1 Samuel 24:1-22
24 Filisteocunahuan macanacushpa Saúl tigramujpimi: “Davidca En-Guedí chaquishca pambapimi can” nishpa huillarcacuna.
2 Chaimi Saulca tucui Israelmanta ashtahuan alli macanacunata yachaj 3.000 soldadocunata pushashpaca Davidtapish, paihuan caj runacunatapish mashcanaman rirca. Saulca paicunataca sacha chivocuna tiyan rumicunapimi mashcanaman rirca.
3 Chaimantaca Saulca ñan cꞌuchupi saquirij rumihuan rurashca ovejacunapaj corralcunamanmi chayarca. Chaipica shuj jutcumi tiyarca. Saulca bañota rurangapajmi chai jutcuman yaicurca. Chai jutcu ucujmanca Davidpish, paihuan caj runacunapishmi tiyacurcacuna.
4 Davidhuan caj runacunaca paimanca: “Cai punllami Jehová Diosca cambaj contrataca cambaj maquipi entregacun. Paihuanca cambaj ima alli cashcatami rurai tucungui” nircacunami. Chaimantami Davidca allimantalla jatarishpa Saulpaj sin mangas churana filota pꞌitirca.
5 Chai qꞌuipaca Davidca Saulpaj sin mangas churana filota pꞌitishcamantami paipaj shungupica* mana alli sintirirca.
6 Davidca paihuan caj runacunamanca: “Ñuca amitotaca mana imata rurai tucunichu. Paitaca Jehová Diosmari agllarca. Jehová Dios ima shina yuyashcata yachashpaca maitataj Jehová Dios agllashcapaj jahuapica ñuca maquita churanallatapish yuyashayari” nircami.
7 Chashna nishpami Davidca paihuan caj runacunataca Saulta ama llaquichichun jarcarca. Cutin Saulca jutcumanta llujshishpami pai ricushca ñanta rircalla.
8 Chaimi Davidca jatarishpa jutcumanta llujshishpaca: “¡Ñuca amito reylla!” nishpa Saulta caparirca. Chashna caparijpimi Saulca huashaman tigra ricushpaca David pambacama cumurishpa cungurijta ricurca.
9 Davidca Saultaca cashna nishpami tapurca: “¿‘Davidca cantami llaquichisha nin’ nijcunataca imamantataj uyangui?
10 Can jutcupi cajpica Jehová Diosmi cantaca ñuca maquipi curca. Chaitaca cambaj ñahuicunallahuantajmi cunan ricui tucungui. Ñucahuan caj runacunaca cantaca huañuchichun nircacunami. Pero ñucaca canta llaquishpami: ‘Paica Jehová Dios agllashcami can. Maitataj ñuca maquitaca ñuca amopaj jahuapi churashari’ nirircani.
11 Ñuca yayitulla, ricui, cambaj sin mangas churana filota pꞌitishcatami ñuca maquipi charicuni. Sin mangas churanata pꞌiticushpaca cantami huañuchi tucurcani. Pero mana huañuchircanichu. Cunanmi canllataj ricushpa cuentata cui tucungui. Ñucaca cantaca mana llaquichisha ninichu. Ashtahuanpish cantami cazusha nini. Cambaj contraca ñucaca ima juchata mana rurashcanichu. Pero canca ñucata huañuchingapajmi mashcashpa caticungui.
12 Ñucanchijmanta Jehová Dios maijan allita ruracushcata juzgachun. Jehová Diosllataj cantaca castigachun. Shinapish ñucaca ñuca maquitaca cambaj jahuapi churanallatapish mana yuyanichu.
13 Ñaupa rimaipi nishca shinaca ‘Mana allicunamantaca mana allimi llujshin’. Chaimantami ñuca maquitaca cambaj jahuapica mana churasha.
14 ¿Israel llajtamanta reyca pitataj japisha ninyari? ¿Pitataj canca caticunguiyari? ¿Pitaj ñucaca caniyari? Ñucaca shuj huañushca allcu shina, shuj piqui shinallamari cani.
15 Ñucanchijmanta Jehová Dios maijan allita ruracushcata juzgachun. Paimi ñucahuan ima tucushcata ricushpa difindinga. Paimi cashcata rurashpa ñucata cambaj maquicunamanta quishpichinga” nircami.
16 David chai shimicunata nishpa tucuchincami Saulca: “Ñuca huahua David, ¿canchu parlacungui?” nishpa tapurca. Chashna tapushpami Saulca sinchita huacai callarirca.
17 Chashna huacashpami Davidmanca: “Canca ñucata yalli cashcata rurajmi cangui. Canca ñucahuanca allimi cashcangui. Shinapish ñucaca cantaca mana allita rurashpami tratashcani.
18 Cunan chashna nishpaca canca ñucapaj allita rurashcatamari ricuchishcangui. Jehová Diosca ñucataca cambaj maquipimi entregashca. Pero canca ñucataca mana huañuchircanguichu.
19 ¿Maijantaj paipaj contrahuan tupashpaca imatapish mana rurashpa richunlla saquinyari? Cunan ñucamanta can imata rurashcamantaca canta Jehová Dios bendiciachun.
20 Ricui, canca reymi tucugringui. Israel llajtata mandanaca siempremi cambaj maquipi canga. Chaitaca cunanmi alli yachani.
21 Cunanca ñuca huañujpi ñuca huahua huahuacunata can mana tucuchina cashcata Jehová Diospaj shutipi jurai. Ñuca yayapaj familiamantapish ñuca shutita mana anchuchina cashcata jurai” nircami.
22 Chaitami Davidca Saulman jurarca. Chai qꞌuipaca Saulca paipaj huasimanmi tigrarca. Cutin Davidca paihuan caj runacunahuanmi miticuna lugarman huichiyarcacuna.
Notacuna
^ O “yuyaipica”.
