1 Samuel 27:1-12
-
Filisteocunaca Davidmanmi Ziclag llajtata cuncuna (1-12)
27 Pero Davidca paipaj shungupica: “Ima horaca Saulpaj maquipimi huañusha. Chaimanta filisteocunapaj allpaman miticushpa rinami alli canga. Chaiman rijpimi tucui Israel allpapi Saulca ñucata mashcanata saquinga. Paipaj maquipi urmanamantapishmi quishpirisha” nircami.
2 Chashna yuyashpami Davidpish, paihuan caj 600 runacunapish Akís maipi cashcaman rircacuna. Akisca Gat llajtata mandaj Maoc runapaj churimi carca.
3 Davidpish, paihuan caj runacunapish cada unomi paicunapaj familiahuan Gad llajtapi rey Akís runahuan saquirircacuna. Davidtaca paipaj ishqui huarmicunami compañarca. Paicunamanta shujca Jezreel llajtamanta Ahinoam huarmimi carca. Cutin caishujca carmelitacunapuramanta Abigaíl huarmimi carca. Abigailca Nabalmantami viuda saquirishca carca.
4 David Gad llajtaman miticushpa rishcata huillajpimi Saulca paita mashcanata saquirca.
5 Davidca rey Akismanca: “Cambaj alli cajpica uchilla ciudadcunamanta maipi ñuca causangapaj shuj lugarta cuhuai. ¿Ñuca, canta sirvijca imamantataj mandajcunapaj llajtapi canhuan causashayari?” nircami.
6 Chai punllami rey Akisca Ziclag llajtata Davidman curca. Chaimantami Ziclag llajtaca cunan punllacunacama Judá llajtamanta reycunapaj llajta can.
7 Davidca filisteocunapaj shuj uchilla ciudadpica shuj huata, chuscu quillacunatami causarca.
8 Davidpish, paihuan caj runacunapish guesuritacunata, guirzitacunata, amalequitacunata llaquichinamanmi llujshijcuna carca. Paicunaca Telam lugarmantaca Sur shuti allpacamami causajcuna carca. Shinallataj Egipto lindecunacamami paicunaca causajcuna carca.
9 David chai llajtacunata llaquichishpaca ni shuj cꞌaritapish, ni shuj huarmitapish causajtaca mana saquijchu carca. Pero paicunapaj ovejacunata, huagracunata, burrocunata, camellocunatami apashpa rij carca. Shinallataj paicunapaj ropacunatapishmi apashpa rij carca. Qꞌuipaca rey Akís maipi cashcamanmi tigraj carca.
10 Chaimi rey Akisca Davidtaca: “¿Canca ima ladocunatataj cunanca llaquichimungui?” nishpa tapuj carca. Chashna tapujpimi Davidca: “Judá ura ladotapish”, “Jerahmeelitacunapaj allpa ura ladotapish”,* “Quenitacunapaj allpa ura ladotapishmi llaquichimuni” nishpa cutichij carca.
11 Shujllatapish Gad llajtaman ama apashca cachunmi Davidca tucui cꞌaricunata, huarmicunata huañuchirca. Paica: “Ñucanchijmanta ama pi parlachun, ‘Davidca caita chaitami rurarca’ nishpa ama huillachun” nishpami tucuicunata huañuchirca. (Davidca filisteocunapaj uchilla ciudadpi tucui tiempota causacushpami chashna rurarca).
12 Akisca David ima nishcata crishpami: “Cunanca paipaj pueblo Israelca paitaca pꞌiñangacunami.* Chaimantami paica siempre ñucata sirvij canga” nishpa yuyaj carca.
