2 Corintios 13:1-14
13 Caihuanca ñami quimsa cutin cancunata visitanaman ringapaj allichiricuni. “Ishqui o quimsa testigocuna huillajpimi* ima tucushcaca alli yacharinga”.
2 Ñuca mana chaipi cashpapish cancunahuan cutin chaipi cashca shinami cani. Chaimantami ñaupaman juchata rurajcunamanpish, tucui cancunamanpish ña huillashca shinallataj ima hora ñuca rishpaca cancunataca disciplinasha. Chai disciplinamantaca manataj quishpiringuichijchu nishpami cutin huillani.
3 Chashnami Cristo ñucata rimachishcata cancunamanca ricuchisha. Cristoca cancunapurapica imata mana rurai tucuj shinaca mana canchu. Ashtahuanpish imata rurashpapish poderta charishcatami ricuchin.
4 Cristotaca imata mana rurai tucuj runa shina cajpimi caspipi clavashpa huañuchircacuna. Shinapish cunanca Diospaj podermantami paica causacun. Ñucanchijpish pai cashca shinallatajmi imata mana rurai tucuj shina canchij. Chashna cashpapish Diospaj poder cancunapi cashcamantami ñucanchijca paihuan causashun.
5 Cancunapaj fe sinchi cashcata yachangapaj cancunallataj alli ricurashpa catichij. Allita ruracushcatapish ricurashpa catichij. ¿Jesucristo cancunahuan shuj shinalla cashcataca manachu cuentata cunguichij? Shinapish Diospaj ñaupajpi cancuna mana alli cajpica Jesucristoca cancunahuanca mana shuj shinalla cangachu.
6 Ñucanchijca Diospaj ñaupajpica allimi ricurinchij. Ñucaca chaita yachachunmi munani.
7 Ñucanchijca cancuna ima mana allita ama rurachunmi Diosta mañanchij. Shujtajcuna ñucanchijta chasquichunllaca mana chashna mañanchijchu. Ashtahuanpish shujtajcuna ñucanchijta mana chasquijpipish cancuna allita rurachunmi Diosta mañanchij.
8 Mana llullapaj contraca imata mana rurai tucunchijchu. Ashtahuanpish mana llullapaj favormi imatapish rurai tucunchij.
9 Ñucanchijca imata mana rurai tucuj shina cashpapish cancuna sinchi cashcamantami cushicunchij. Cancunapaj yuyaitapish cambiachunmi Diosta mañacunchij.
10 Chaimantami cancunapajman manaraj rishpa caicunataca quillcani. Chashnami cancunahuan cashpaca mana sinchita rimasha. Amito Jesusca cancunata llaquichichunca mana ñucamanca autoridadta curcachu. Ashtahuanpish cancunata sinchiyachichunmi autoridadta curca.
11 Chaimanta huauquicuna, cashnami cancunataca animani. Cushicushpa catichij, cancunapaj yuyaitapish cutinllataj cambiashpa catichij, caishujcuna ayudachun saquichij, shuj yuyailla tucuichij, sumajta causaichij. Chashnami sumaj causaita cuj, cꞌuyaj Diosca cancunahuan canga.
12 Caishuj chaishuj chuya shunguhuan muchashpa saludanacuichij.
13 Tucui jucha illaj huauquicunami cancunamanca saludocunata cachan.
14 Amito Jesucristopaj yallitaj llaquij canapish, Diospaj cꞌuyaipish, tucuicuna chasquishca espíritu santopish cancunahuan cachunmi mañani.
Notacuna
^ Griego rimaipica: “testigocunapaj shimimantami” ninmi.
