1 Samuel 3:1-21
-
Samuelta profeta cachun agllashcamanta (1-21)
3 Huahua Samuelca Elita ayudashpami Jehová Diosta sirvij carca. Chai punllacunapica Jehová Dios rimashcatapish ña mana uyajcunachu carca. Muscuipi shina ricushcacunatapish ña mana huillajcunachu carca.
2 Shuj punllaca Elica paipaj camapimi dormicurca (paipaj ñahuipish ña mana ricui tucushcamantami imata mana ricui tucurca).
3 Diospaj lamparaca manaraj huañuchishcachu carca. Samuelpish Jehová Diospaj huasipimi* dormicurca. Chaipimi Diospaj Arcapish carca.
4 Jehová Diosca Samueltami cayarca. Chashna cayajpimi Samuelca: “Caipimi cani” nishpa cutichirca.
5 Qꞌuipaca Samuelca Elipajman callpashpa rishpami: “Amito, caipimi cani, ¿canchu cayarcangui?” nirca. Pero Elica Samueltaca: “Ñucaca mana cayarcanichu. Cutin dormigrilla” nircami. Chashna nijpimi Samuelca chaimanta rishpa cutin dorminaman tigrarca.
6 Cutinllatajmi Jehová Diosca: “¡Samuel!” nishpa cayarca. Chaimi Samuelca jatarishpa Elí maipi cashcaman rishpaca: “Amito, caipimi cani, ¿canchu cayarcangui?” nirca. Pero Elica Samueltaca: “Ñuca huahualla, ñucaca mana cayarcanichu. Cutin dormigrilla” nircami.
7 (Samuelca Jehová Diostaca manaraj alli rijsishcachu carca. Jehová Diosmanta ima huillaitapish manaraj chasquishcachu carca).
8 Caihuanca quimsa cutinmi Jehová Diosca: “¡Samuel!” nishpa cayarca. Chaimi Samuelca jatarishpa, Elí maipi cashcaman rishpaca: “Caipimi cani, ¿canchu cayarcangui?” nirca.
Chashna nijpimi Elica Jehová Dios huahuata cayacushcata cuentata curca.
9 Elica Samueltaca: “Ri, dormigrilla, canta cutin cayajpica cashna ningui ‘Jehová Dios, canta sirvijca uyacunimi, huillailla’ ningui” nircami. Chaimi Samuelca chaimanta rishpa cutin dorminaman tigrarca.
10 Cutinllatajmi Jehová Diosca shujtaj cutincuna shina: “¡Samuel, Samuel!” nishpa cayarca. Chashna cayajpimi Samuelca: “Huillailla, canta sirvijca uyacunimi” nishpa cutichirca.
11 Chaimi Jehová Diosca Samueltaca: “Ricui, Israelpi ñuca imata ruragrishcata maijanpish uyashpaca mancharingacunami.
12 Chai punllami Elitapish, paipaj familiatapish* ñuca imata rurasha nishcataca callarimanta tucuringacama tucuita pajtachisha.
13 Elica paipaj churicuna millaita rurashpa Diosta mana respetacushcataca allimi yachan. Shinapish paica imata mana rurashcachu. Elí chaita yachashca jahua imata mana rurashcamanta paipaj familiata ñuca huiñaipaj juzgagrishcata huillai.
14 Chaimantami Elipaj familia sacrificiocunata, ofrendacunata cujpipish paicuna juchata rurashcamantaca manataj perdonashca canga nishpa jurashcani” nircami.
15 Samuelca pacaringacamami dormishpa saquirirca. Chaimi paica Jehová Diospaj huasi pungucunata pascarca. Samuelca muscuipi shina imallata ricushcata Eliman huillanataca mancharcami.
16 Pero Elica Samuelta cayashpaca: “¡Samuel, ñuca churilla!” nircami. Chashna nijpimi paica: “Caipimi cani” nishpa cutichirca.
17 Elica: “¿Imatataj nirca? Ñucaman imata ama pacahuaichu. Dios tucui canman nishcacunamanta shuj palabrallatapish pacajpica paillataj cantaca sinchita castigachun” nishpami tapurca.
18 Chaimi Samuelca imata mana pacashpa tucuita huillarca. Elica: “Caica Jehová Diospaj munaimi can. Paipaj alli cajpica* chaita rurachunlla” nircami.
19 Samuelca huiñashpami catirca. Jehová Diosca Samuelhuanmi carca. Samuel nishca shimicunataca Diosca tucuitami pajtachirca.
20 Danmanta Beer-Sebacama tucui israelitacunami Jehová Dios Samuelta paipaj profeta cachun agllashcata intindircacuna.
21 Jehová Diosca Siló llajtapimi Samuelmanca muscuipi shina ricurishpa catirca. Siló llajtapimi Jehová Diosca Samuelmanca pai pi cashcata rijsichirca. Chaitaca Jehová Diosca paipaj rimachishcahuanmi rijsichirca.
Notacuna
^ Caipica Diospaj carpa huasimantami parlacun.
^ Hebreo rimaipica: “huasitapish” ninmi.
^ O “Paipaj ñahuipi alli cajpica”.
