1 Tesalonicenses 3:1-13
3 Cancuna ima shina cashcata yachana munaihuan cashpami ñucanchijlla Atenaspi saquirinata yuyarircanchij.
2 Shinapish ñucanchij huauqui Timoteotami cancunapajman cachanchij. Paica Cristomanta alli huillaicunata huillaj, Diosta sirvijmi can. Paitami cancunata animachun, cushichichun, cancunapaj feta sinchiyachichun cachanchij.
3 Chashnami cai llaquicunamantaca ni maijanpaj fe mana chiriyanga. Cashna llaquicunata apangapajmi ñucanchijca agllashca cashcanchij. Chaitaca allimi yachanguichij.
4 Cancunahuan cashpaca cashna llaquicunata apana cashcatami huillaj carcanchij. Cancuna yachashca shinaca chashnami tucushca.
5 Cancuna ima shina cashcata yachana munaihuan cashpa, Diosta ima shina sirvicushcata yachasha nishpami Timoteota cancunapajman cacharcani. Diablo ima shinapish cancunata juchapi urmachinatami mancharcani. Chashna tucujpica ñucanchij rurashcaca yangallami canman carca.
6 Shinapish cancunata visitashpa Timoteo tigramushpaca alli noticiacunatami apamushca. Paica cancunapaj fe ashtahuan sinchi cashcata, shujtajcunaman cꞌuyaita ricuchicushcatapishmi parlarca. Shinallataj ñucanchijta cꞌuyaihuan yuyarishcata, cancunata ricushun nishca shinallataj cancunapish ñucanchijta ricushun nishcatami huillarca.
7 Chaimanta huauquicuna ima illaj cashpapish, llaquicunahuan cashpapish cancunamanta uyashpa, cancunapaj fe sinchi cashcata yachashpaca achcatami cushicunchij.
8 Amito Jesushuan shuj shinalla cashcamanta cancuna sinchi cajpimi ñucanchijpish animarinchij.
9 Cancunami ñucanchijtaca achcata cushichinguichij. Chaimantami Diostaca cancunamanta pagui ninchij.
10 Ñahui ñahui cancunata ricushun nishpami tutapish, punllapish tucui shunguhuan rogarishpa Diosta mañacunchij. Shinallataj cancunapaj feta sinchiyachingapajmi ima minishtishcapi ayudashun ninchij.
11 Ñucanchij Yaya Diospish, ñucanchij Amito Jesuspish cancunata visitanaman ringapaj saquichunmi mañacunchij.
12 Cancunata ñucanchij yallitaj cꞌuyashca shinallataj cancunapaj cꞌuyaipish caishuj chaishujpaj, tucuicunapajpish ashtahuan mirarishpa catichunmi Amito Jesús ayudachun munanchij.
13 Chashnami Amito Jesús paita sirvij tucui jucha illajcunahuan tigramuna punllacunapica* ñucanchij Yaya Diospaj ñaupajpi cancunaca sinchi, chuya, jucha illajcuna canguichij.
Notacuna
^ Griego rimaipica: “parousía” ninmi.
