1 Samuel 30:1-31
30 Quimsa punlla tucujpica Davidpish, paipaj runacunapishmi Ziclag llajtaman chayarcacuna. Chaipimi paicunaca chai llajtata tucuchishcata, rupachishcata japircacuna. Amalequitacunami Négueb llajtatapish,* Ziclag llajtatapish llaquichishcacuna carca.
2 Amalequitacunaca huarmicunata, chai llajtapi tucui causajcunatami uchillacunamanta jatuncunacama apashcunaca carca. Paicunamantaca ni pita mana huañuchishpami paicunahuan aparcacuna.
3 Chai llajtaman chayashpaca Davidpish, paihuan caj runacunapish Ziclag llajtata ninahuan japichishcatami ricurcacuna. Shinallataj paicunapaj huarmicunatapish, churicunatapish, ushushicunatapish prezu shina apashcatami ricurcacuna.
4 Chaita ricushpami Davidpish, paihuan caj runacunapish yallitaj huacai callarircacuna. Fuerza illaj saquiringacama huacashcamantami ña mana ashtahuan huacai tucurcacuna.
5 Davidpaj ishqui huarmicunatapishmi apashcacuna carca. Shujca Jezreel llajtamanta Ahinoam huarmimi carca. Cutin caishujca Abigailmi carca. Abigailca Nabalmantami viuda saquirishca carca. Nabalca carmelitacunapuramantami carca.
6 Davidca yallitaj llaquillami carca. Paihuan caj runacunaca paicunapaj churicunata, ushushicunata apashcamantami yallitaj llaquilla carcacuna. Chaimantami Davidta rumicunahuan shitangapaj parlanacurcacuna. Pero Davidca paipaj Jehová Diosta mashcashpami animota japirca.
7 Shinapish Davidca Ahimelecpaj churi sacerdote Abiatartaca: “Efodta apamupai” nircami. Chaimi Abiatarca efodta apamurca.
8 Davidca Jehová Diostaca: “¿Chai achca shuhuacunata catishpa rishachu? ¿Paicunataca cati japishachu?” nishpami tapurca. Chaimi Diosca: “Paicunata catishpa rilla, paicunata cati japishpaca cutinmi tucuita tigra japingui” nishpa cutichirca.
9 Chai ratomi Davidpish, paihuan caj 600 runacunapish rircacuna. Paicunaca Besor pugru pambamanmi chayarcacuna. Chaipimi huaquin runacuna saquirircacuna.
10 Davidca paihuan caj 400 runacunahuanmi chai achca shuhuacunata catishpa rirca. Cutin 200 runacunaca yallitaj shaicushca cashcamantami mana chꞌimbashpa Besor pugru pambapi saquirircacuna.
11 Davidhuan caj runacunaca campopimi Egipto llajtamanta shuj runata ricurcacuna. Paitaca Davidpajman apashpami micunata, yacuta curcacuna.
12 Shinallataj chaquishca uvacunahuan rurashca ishqui tortatapish, higocunata llapishpa rurashca shuj pedazo tortatapishmi curcacuna. Chaita micushpami chai runaca fuerzasta japirca. Paica quimsa punllata, quimsa tutatami imata mana micushca carca, imata mana ubyashca carca.
13 Chaipimi Davidca: “¿Maimantataj cangui? ¿Cambaj amoca pitaj can?” nishpa tapurca. Chashna tapujpimi paica: “Egipto llajtamanta sirvij runami cani, shuj amalequitapaj esclavomi cani. Quimsa punllacuna huashaman ñuca ungujpimi ñuca amoca ñucata shitashpa rirca.
14 Ñucanchijmi keretitacunapaj ura lado allpata, Judapaj allpata, Calebpaj ura lado allpata llaquichircanchij. Shinallataj Ziclag llajtatapish ninahuanmi japichircanchij” nircami.
15 Chaita uyashpami Davidca: “¿Chai achca shuhuacuna maipi cashcaman ñucata pushai tucunguichu?” nishpa tapurca. Chashna tapujpimi paica: “Ñucata mana huañuchina cashcata, ñuca amomanpish mana entregana cashcata Diospaj shutipi jurai” nishpa cutichirca.
16 Chashna nishpami chai runaca shuhuacuna maipi cashcaman Davidta pushashpa rirca. Chaipica chai shuhuaj runacunaca tucui campopimi micushpa, ubyashpa tiyacurcacuna. Paicunaca filisteocunapaj allpamanta, Judapaj allpamanta quichushca cosascunata achcata apamushcamantami cushicucurcacuna.
17 Davidca paicunatami llaquichirca. Shinallataj paicunahuanmi tutamantamantaca cayandij punlla chishiyangacama macanacucurca. Shujllapish mana miticushpa ri tucurcachu, camellocunapi montashpa rij 400 runacunallami quishpirircacuna.
18 Davidca amalequitacuna apashca tucui cosascunatami cutin tigra quichumurca. Paipaj ishqui huarmicunatapishmi tigrachimurca.
19 Pipish mana illarcachu, uchillacunamanta jatuncunacamami tucui chaipi carcacuna. Paicunapaj churicunatapish, paicunapaj ushushicunatapish tucui paicuna imalla charishca cosascunatapishmi cutin japircacuna. Davidca shuhuacuna tucui apashcatami cutin japirca.
20 Ashtahuanpish Davidca tucui ovejacunata, tucui vacacunatami quichushpa paipaj japirca. Shinallataj paihuan caj runacunaca paicunapaj propio animalcunapaj ñaupajtami chai quichushca tucui ovejacunata, tucui vacacunataca apashpa rircacuna. Paicunaca: “Caica David quichushca cosascunami can” nircacunami.
21 Chaimi Davidca 200 runacuna maipi cashcaman rirca. Paicunaca yallitaj shaicushca cashcamantami Davidta mana compañashcacuna carca. Chaimantami paicunaca Besor pugru pambapi saquirishcacuna carca. Chai runacunaca Davidtapish, paihuan shamuj runacunatapish tupanamanmi llujshircacuna. Paicuna Davidpajman cꞌuchuyajpica Davidca paicuna ima shina cashcatami tapurca.
22 Pero Davidhuan rij runacunapurapica huaquin runacunaca millai, imapajpish mana valij runacunami tiyarca. Chai runacunaca: “Paicunaca ñucanchijhuanca mana rircacunachu. Chaimanta ñucanchij apamushca cosascunamantaca imatapish paicunamanca mana cushunchu. Paicunamanca cada unoman paipaj huarmita, paipaj churicunallatami cushun. Paicunata pushashpa caimanta richun” nircacunami.
23 Pero Davidca cashnami nirca: “Ñuca huauquicunalla, Jehová Dios ñucanchijman cushca cosascunahuanca chaita ama ruraichijchu. Paimi ñucanchijtaca cuidarca. Llaquichij shuhuajcunatapish paica ñucanchij maquipimi curca.
24 ¿Cancuna chashna nishcahuanca maijantaj de acuerdo cangayari? Macanacuiman uriyajcunapish, cancunapaj cosascunata cuidangapaj saquirijcunapish tucuicunami chaillatataj japingacuna. Tucuimi igual chaupishca canga” nircami.
25 Davidca chai punllamantami pai nishca shimicuna shuj mandashca cachun churarca. Qꞌuipamanca chai mandashcaca Israelpica shuj leymi tucurca. Cashnami cunan punllacunacama can.
26 Davidca Ziclagmanmi tigrarca. Pai chaiman tigrashpaca quichushca cosascunamanta shuj partetami Judamanta paipaj amigo pushajcunaman* cacharca. Chashna cachashpaca: “Jehová Diospaj contracunata quichushca cosascunamantami cancunapaj shuj regalota cachani” nichunmi mandarca.
27 Paica Betel llajtapi cajcunaman, Neguebpi tiyaj Ramotpi cajcunaman, Jatirpi cajcunamanmi regalocunata cacharca.
28 Shinallataj Aroerpi cajcunaman, Sifmotpi cajcunaman, Estemoapi cajcunaman,
29 Racalpi cajcunaman, jerahmeelitacunapaj llajtacunapi cajcunaman, quenitacunapaj llajtacunapi cajcunaman,
30 Hormapi cajcunaman, Borasanpi cajcunaman, Atacpi cajcunaman,
31 Hebronpi cajcunamanmi cacharca. Davidpish, paihuan caj runacunapish maillata purishca tucui lugarcunamanmi cacharca.
Notacuna
^ O “ura ladotapish”. Caipica Judá ura ladomantami parlacun.
^ Hebreo rimaipica: “ancianocunaman” ninmi.
