1 Samuel 4:1-22
4 Samuelca tucui israelitacunamanmi Dios ima nishcata huillashpa catirca.
Chai punllacunapica israelitacunaca filisteocunapaj contrami macanacunaman llujshircacuna. Israelitacunaca Ebenézer cꞌuchupimi carpa huasicunapi saquirircacuna. Cutin filisteocunaca Afec llajtapimi carpa huasicunapi saquirircacuna.
2 Filisteocunaca israelitacunapaj contra macanacungapajmi allichirishca shayarircacuna. Pero israelitacunaca macanacuipimi pirdi callarircacuna. Chaimi filisteocunaca israelitacunata misharcacuna. Filisteocunaca chai macanacuna lugarpica 4.000 israelitacunatami huañuchircacuna.
3 Soldadocuna carpa huasicunaman tigrajpica israelitacunata pushajcunaca:* “¿Jehová Diosca imamantataj cunan punllaca filisteocuna ñucanchijta mishachun saquishcayari?* Jehová Dioshuan ari ninacushca arcata Siló llajtamanta llujshichishunchij. Chashnami arcaca ñucanchijhuan canga. Ñucanchij contracunapaj maquimantapish quishpichingami” nircacunami.
4 Chaimi Siló llajtaman huaquin cꞌaricunata cacharcacuna. Cai cꞌaricunaca jahua pacha soldadocunata mandaj Jehová Dioshuan ari ninacushca arcatami chaimanta aparcacuna. Diosca querubincunapaj jahuapimi* paipaj jatun tiyarinapi tiyacun. Elipaj ishqui churicuna Hofnipish, Finehaspish Dioshuan ari ninacushca arcata apacujpica paicunapishmi chaipi carcacuna.
5 Israelitacunapaj carpa huasicunaman Jehová Dioshuan ari ninacushca arca chayajpica israelitacunaca sinchitami capari callarircacuna. Chaimi pambapish chujchurca.
6 Caparishcacunata uyashpami filisteocunaca: “¿Hebreocunapaj carpa huasicunapica imamantashi chashna caparicuncuna?” nircacuna. Carpa huasicunapi Jehová Diospaj Arca cashcata yachaj chayashpami
7 filisteocunaca mancharircacuna. Filisteocunaca: “¡Paicunapaj Diosmari carpa huasicunaman shamushca!” nircacunami. Shinallataj: “¡Caica yallitaj llaquimari! ¡Cashna shinaca mana nunca pasashcachu!
8 ¡Caica yallitaj llaquimari! ¿Poderta charij Diospaj maquimantaca pitaj quishpichi tucungari? Diosca egipciocunataca chaquishca pambapimi castigashpa tucui laya ungüicunahuan huañuchirca.
9 Filisteocuna, ama manchaichijchu, cꞌari cꞌari caichij. Cancuna mana chashna rurajpica paicuna ima shinami cancunata sirvircacuna, chashnallatajmi cancunapish hebreocunata sirvinguichij. ¡Cꞌari cꞌari caichij, macanacuichij!” nircacunami.
10 Chaimi filisteocunaca israelitacunapaj contra macanacurcacuna. Filisteocunaca israelitacunatami misharcacuna. Chaimi cada israelita paicunapaj huasiman miticushpa rircacuna. Chaipica filisteocunaca achca israelitacunatami huañuchircacuna. Israelitacunamantaca 30.000 chaquillahuan purij soldadocunami huañurcacuna.
11 Shinallataj filisteocunaca Diospaj Arcatami aparcacuna. Elipaj ishqui churi Hofnipish, Finehaspishmi chaipi huañurcacuna.
12 Benjaminpaj familiamanta shuj runaca chai macanacuna lugarmanta callpashpa rishpami chai punllallataj Siló llajtaman chayarca. Paica lliqui ropata churarishca, llaquilla cashcamanta umapipish ñutu allpata churarishcami chayarca.
13 Chai runa chayajpica Elica ñan cꞌuchupimi tiyacurca. Paica Diospaj Arcamantami paipaj shungupica yallitaj sustarishca shuyacurca. Chai runa chai llajtaman yaicushpaca ima tucushcatami huillarca. Chaita uyashpami chai llajtapi causaj tucui gentecunaca caparircacuna.
14 Gentecuna chashna caparicujta uyashpami Elica: “¿Imamantataj dimastij bulla tiyanyari?” nishpa tapurca. Chaimi chai runallataj ima tucushcata Eliman huillangapaj callpashpa rirca.
15 (Elica ñami 98 huatacunata charirca. Chaimantami paica imata mana ricui tucurca).
16 Chai runaca Elimanca: “¡Ñucaca cai ratomi macanacuna lugarmanta chayamuni! Cunanllatajmi ñucaca chaimanta miticushpa shamuni” nircami. Chaita uyashpami Elica: “¿Ñuca huahualla, imataj tucushcayari?” nishpa tapurca.
17 Chashna tapujpimi chai huillaj runaca: “Filisteocunaca israelitacunatami mishashcacuna. Shinallataj achca israelitacunatami huañuchishcacuna. Chaimantami israelitacunaca filisteocunamanta miticushpa rishcacuna. Cambaj ishqui churicuna Hofnipish, Finehaspishmi huañushca. Filisteocunaca Diospaj Arcatapishmi apashpa rishcacuna” nirca.
18 Chai runa Diospaj Arcamanta huillajpimi Elica pungu ladopi pai tiyacushca tiyarinamanta allajman* urmarca. Chaimi paica uma nuca tacarishpa huañurca. Paica ñami mayorlla carca. Yallitaj gordopishmi carca. Elica 40 huatacunatami Israelpi juzgaj carca.
19 Elipaj nuera, Finehaspaj huarmica chichumi carca. Chaimi ñalla huahuata huachagrirca. Paica Diospaj Arcata apashcata, paipaj suegropish, paipaj cusapish huañushcatami yachaj chayarca. Chaimantami huahuata huachana nanaicuna japijpi huahuata huacharca.
20 Chai huarmi ña huañucujpimi paipaj ladopi caj caishuj huarmicunaca: “Ama manchaichu, canca shuj cꞌari huahuatami huachashcangui” nircacuna. Paicuna chashna nijpica chai huarmica ima nishcata mana uyashpami imata mana cutichirca.
21 Chai huarmica Diospaj Arcahuanpish, paipaj suegrohuanpish, paipaj cusahuanpish ima tucushcata yachashpami: “Israelta sumajyachijca rishcami” nirca. Chaimi paipaj churitaca Icabod* shutita shutichirca.
22 Paica: “Diospaj Arcata apashcamantami Israelta sumajyachijca rishca” nircami.
Notacuna
^ Hebreo rimaipica: “ancianocunaca” ninmi.
^ Hebreo rimaipica: “¿Imamantataj Jehová Diosca cunan punlla filisteocunapaj ñaupajpi ñucanchijta mishashca?” ninmi.
^ Caitaca “chuapipimi” nishpapishmi traducishcacuna.
^ O “allaiman”.
^ “Icabod” shutica ‘¿sumajyachinaca maipitaj can?’ nisha ninmi.
