1 Timoteo 1:1-20
1 Ñucaca Pablomi cani. Ñucanchijta Quishpichij Dios mandashcamantami Cristo Jesuspaj apóstol cani. Cristo Jesusmantami ñucanchijca esperanzata charinchij. Cai cartataca
2 Timoteomanmi* quillcani. Canca ñuca shinallatajmi feta charingui, ñuca churi shinami cangui:
Yaya Diospish, ñucanchij Amito Cristo Jesuspish yallitaj llaquij cashcata, cꞌuyaj cashcata canman ricuchichun, sumaj causaitapish canman cuchun.
3 Ima shinami Macedoniaman ñalla rigrishpaca canta Éfeso llajtapi saquirichun mañarcani. Chashnallatajmi cunanpish huaquin runacunata panda yachaicunata ama yachachichun nishpa sinchita cunachun mañani.
4 Shinallataj llulla parlocunata, ñaupa yayacunapaj shuticunata quillcashcacunamantapish ama uyachun nishpa paicunata cunachunmi mañani. Chaicunaca imapaj mana valinchu. Ñucanchij feta sinchiyachingapaj Dios cushcacunaca mana canchu. Ashtahuanpish yanga pꞌiñanacuicunallapimi churan.
5 Caitaca cꞌuyaimantami mandani. Cai cꞌuyaica chuya shungumanta, alli concienciamanta, mana nij tucushpalla feta charinamantami shamun.
6 Caicunamanta caruyashpami maijancunaca yanga parlocunallata rimanacui callarishcacuna.
7 Paicunaca Diospaj leymanta yachachijcunami cashun nincuna. Shinapish paicunallatajmi paicuna ima nishcatapish, chashnatajmi can nishpa yachachishcacunatapish mana intindincuna.
8 Cancuna yachashca shina Leyta alli pajtachijpica Leyca allimi.
9 Leyca cashcata rurajcunapajca mana canchu. Ashtahuanpish leyta pꞌaquijcunapaj, mana cazujcunapaj, millaicunapaj, juchayujcunapaj, shujtajcunamanta caruyajcunapaj,* Diosman cushcata mana respetajcunapaj, paicunapaj yayacunata huañuchijcunapaj, paicunapaj mamacunata huañuchijcunapaj, shujtajcunata huañuchijcunapajpishmi can.
10 Shinallataj huainayajcunapaj,* cꞌaripurallataj aichapi chayarijcunapaj, secuestraj gentecunapaj, llullajcunapaj, ari nishca jahua mana pajtachijcunapaj, alli yachaita tucui laya jarcajcunapajpishmi can.
11 Cai yachaica cushi Diospaj sumaj alli huillaicunamantami shamun. Diosca chai alli huillaicunata huillachunmi ñucata agllarca.
12 Ñucaman poderta cushcamantami ñucanchij Amito Cristo Jesusta pagui nini. Paica pajtachij cashcata ricushpami ñucamanca shuj trabajota mingarca.
13 Ñaupaca feta mana charishcamanta, mana yachaimantami Diosta cꞌamij, catirashpa llaquichij, maipishcachun rimaj carcani. Chashna cajpipish Cristoca ñucataca llaquircami.
14 Ñucanchij Amitopish yallitaj llaquij cashcatami ñucamanca ricuchirca. Shinallataj Cristo Jesusmantami cꞌuyaitapish, fetapish chasquircani.
15 Cristo Jesusca cai pachapi caj juchayujcunata quishpichingapajmi shamurca. Cai huillashca shimicunaca ciertomi. Chaitaca tucui shunguhuan chasquinallami. Tucui juchayujcunamantaca ñucami ashtahuan juchayuj cani.
16 Shinapish tucuicunamanta yalli juchayuj cajpipish paica llaquij cashcatami ñucamanca ricuchirca. Cristo Jesusca ñucaman tucui pacienciata ricuchishpami, paipi feta churashpa huiñai causaita charisha nijcunaman ñuca ejemplota churarca.
17 Huiñai huiñaita Jatun Mandaj, mana huañuj, mana ricuipaj shujlla Diosca huiñai huiñaita jatunyachishca, sumajyachishca cachun. Chashna cachun.*
18 Timoteo ñuca huahualla, canmanta huillashca profeciacunapi nishca shinami canmanca cashna mandani. Cai shimicunata pajtachishpaca shuj alli macanacuj soldado shinami alli macanacushpa catingui.
19 Fetapish ricuchishpa catingui, alli concienciatapish charingui. Huaquincunaca caitaca mana chasquishcachu. Chaimantami paicunapaj feca yacupi shuj barco huashicuj shina chingarishca.
20 Paicunapurapica Himeneopish, Alejandropishmi can. Paicunataca Diosta cꞌaminata ama yachachunmi disciplinashpa Satanasman cushcani.
Notacuna
^ Timoteo shutica Diosta jatunyachij nisha ninmi.
^ O “cꞌuyaita mana ricuchijcunapaj”.
^ “Huainayana” shimita huasha diccionariopi ricui.
^ O “Amén”.
