1 Samuel 31:1-13
-
Saulpish, paipaj quimsa churicunapish huañushcamanta (1-13)
31 Filisteocunaca israelitacunahuanmi macanacucurcacuna. Chaipica israelita runacunaca filisteocunamantami miticushpa rircacuna. Guilboa urcupica achcacunami huañurcacuna.
2 Filisteocunaca Saultapish, paipaj churicunatapish manchanaitami catircacuna. Chashnami Saulpaj churicunapajman cꞌuchuyashpaca Jonatanta, Abinadabta, Malki-Suatapish huañuchircacuna.
3 Filisteocunaca Saulpaj contrami ashtahuan macanacurcacuna. Arcohuan flechacunata shitajcunaca Saúl maipi cashcata yachaj chayashpami paita yallitaj chugrichircacuna.
4 Chaimi Saulca paipaj escudota apaj runataca: “Chai circuncisionta mana rurachishcacuna shamushpa paicunapaj espadahuan ama satichun, ñucata llaquinaita ama huañuchichunca cambaj espadata llujshichishpa chai espadahuan ñucata sati” nirca. Shinapish escudota apaj runaca achcata manchashcamantami chaitaca mana rurasha nirca. Chaimantami Saulca paipaj espadallatataj japishpa satirirca.
5 Saúl huañujta ricushpami paipaj escudota apaj runapish paipaj espadallahuantaj satirishpa paihuan huañurca.
6 Chashnami Saulpish, paipaj quimsa churicunapish, paipaj escudota apaj runapish, paihuan caj runacunapish chai punllapica tandalla huañurcacuna.
7 Jezreel pugru pambapi caj israelitacunapish, Jordán jatun yacu ladopi caj israelitacunapish Israelmanta soldadocuna miticushpa rijtami ricurcacuna. Shinallataj paicunaca Saulpish, paipaj churicunapish huañushcata ricushpami paicunapaj llajtacunata shitashpa miticushpa rircacuna. Qꞌuipaca filisteocunami chai llajtacunaman shamushpa chaipi causai callarircacuna.
8 Cayandij punlla filisteocuna chai huañushcacunapaj valishca cosascunata quichunaman ricushpami Guilboa urcupica Saulpaj, paipaj quimsa churicunapaj huañushca cuerpocunata japircacuna.
9 Chaipimi Saulpaj umatapish pꞌitircacuna. Paipaj tucui macanacunatapishmi* quichurcacuna. Chashnami Filistea llajtapi causaj tucui gentecunaman, paicunapaj rurashcalla dioscunapaj templocunapipish huillachun shuj huillajta cacharcacuna.
10 Shinallataj Saulpaj macanacunacunataca Astoret shuti rurashcalla dioscunapaj templopimi churarcacuna. Paipaj huañushca cuerpotapish Bet-San pircapimi huarcurcacuna.
11 Jabés-Galaad llajtapi causajcunaca filisteocuna Saulta imallata rurashcatami yachaj chayarcacuna.
12 Chaimantami Jabés-Galaad llajtamanta tucui macanacujcunaca tucui tutata Bet-San llajtaman viajarcacuna. Chai llajtaman chayashpaca Bet-San pircamantami Saulpaj huañushca cuerpotapish, paipaj churicunapaj huañushca cuerpocunatapish uriyachircacuna. Chashnami paicunaca Jabesman tigrashpa huañushca cuerpocunapaj aichata rupachircacuna.
13 Chai qꞌuipaca paicunapaj tullucunataca Jabespi tiyaj tamarisco yura ucupimi pambarcacuna. Shinallataj canchis punllacunatami ayunarcacuna.
Notacuna
^ “Macanacunacuna” shimita huasha diccionariopi ricui.
