2 Crónicas 28:1-27
28 Acazca 20 huatacunata charishpami mandai callarirca. Paica Jerusalenpica 16 huatacunatami mandarca. Jehová Diospaj ñaupajpica paica mana allicunatami rurarca. Paipaj ñaupa yaya David rurashca shinaca mana rurarcachu.
2 Ashtahuanpish Acazca Israel llajtamanta reycunapaj ejemplotami catirca. Shinallataj paica fierrota yacuyachishpami Baal dioscunata rurarca.
3 Ashtahuanpish paica Hinón pugru pambapimi* sacrificiota rupachishpa cushnichirca. Paipaj churicunatapish ninapimi rupachirca. Chashnami paica Jehová Dios israelitacunapaj ñaupajmanta llujshichishpa cachashca llajtacuna shinallataj millanana ruraicunata rurashpa causarca.
4 Adorana lugarcunapi,* urcucunapi, tucui pꞌangasapa yura ucucunapipishmi sacrificiocunata rurarca. Shinallataj sacrificiota rupachishpami cushnichij carca.
5 Chaimantami Acazpaj Jehová Diosca paitaca Siria llajtamanta mandaj reypaj maquipi entregarca. Siriocunaca Acazta mishashpami achcacunata prezu shina Damasco llajtaman aparcacuna. Diosca Acaztaca Israel llajtamanta reypaj maquipipishmi entregarca. Chaimi Israelmanta reyca Acazpaj achca soldadocunata huañuchishpa misharca.
6 Remaliaspaj churi Pécah runaca shuj punllallapimi Judá llajtapica 120.000 mana manchaj runacunata huañuchirca. Cai runacunaca paicunapaj ñaupa yayacunapaj Jehová Diostami saquishcacuna carca.
7 Efrainpaj familiamanta sinchi macanacuj Zicrí runaca reypaj churi Maaseyatami huañuchirca. Shinallataj Azricam runatapishmi huañuchirca. Azricam runaca reypaj huasipi* mandajmi carca. Qꞌuipamanca Elcaná runatapishmi huañuchirca. Elcanaca reypaj qꞌuipa mandajmi carca.
8 Ashtahuanpish israelitacunaca 200.000 gentecunatami prezu aparcacuna. Paicunaca Judá llajtamanta paicunapaj huauquicunapuramantami carca. Paicunapurapica huarmicuna, churicuna, ushushicunami carca. Shinallataj israelitacunaca achca cosascunata quichushpami Samaria llajtaman aparcacuna.
9 Samaria llajtapica Jehová Diospaj shuj profeta Oded shuti runami tiyarca. Paica israelita soldadocuna Samariaman shamucujpimi paicunahuan tupangapaj llujshirca. Odedca paicunamanca cashnami nirca: “¡Ricuichij! Cancunapaj ñaupa yayacunapaj Jehová Diosca Judá llajtahuanca yallitaj pꞌiñarishcami carca. Chaimantami cancunapaj maquipi curca. Pero cancunaca Judá llajtapi causajcunataca yallitaj llaquichishpami huañuchishcanguichij. Cancuna chashna rurashcataca Diosllatajmi ricushca.
10 Cunanca Judá llajtamanta, Jerusalén llajtamanta cꞌaricunata, huarmicunataca cancunata sirvijcuna cachunmi rurasha ninguichij. Shinapish ¿manachu cancunapish ñucanchij Jehová Diospaj ñaupajpica juchacunata rurashcanguichij?
11 Cunanca uyaichij. Cancunapaj huauquicunapuramanta prezu apashcacunata tigrachichij. Jehová Diosca cancunahuanca yallitaj pꞌiñarishcami can” nircami.
12 Chashna nicujpimi Efrainpaj familiacunapuramanta huaquin pushajcunaca macanacuimanta shamuj israelitacunapaj contra jatarircacuna. Paicunapurapica Jehohananpaj churi Azarías, Mesilemotpaj churi Berekías, Salumpaj churi Jehizquías, Hadlaipaj churi Amasapishmi carca.
13 Paicunaca: “Prezu apamushcacunataca ama caiman apamuichijchu. Chashna rurashpaca Jehová Diospaj ñaupajpimi culpayuj cashun. Cancuna chashna rurasha nishcaca ñucanchij juchacunata, ñucanchij culpacunatami ashtahuan mirachishpa catinga. Ñucanchij culpacunaca ñami yallitaj jatun can. Chaimantami Diosca israelitacunahuanca yallitaj pꞌiñarishca can” nircacunami.
14 Macanacunacunahuan caj soldadocunaca prezu apamushcacunata, tucui imalla quichushpa apamushcacunatami mandajcunaman, chaipi tandanacushca tucui gentecunaman entregarcacuna.
15 Agllashca runacunami prezumanta apamushcacunataca ayudarcacuna. Shinallataj quichushpa apamushca cosascunamanta ropacunata llujshichishpami tucui lluchulla caj gentecunamanca ropacunata churarichun curcacuna. Chashnami paicunamanca ropacunata, sandaliacunata curcacuna. Micunatapish, ubyanatapishmi curcacuna. Paicunapaj cuerpopajpish aceitetami curcacuna. Shinallataj débil cajcunataca burrocunapi tiyachishpami palmera yuracuna tiyan Jericó llajtaman aparcacuna. Chaipimi paicunapaj huauquicunaca carca. Qꞌuipaca chai agllashca runacunaca Samariamanmi tigrarcacuna.
16 Chai tiempopica rey Acazca Asiria llajtamanta caj reycunatami ayudachun mañarca.
17 Edomitacunaca cutinllataj yaicushpami Judá llajtapi cajcunahuan macanacurcacuna. Chaimantaca achcacunatami prezu aparcacuna.
18 Shinallataj filisteocunaca Judá llajtapi tiyaj Sefelá llajtacunata, Négueb llajtacunatami llaquichircacuna. Paicunaca Bet-Semes llajtata, Ayalón llajtata, Guederot llajtata, Socó llajtata, chai cꞌuchulla pueblocunata, Timná llajtata, chai cꞌuchulla pueblocunata, Guimzó llajtata, chai cꞌuchulla pueblocunata mishashpami chai llajtacunata japircacuna. Chashnami paicunaca chaipi causai callarircacuna.
19 Israel llajtata mandaj rey Acazpaj culpamantami Judá llajtapi causajcunataca Jehová Diosca humillarca. Acazca Jehová Diospaj ñaupajpica yallitaj jatun juchacunata rurashpami causarca. Paipaj culpamantami Judapi causajcunapish yallitaj juchacunata rurashpa causarcacuna.
20 Asiria llajtamanta rey Tilgat-Pilneserca ayudanapaj randica paihuan macanacushpami ashtahuan llaquichirca.
21 Acazca Jehová Diospaj huasimanta, reypaj huasimanta, mandajcunapaj huasicunamanta tucui imalla tiyashcacunatami apashpa Asiria llajtamanta reyman shuj regalota shina curca. Pero pai cushcapish imapaj mana valircachu.
22 Rey Acazca chashna llaquicunahuan cashpapish Jehová Diospaj ñaupajpica ashtahuan jatun juchacunatami rurarca.
23 Acazca Damasco dioscunamanmi sacrificiocunata rurai callarirca. Chai dioscunata adorajcunaca paitami macanacuipi mishashca carcacuna. Acazca: “Siria llajtamanta dioscunaca Siria llajtapaj reycunatami ayudacun. Ñucatapish ayudachunmi sacrificiocunata ruragrini” nircami. Chai dioscunata adorashcamantami Israel llajtamanta reypish, tucui israelitacunapish llaquipi urmarcacuna.
24 Ashtahuanpish Acazca Diospaj huasipi tiyaj tucui cosascunatami tandachirca. Qꞌuipamanca Diospaj huasipi tiyashca cosascunataca tucuimi ñuturca. Jehová Diospaj huasi pungucunatapishmi huichcarca. Jerusalenpipish tucui ladocunapimi shujtaj dioscunata adorangapaj altarcunata rurarca.
25 Shinallataj Judá llajtapi tiyaj tucui llajtacunapimi shujtaj dioscunapaj sacrificiocunata rupachishpa cushnichingapaj adorana lugarcunata shayachirca. Chashnami paicunapaj ñaupa yayacunapaj Jehová Diostaca pꞌiñachirca.
26 Acazpaj causaipish, pai tucui imalla rurashcapish callarimanta tucuringacamami Judá llajtamanta, Israel llajtamanta Reycunapaj Libropi quillcashca tiyacun.
27 Acazca huañurcami.* Jerusalén llajtapimi paitaca pambarcacuna. Pero Israelmanta reycunata pambana allpapica paitaca mana pambarcacunachu. Qꞌuipamanca paipaj churi Ezequiasmi catij mandaj tucurca.
Notacuna
^ “Gehena” shimita huasha diccionariopi ricui.
^ Hebreo rimaipica: “Alto lugarcunapi” ninmi.
^ O “palaciopi”.
^ O “paipaj ñaupa yayacunahuanmi samarirca”.
