1 Samuel 6:1-21
-
Filisteocuna Arcata israelitacunaman tigrachishcamanta (1-21)
6 Jehová Diospaj Arcaca canchis quillacunatami filisteocunapaj llajtacunapi carca.
2 Chaimi filisteocunaca sacerdotecunata, adivinocunata cayashpaca: “¿Jehová Diospaj Arcahuanca imatataj rurana canchij? Ñaupa maipi cashcaman Arcata cutin cachangapaj imata rurana cashcata nichij” nishpa tapurcacuna.
3 Paicunaca: “Israelitacunapaj Jehová Dioshuan ari ninacushca arcata tigra cachagrishpaca ofrenda illajca ama cachanguichij. Culpamanta ofrendata cachanatapish amataj cungaringuichij. Chashna rurashpami cancunaca jambiringuichij. Diospaj maqui imamanta cancunata castigacushcatapishmi yachanguichij” nishpami cutichircacuna.
4 Chaimi filisteocunaca: “¿Culpamanta ofrendata cachangapajca imatataj cuna canchij?” nishpa tapurcacuna. Chashna nijpimi paicunaca: “Filisteocunata mandajcunaca pichcami* can. Chaimanta oromanta rurashca pichca hemorroidescunata, oromanta rurashca pichca ucuchacunata cachaichij. Cancunamantaca cada unomi chai llaquillatataj charishcanguichij. Cancunapaj mandajcunapish chai llaquillatatajmi charishcacuna.
5 Cancunata llaquichicuj hemorroidescunaman, ucuchacunaman rijchajtami rurana canguichij. Chaicunami cai llajtataca tucuchicuncuna. Shinallataj israelitacunapaj Diostami jatunyachina canguichij. Chaita rurajpica cancunatapish, cancunapaj diostapish, cancunapaj allpatapish paipaj maquihuan castiganata saquingapishchari.
6 ¿Imamantataj egipciocuna shina, faraón shina rumi shungu canguichij? Israelitacunapaj Diosca paicunata castigajpimi paicunaca israelitacunata richun saquircacuna. Israelitacunapish chaimantami llujshircacuna.
7 Shinaca shuj mushuj carretata allichichij. Shinallataj huahua bizicunata charij ishqui vacacunata mashcaichij. Chai vacacunaca yugota mana nunca churashca vacacunami cana can. Qꞌuipaca cai vacacunataca carretapi huatanguichij. Pero huahua bizicunataca mamacunamanta caruman apashpa corralpi cutin churanguichij.
8 Chai carretapica Jehová Diospaj Arcata churanguichij. Cai Arca cꞌuchupica culpamanta ofrendapaj shuj cajata churanguichij. Chai cajapica oromanta rurashca cosascunata Diosman cachanguichij. Qꞌuipaca vacacunata chaicunahuan richun saquinguichij.
9 Vacacuna maita rijta ricushpa saquiringuichij. Bet-Semes llajtaman rina ñanta vacacuna rishpa Arca tiyan llajtaman huichiyajpica israelitacunapaj Dios cai jatun llaquita ñucanchijman cachashcatami yachashun. Pero mana chaita huichiyajpica Diospaj maqui ñucanchijta mana castigashcatami yachashun. Ashtahuanpish shuj ungüilla japishcatami yachashun” nircacunami.
10 Gentecunaca paicuna mandashcatami rurarcacuna. Paicunaca huahua bizicunata charij ishqui vacacunatami japircacuna. Chai vacacunataca carretapimi huatarcacuna. Huahua bizicunatapish corralpimi churarcacuna.
11 Qꞌuipaca Jehová Diospaj Arcataca carretapimi churarcacuna. Shinallataj oromanta rurashca ucuchacunatapish, hemorroidescunaman rijchajta rurashcacunatapish cajapi churashpami carreta jahuapi churarcacuna.
12 Chai vacacunaca Bet-Semes llajtaman rina ñantami catishpa rircacuna. Vacacunaca alli ladomanpish, lluqui ladomanpish ñanmanta mana llujshishpami huacarishpa rircacuna. Filisteocunata mandajcunapish Bet-Semes llajta linderocamami vacacunapaj huashata catishpa rircacuna.
13 Bet-Semes llajtamanta gentecunaca pugru pambapimi trigota cosechacurcacuna. Paicuna huichilla ricushpaca Arcata ricushpami yallitaj cushicurcacuna.
14 Carretaca betsemitacunapuramanta Josuepaj allpamanmi chayarca. Chaiman chayashpaca shuj jatun rumi cꞌuchupimi saquirirca. Chaimantami chai llajtapi causaj gentecunaca carretahuanca yantata rurarcacuna. Cutin vacacunataca rupachishca ofrendacunata shinami Jehová Diosman curcacuna.
15 Levitacunaca Jehová Diospaj Arcatapish, oromanta rurashca cosascunata charij cajatapish uriyachishpami jatun rumi jahuapi churarcacuna. Chai punllaca Bet-Semes llajtamanta runacunaca rupachishca ofrendacunata, shujtaj sacrificiocunatapishmi Jehová Diosman curcacuna.
16 Chaita ricushpami filisteocunata pichca mandajcunaca chai punllallataj Ecrón llajtaman tigrarcacuna.
17 Filisteocunaca oromanta rurashca pichca hemorroidescunataca culpamanta ofrendata shinami Jehová Diosman cacharcacuna. Paicunaca cai llajtacunamantami cacharcacuna: Asdod llajtamanta shujta, Gaza llajtamanta shujta, Asquelón llajtamanta shujta, Gat llajtamanta shujta, Ecrón llajtamantaca shujtami cacharcacuna.
18 Oromanta rurashca ucuchacunaca filisteocunapaj tucui llajtacuna mashna cashcahuanmi igual carca. Chai llajtacunaca pichca mandajcunapajmi carca. (Muyundijta pircashca llajtacunapish, campopi tiyaj uchilla pueblocunapishmi carca).
Jehová Diospaj Arcata churashca jatun rumica betsemitacunapuramanta Josuepaj allpapimi cunan punllacunacama shuj testigo shina can.
19 Pero Bet-Semes llajtamanta runacuna Jehová Diospaj Arcata ricushcamantami Diosca paicunata huañuchirca. Chai llajtapi causajcunamantaca 50.070* gentecunatami huañuchirca. Chai llajtamanta gentecunaca Jehová Dios achca gentecunata huañuchishcamantami huacai callarircacuna.
20 Bet-Semes llajtamanta runacunaca: “¿Jucha illaj Jehová Diospaj ñaupajpica pitaj cai tucungayari? ¿Cai Diosca ñucanchijta saquishpaca pipajmantaj ringayari?” nishpami tapurcacuna.
21 Chaimi huillaj runacunataca Quiryat-Jearimpi causajcunamanca: “Filisteocunaca Jehová Diospaj Arcatami cutin tigrachimushcacuna. Arcata mashcanaman uriyashpa apaichij” nichun cacharcacuna.
