2 Corintios 11:1-33
11 Yuyai illaj shina cajpipish ñucata ahuantachunmi munani. ¡Shinapish ñami ñucataca ahuantacunguichij!
2 Ñucallatajmi cancunataca Cristohuan cazarachun ari nircani. Shinapish cꞌarihuan manaraj chayarishca* solterata shinami Cristopaj ñaupajpi cancunataca ricuchisha nini. Chaimantami Dios sustarishca shinallataj cancunamantaca sustarini.
3 Ima shinami culebraca llullashpa Evata pandachirca chashnallataj cancunapaj yuyaitapish pipish pandachinatami manchani. Cristota tucui shunguhuan catinamanta, pai munashca shina limpio causaita charinamantapish pipish pandachishpa cancunata caruyachinatami manchani.
4 Jesusmanta ñucanchij huillashca jahuamari cancunaca shujtaj Jesusmanta maijanpish huillajpica alli chasquinguichij. Shinallataj espirituta chasquishca jahuamari shujtaj espirituta alli chasquinguichij. Alli huillaita uyashca jahuamari shujtaj laya alli huillaicunata alli chasquinguichij.
5 Cancunaca “alli nishca apostolcunatami” charinguichij. Chashnapish ñucaca paicunamanta mana menos cashcatami tucuipi ricuchishcani.
6 Ñucaca alli rimanata mana tanto valishpapish Diosmantaca allimi yachani. Ñucanchijca chaitami cancunamanca tucuipi alli ricuchishcanchij.
7 Ñucaca cushicushpami Diosmanta alli huillaicunata cancunamanca huillarcani. Shinapish cullquita mana mañarcanichu. Cancuna jatunyachishca cachunmi ñucallataj pingai tucurcani. ¿Chashna rurashpaca ima juchatachu rurarcani?
8 Ñucaca cancunata sirvingapajmi caishuj congregacioncunapaj ayudata chasquircani. Chashna rurashpaca paicunata shuhuashca shinami sintirircani.
9 Imata mana charishpapish cancunahuan cashpaca imata mana mañarcanichu. Ashtahuanpish Macedoniamanta shamuj huauquicunami ñuca imalla minishtishcata cushpa ayudarcacuna. Cancunataca imata mana mañarcanichu, chashnallatajmi imata mana mañashpa catisha.
10 Cristo parlashca shinallatajmi ñucapish mana llullashpa parlani. Chaicunamantami tucui Acaya llajtapica jatunyarisha.
11 ¿Ima nishpataj cancunamanta imata mana chasquishcani? ¿Cancunataca manachu cꞌuyani? Cancunataca cꞌuyanimi, chaitaca Diosca allimi yachan.
12 Maijancunaca ñucanchij shinallataj apostolcunami canchij nishpami jatun tucuncuna. Paicuna imamantapish ama jatun tucuchunmi ñucapish imata ruracushcata rurashpa catisha.
13 Chai runacunaca llulla apostolcuna, shujtajcunata umashpa crichijcuna, Cristopaj apostolcuna shina tucushpa purijcunami can.
14 Caicunata ricushpaca mana mancharinichu. Satanasllatajmari achijnicuj ángel shina tucun.
15 Chaimantami paita catijcunapish cashcata rurajcuna shina tucujta ricushpaca mana mancharini. Shinapish tucuripica paicuna rurashcamantami japina cashcata japingacuna.
16 Cutinllatajmi cashna nini: ñuca yuyai illaj cashcataca pipish ama yuyachun. Shinapish ñuca yuyai illaj cashcata yuyashpaca yuyai illajta shina chasquipaichij. Chashnami ñucapish ashata jatunyarisha.
17 Cunan parlashpaca ñucaca Amito Jesús parlashca shinaca mana parlanichu. Ashtahuanpish ñucallapitaj confiashpami yuyai illaj runa shina jatun tucushpa parlani.
18 Achcacunami cai pachapi tiyashcacunamanta jatun tucuncuna, ñucapish chashnallatajmi ruragrini.
19 Cancunaca “alli yuyaiyujmi canchij” ninguichijmi. Shinapish ¿ima nishpataj yuyai illajcunataca alli chasquinguichij?
20 Cancunaca maijanpish sirvichun obligajcunata, imalla charishcacunata shuhuajcunata, charishcacunata quichujcunata, cancunata pꞌiñashpa jatun tucujcunata, ñahuipi huajtajcunatami alli chasquinguichij.
21 Caicunata ninataca pinganayanmi. Shinapish manchaj runacuna shinalla cashcata ricujpimi chashna nini.
Ashtahuanpish maijancunaca jatun tucunataca mana pinganayachincunachu. Ñucapish yuyai illaj shina tucushpami jatun tucunataca mana pinganayachini.
22 ¿Paicunaca hebreocunachu? Ñucapishmi hebreo cani. ¿Paicunaca israelitacunachu? Ñucapishmi israelita cani. ¿Paicunaca Abrahanpaj huahua huahuacunamantachu? Ñucapishmi Abrahanpaj huahua huahuacunamanta cani.
23 ¿Paicunaca Cristota sirvijcunachu? Ñucaca loco shinami cutichini: ñucami paicunata yalli cani. Paicunata yallimi trabajashcani, paicunata yallimi carcelpi cashcani. Achca cutinmi ñucataca macashcacuna. Achca cutinmi casi huañushcani.
24 Pichca cutinmi judiocunaca ñucataca 39 cutincama azotircacuna.
25 Quimsa cutinmi varacunahuan macarcacuna. Shuj cutinca rumicunahuanmi shitarcacuna. Quimsa cutinmi yacupi huashicurcani. Shuj tutata, shuj punllatami jatun mama cuchapi carcani.
26 Ñucaca achca cutinmi viajarcani. Jatun yacucunapi cashcamanta, shuhuacunamanta, ñuca llajta gentecunamanta, shujtaj llajta gentecunamantapishmi ñucaca llaquicunata charircani. Shinallataj pueblocunapi, chaquishca pambacunapi, mama cucha yacucunapipishmi llaquicunata charircani. Llulla huauquicunamantapishmi llaquicunata charircani.
27 Mana samarishpami sinchita trabajarcani. Achca tutacunatami mana dormircani. Yaricaihuan, yacunaihuanmi carcani. Achca cutinmi mana micushpa pasarcani. Achca chirihuanmi pasarcani. Churana illajpishmi* saquirircani.
28 Cai llaquicunata charishca jahuapish punllantami tucui congregacioncunamanta sustarini.
29 Maijanpish ayudachun minishtijpica, ¿manachu paimantaca sustarini? Shinallataj maijanpish pita pandachijpica, ¿manachu pꞌiñarishpa llaquirini?
30 Imamanta jatun tucuna cashpaca imata mana rurai tucuj cashcamantami jatun tucusha.
31 Ñuca mana llullacushcataca ñucanchij Amito Jesuspaj Yaya Diosca yachanmi. Paica huiñaipaj alabashca cachun.
32 Rey Aretasta sirvishpa Damasco llajtapi mandajmi ñucata japisha nishpa chai llajta pungucunapica guardiacunata churarca.
33 Shinapish ñucataca shuj canastapi churashpami pircapi tiyaj ventanata uriyachircacuna. Chashnami paipaj maquimanta quishpirircani.
