami japigrircacuna. Chaimantami Davidca paicunamanta miticushpa utca rirca.
27 Ashtahuanpish shuj huillaj shamushpami Saulmanca: “¡Filisteocunaca ñucanchij llajtatami llaquichicuncuna! ¡Utcami tigrana cangui!” nishpa huillarca.
28 Chaimi Saulca Davidta mashcanata saquishpa filisteocunahuan macanacunaman rirca. Chaimantami chai lugartaca Chꞌicanyachij Jatun pata rumi nishpa shutichincuna.
29 Chai qꞌuipaca Davidca chaimanta huichiyashpami En-Guedipi saquirij maita mana chayai tucushca lugarcunapi miticushpa saquirirca.
Notacuna
^ Hebreo rimaipica: “ñuca maquipi cꞌatushca” ninmi.
^ O “paipaj causaita quichunaman”.
^ Hebreo rimaipica: “alli ladomanmi” ninmi.
^ O “grupo familiacunapimi”.
