1 Samuel 8:1-22
8 Samuel ña yuyajyashpaca paipaj churicunatami Israel llajtapi juezcuna cachun nombrarca.
2 Paipaj punta churica Joel shutimi carca. Cutin paipaj qꞌuipa churica Abías shutimi carca. Ishquindijmi Beer-Seba llajtapi juezcuna carca.
3 Pero Samuelpaj churicunaca paipaj yayapaj ejemplotaca mana catircacunachu. Ashtahuanpish mana allita rurashpami charijyanallata mashcajcuna carca. Paicunaca camaricunata japishpami mana alli juzgajcuna carca.
4 Tiempo qꞌuipaca Israel llajtata tucui pushajcunami* tandanacushpa Ramá llajtapi Samuelta ricunaman rircacuna.
5 Paicunaca: “Ricui, canca ñami yalli yuyajyashcangui. Cambaj ishqui churicunapish cambaj ejemplotaca mana catishcacunachu. Tucui shujtaj llajtacunaca paicunata juzgachunmi shuj reyta charincuna. Paicunata shinallataj ñucanchijtapish juzgachun shuj reyta nombrai” nircacunami.
6 Pero Samuelca paicuna “Ñucanchijta juzgachun shuj reyta cui” nishcataca mana munarcachu.* Chaimi Samuelca Jehová Diosta mañarca.
7 Pai mañajpica Jehová Diosca cashna nishpami cutichirca: “Cai llajtapi causajcuna ima nishcata rurailla. Paicunaca mana cantachu mana chasquisha nishcacuna. Ñucatami paicunapaj rey cachunca mana chasquincuna.
8 Egipto llajtamanta ñuca paicunata llujshichimushca punllamantami paicunaca ñucata siempre saquishpa shujtaj dioscunata adorashpa caticuncuna. Chashnallatajmi cunan punllacunapipish ruracuncuna. Chaitami canhuanpish ruracuncuna.
9 Paicuna ima nishcata rurailla. Shinapish paicunahuan ima tucuna cashcataca allimi advirtina cangui. Paicunata mandagrij reypish imata mañana derechota charishcata huillangui” nircami.
10 Chaimi Samuelca shuj reyta mañaj gentecunahuan parlashpa Jehová Dios tucui ima nishcata huillarca.
11 Cashnami nirca: “Cancunata mandaj reyca caita mañana derechotami charinga: cancunapaj churicunata apashpaca paipaj macanacuna carretacunapi, paipaj caballocunapi tiyarishpa sirvichunmi churanga. Shinallataj huaquincunataca paipaj macanacuna carretacunapaj ñaupajta callpachunmi churanga.
12 Shujtajcunataca paipaj soldadocunata mandajcuna cachunmi churanga. 1.000 gentecunata pushaj cachun, 50 gentecunata pushaj cachunmi churanga. Shujtajcunataca paipaj allpacunata yapuchun, cosechachunmi churanga. Shinallataj macanacuipaj macanacunacunata rurachun, paipaj carretacunapaj imalla minishtirishcacunata rurachunmi churanga.
13 Cancunapaj ushushicunataca perfumecunata rurachun, yanujcuna cachun, tandata rurajcuna cachunmi apanga.
14 Shinallataj paica cancunapaj ashtahuan alli allpacunahuan, uva chagracunahuan, olivo chagracunahuanmi saquiringa. Chaitaca paita sirvijcunamanmi cunga.
15 Paica cancunapaj chagrapi granocunatapish, uvacunatapish pꞌucushcamantaca chungamanta shujtami japinga. Chaitaca paipaj palaciopi achca autoridadta charijcunaman, paita sirvijcunamanmi cunga.
16 Cancunapaj sirvij cꞌaricunata, sirvij huarmicunatami apanga. Shinallataj cancunapaj alli vacacunata, torocunata, burrocunatami apanga. Caicunataca paipajmi trabajachinga.
17 Cancunapaj ovejacunamanta, chivocunamantaca chungamanta shujhuanmi saquiringa. Cancunapish paita sirvijcunami tucunguichij.
18 Cancuna shuj reyta agllashcamantami yallitaj llaquirina punlla shamunga. Chai punlla chayajpica cancuna huacashcataca Jehová Diosca mana uyangachu” nircami.
19 Ashtahuanpish gentecunaca Samuel ima nishcataca mana uyasha nircacunachu. Chaimantami paicunaca: “¡Ima cajpipish ñucanchijca shuj reytami charisha ninchij!
20 Chai reymi ñucanchijta juzganga, ñucanchijta pushanga, ñucanchijmantapish macanacunga. Chashnami shujtaj llajtacuna shinallataj ñucanchijpish shuj reyta charishun” nircacunami.
21 Gentecuna tucui ima nishcata uyashca qꞌuipaca Samuelca Jehová Diosmanmi huillarca.
22 Chaimi Jehová Diosca Samuelmanca: “Paicunata uyailla, paicunata mandachun shuj reyta agllai” nirca. Chashna nijpimi Samuelca Israelmanta runacunamanca: “Cancunapaj llajtacunaman tigraichijlla” nirca.
Notacuna
^ Hebreo rimaipica: “ancianocunami” ninmi.
^ Hebreo rimaipica: “Samuelpaj ñahuipica mana alli ricuricachu” ninmi.
