1 Samuel 25:1-44
25 Tiempo qꞌuipaca Samuelca huañurcami. Chaimantami tucui israelitacuna Samuel huañushcamanta tandanacushpa huacarcacuna. Shinallataj paitaca Ramá llajtapimi pambarcacuna. Chai llajtapimi paipaj huasica carca. Davidca Parán chaquishca pambamanmi uriyarca.
2 Maón llajtapica shuj charij runami tiyarca. Paica Carmelo* llajtapimi huagracunata, ovejacunata, chivocunata charirca. Paica 3.000 ovejacunata, 1.000 chivocunatami charirca. Chai punllacunapica chai runaca Carmelo llajtapimi ovejacunata rutucurca.
3 Chai runaca Calebpaj familiamanta Nabal shutimi carca. Paipaj huarmica Abigaíl shuti, alli yuyaiyuj, sumaj huarmimi carca. Pero paipaj cusaca maipishcachun trataj, millai cosascunata rurajmi carca.
4 Davidca chaquishca pambapi cashpaca Nabal runa paipaj ovejacunata rutucushcatami yachaj chayarca.
5 Davidca paipaj chunga runacunamanca cashnami nirca: “Carmeloman huichiyashpa Nabalta mashcaichij. Paitaca ñuca partemanta, ¿allillachu cangui? nishpa tapuichij.
6 Shinallataj caitapish ninguichij: ‘Achca huatacunata causangui. Canpish, cambaj huasipi cajcunapish, can tucui imalla charishca cosascunahuanpish allilla* causachunmi munani.
7 Ovejacunapaj millmata can rutucushcatami uyashcani. Cambaj michijcuna ñucanchijhuan cajpica ñucanchijca paicunataca mana llaquichircanchijchu. Paicuna Carmelopi tucui tiempota cajpica paicunataca ni pi imata mana quichurcacunachu.
8 Cambaj runacunata tapuilla, paicunami ima shina cashcataca canman huillangacuna. Ñucanchijca achca cushicui tiyai punllapimi shamushcanchij. Chaimanta ñuca cachashca runacunata alli chasquichunmi rogapani. Canta sirvijcunaman, cambaj churi Davidmanpish can imata cui tucushcata cuchunmi mañapani’ ninguichij” nircami.
9 Chaimi Davidpaj runacunaca Carmeloman huichiyashpa David imallata huillachun cachashcata Nabalman huillarcacuna. Paicuna chai huillaita huillashpa tucuchijpica,
10 Nabalca Davidta sirvijcunamanca cashnami nirca: “¿Chai Davidca pitaj can? ¿Jesepaj churica pi cashcatataj yuyan? Cunan punllacunapica achca sirvijcunaca paicunapaj amocunamantami miticushpa rincuna.
11 ¿Ñuca ovejacunata rutuj runacunapaj ñuca tandata, ñuca yacuta, allichishca aichatapish maitataj maimanta shamuj runacunamanca cushayari?” nircami.
12 Davidpaj runacuna tigrashpaca Nabal imalla nishcacunatami paiman tucuita parlarcacuna.
13 Chai ratomi Davidca paita sirvij runacunataca: “¡Cada uno cancunapaj espadata japichij!” nishpa mandarca. Chashna nijpimi tucuicuna paicunapaj espadata cinturapi huatarircacuna. Davidpish chaillatatajmi rurarca. Paihuanca casi 400 runacunami huichiyarcacuna. Cutin casi 200 runacunaca paicuna charishca cosascunatami cuidashpa saquirircacuna.
14 Chaicamaca Nabalta sirvijcunamanta shuj sirvijca Nabalpaj huarmi Abigailmanca cashnami nirca: “Ricui, chaquishca pambamantami Davidca ñucanchij amota bendiciachun huaquin huillajcunata cacharca. Pero ñucanchij amoca paicunatami caparishpa cꞌamirca.
15 Chai runacunaca ñucanchijtaca allimi tratarcacuna. Paicunaca mana llaquichircacunachu. Ñucanchij paicunahuan campocunapi cajpica ñucanchijtaca chai tucui tiempopi ni pi imata mana quichurcacunachu.
16 Paicunaca punllapish, tutapish ñucanchijpajca shuj pirca shinami carcacuna. Ovejacunata michicujpipish tucui tiempotami ñucanchijta cuidarcacuna.
17 Cunanca can imata ruragrishcata decidi. Ñucanchij amopajpish, paipaj huasipi tucui cajcunapajpish shuj jatun llaquimari tiyagrin. Ñucanchij amoca maipishcachun trataj,* paihuanca mana parlai tucuipajmari can” nircami.
18 Chai ratomi Abigailca 200 tandacunata, ishqui jatun jarra vinota, yanungapaj allichishca pichca ovejacunata, pichca saco* camchashca granota, chaquishca uvacunahuan rurashca 100 tortacunata, higocunata llapishpa rurashca 200 tortacunata japishpa tucuita burrocunapaj jahuapi apachirca.
19 Chaimi Abigailca paita sirvijcunamanca: “Cancunaca ñaupashpa richij, ñucaca ñami catimusha” nirca. Pero paipaj cusa Nabalmanca imata mana huillarcachu.
20 Abigaíl burropi montashpa ni pi mana ricuipaj urcu urita shamucujpimi Davidpish, paihuan caj runacunapish chai urcu caishuj lado urita uriyamucurcacuna. Chaimantami paicunaca Abigailhuan tupanacurcacuna.
21 Davidca cashnami nicushca carca: “Ñucaca chaquishca pambapimi chai runa tucui imalla charishca cosascunataca cuidarcani. Pero chashna cuidashcaca imapaj mana sirvishcachu. Paitaca ni pi imata mana quichurcachu. Paipaj allita rurajpipish, paica mana allita rurashpami ñucamanca tigrachin.
22 Caya tutamantapaj paipaj tucui runacunatapish ñuca mana huañuchijpica, Diosllataj ñuca contracunata* sinchita castigachun” nicurcami.
23 Abigailca Davidta ricushpaca chai ratomi burromanta uriyashpa Davidpaj ñaupajpi pambacama cumurishpa cungurirca.
24 Shinallataj paica Davidpaj chaquicunapi urmashpami cashna nirca: “Ñuca amito, ñucata culpahuai. Canhuan parlachunpish saquihuai. Canta sirvijpaj shimicunata uyahuai.
25 Ñuca amito, Nabal ima nishcataca ama uyahuaichu. Paica paipaj shuti imata nisha nishca shinallatajmi maipishcachun trataj runa can. Paica Nabal* shutimi can, yuyai illaj runami can. Pero canta sirvij ñucaca, ñuca amito cachashca runacunataca mana ricurcanichu.
26 Ñuca amito, cunanca Jehová Diospaj shutipi, cambaj shutipimi jurani. Jehová Diosmi cambaj propio maquillahuantaj ama tigra llaquichichun, yahuarta jichashpa ama culpayuj tucuchunpish jarcacun. Cambaj contracunapish, canta llaquichisha nijcunapish Nabal shina tucuchun.
27 Cunanca ñuca amito, canta sirvij apamushca cai regalota* canhuan caj runacuna japichun saquihuai.
28 Canta sirvij imapi pandarishca cajpica perdonahuai. Ñuca amito, cambaj huahua huahuacuna achca tiempota reycuna shina mandachun Jehová Dios saquina cashcataca allimi yachani. Canca Jehová Diospaj macanacuicunatami macanacungui. Shinallataj cambaj tucui causaipica ima mana allitaca mana rurashcanguichu.
29 Ñuca amito, maijanpish canta catirashpa huañuchisha* nijpica, ima shinami valishca cosascunata shuj bolsapi pilluchishpa huaquichinchij, chashnallatajmi cambaj causaitapish Jehová Diosca huaquichinga. Pero huaracapi rumita churashpa caruta shitaj shinami cambaj contracunapaj causaitaca caruta shitanga.
30 Jehová Dios canman tucui alli cosascunata cusha nishcata pajtachijpi, Israel llajtapi mandaj cachun churajpica,
31 cambaj shungupi nanarishpa mana arrepintiringuichu. Cambaj propio maquillahuantaj tigra llaquichishcamanta, mana culpata charijcunapaj yahuarta jichashpa culpayuj tucushcamantapish mana arrepintiringuichu. Ñuca amito, Jehová Dios canta bendiciajpica canta sirvijmanta yuyaringui” nircami.
32 Chashna nijpimi Davidca Abigailmanca: “¡Cai punlla ñucahuan tupachun canta cachashcamanta israelitacunapaj Jehová Diosca alabashca cachun!
33 ¡Can alli yuyaiyuj cashcamantaca alabashcami cangui! Can jarcashcamantami ñuca propio maquillahuantaj mana tigra llaquichishcani. Yahuartapish jichashpa mana culpayuj tucushcani. Chaimanta Dios canta bendiciachun.
34 Can chai rato ñucahuan parlanaman mana shamushca cajpica Nabalpaj runacunaca shujllapish pacarinapajca causaihuan mana saquirinmanchu carca. Chaitaca israelitacunapaj causaj Jehová Diospaj shutipimi jurani. Paillatajmi cantapish ama llaquichichu ñucata jarcashca” nircami.
35 Davidca Abigaíl apamushcacunata chasquishpami: “Tranquila huasiman rilla, can ima nishcatami uyashcani. Can imata rurachun mañashcatapishmi rurasha” nirca.
36 Chai huashaca Abigailca Nabal runapajmanmi tigrarca. Nabalca paipaj huasipi shuj rey jatun micuita ruraj shinami ruracushca carca. Paica achca machashca cashcamantami yallitaj cushilla carca. Chaimi Abigailca pacaringacama imata mana nirca.
37 Cayandij punlla Nabal machai cacharirijpimi paipaj huarmica tucui imalla pasashcata parlarca. Chaita uyashpami Nabalpaj shunguca huañushca shina saquirirca. Paipaj cuerpopish sinchi rumi shinami saquirirca.
38 Chunga punllacuna qꞌuipaca Jehová Diosmi Nabalta huañuchun saquirca.
39 Davidca Nabal huañushcata yachaj chayashpaca: “¡Jehová Diosca alabashca cachun! Nabalca ñucatami humillarca. Pero Jehová Diosca difindircami. Paica ñuca ima mana allita rurachunmi jarcarca. Shinallataj Nabal mana allita rurashcataca Diosca paipajllamantajmi tigrachishca” nircami. Chai qꞌuipaca Davidca paihuan cazarachun nishpami shuj huillaita Abigailman cacharca.
40 Davidta sirvijcunaca Carmelo llajtaman chayashpami Abigailmanca: “Davidca canhuan cazarasha nishpami ñucanchijta canta mashcachun cacharca” nircacuna.
41 Chashna nincami Abigailca pambacama cumurishpa: “Cambaj esclava tucungapaj, canta sirvij cangapajca caipimi cani. Shinallataj ñuca amitota sirvijcunapaj chaquicunata maillangapajmi caipi cani” nirca.
42 Abigailca chai rato jatarishcahuanmi paipaj burropi montashpa rirca. Paitaca paipaj pichca sirvij huarmicunami chaquillahuan catishpa rircacuna. Paicunaca David cachashca huillajcunata compañashpami rircacuna. Chashnami Abigailca Davidpaj huarmi tucurca.
43 Davidca Jezreel llajtamanta caj Ahinoam huarmihuanpishmi cazarashca carca. Chashnami ishquindij Davidpaj huarmi carcacuna.
44 Shinapish Saulca paipaj ushushi Micaltaca Galim lugarmanta Laispaj churi Paltí runahuanmi cazarachishca carca. Micalca Davidpaj huarmimi carca.
Notacuna
^ Caica Judapi saquirij shuj llajtami can. Cai llajtaca Carmelo urcuhuanca mana igualchu can.
^ O “tranquilo”.
^ O “imapajpish mana valij”.
^ Hebreo rimaipica: “5 seas” ninmi. Ayuda B14-ta ricui.
^ Caitaca “Davidta” nishpapishmi traducishcacuna.
^ “Nabal” shutica ‘yuyai illaj’, ‘upa’ nisha ninmi.
^ Hebreo rimaipica: “bendicionta” ninmi.
^ O “cambaj causaita quichusha”.
