1 Samuel 29:1-11
-
Filisteocunaca Davidpi mana confiancunachu (1-11)
29 Filisteocunaca Afec llajtapimi tucui grupo soldadocunata tandachircacuna. Chaicamaca israelitacunaca Jezreelpi tiyaj pugyu yacu cꞌuchupimi carpa huasicunapi saquiricurcacuna.
2 Filistea llajtata mandajcunaca paicunapaj huaquin 100 grupo soldadocunahuan, huaquin 1.000 grupo soldadocunahuanmi ricurcacuna. Cutin Davidpish, paipaj runacunapish filisteo soldadocunapaj huashatami Akishuan caticurcacuna.
3 Pero Filistea llajtata mandajcunaca: “¿Cai hebreocunaca caipica imatataj ruracuncuna?” nishpami tapurcacuna. Chaimi Akís runaca: “Paica Israelta mandaj rey Saulta sirvij Davidmi can. Ñucahuanca ñami huata yallita can. Israelta mandaj rey Saulta saquishca punllamantami ñucahuan cashca. Paipica ima mana allitaca mana ricushcanichu” nishpa cutichirca.
4 Shinapish Filistea llajtata mandajcunaca Akís runahuan pꞌiñarishpami cashna nircacuna: “Chai runata caimanta richun ni. Can cushca lugarman tigrachun saqui. Ñucanchijhuan macanacunaman richunca paitaca ama saquichu. Ñucanchijhuan macanacucushpaca paica ñucanchijpaj contrami tucunga. ¿Manachu paica ñucanchij runacunapaj umacunata apashpaca paipaj amopaj ñaupajpi alli ricurinata munanga?
5 ¿Manachu cai Davidmantaca bailashpa, cantashpaca:
‘Saulca mil gentecunatami huañuchishca,cutin Davidca diez mil gentecunatami huañuchishca’ nishpa cantarcacuna?” nircacunami.
6 Akisca Davidta cayashpaca cashnami nirca: “Jehová Diospaj shutipimi jurani. Canca ñucapajca cashcata ruraj runami cangui. Ñuca soldadocunahuan tandalla macanacunaman ricushcamantami cushilla cani. Ñucapajman shamushca punllamantami canpica ima mana allitaca mana ricushcani. Pero caishuj mandajcunaca canpica mana confiancunachu.
7 Shinaca tranquilo tigrailla. Filistea llajtata mandajcunata pꞌiñachingapajca ama imatapish rurangui” nircami.
8 Ashtahuanpish Davidca Akistaca: “Pero ¿ñucaca imatataj rurashcani? Canhuan tandanacushca punllamantaca, ¿canta sirvij ima mana allita rurashcataca japishcanguichu? Ñuca amito reylla, ¿cambaj contracunahuan macanacungapajca imamantataj ñucaca canhuan mana ri tucuni?” nircami.
9 Chashna nijpimi Akisca Davidmanca cashna nishpa cutichirca: “Canca ñucapajca Diospaj shuj ángel shina yallitaj allimari cashcangui. Pero Filistea llajtamanta mandajcunaca ‘Paitaca ñucanchijhuan macanacunaman richunca ama saquichu’ nishcacunami.
10 Shinaca caya tutamantaca canpish, canhuan shamuj cambaj amota sirvijcunapish utca jataringuichij. Ña pacarimucujpica ringuichijlla” nircami.
11 Davidpish, paipaj runacunapish filisteocunapaj allpaman tigrangapajmi utca jatarishpa rircacuna. Cutin filisteocunaca Jezreel llajtamanmi huichiyarcacuna.
