2 Reyes 10:1-36
10 Samaria llajtapica Acabca 70 churicunatami charirca. Jehuca Jezreelpi pushajcunapajpish, autoridadcunapajpish,* Acabpaj churicunata cuidajcunapajpishmi* cartata quillcashpa Samaria llajtaman cacharca. Chaipica cashnami nirca:
2 “Cai cartata chasquishpaca cancunapaj amopaj churicunaca cancunahuanmi canga. Shinallataj cancunaca macanacuna carretacunata, caballocunata, muyundijta pircashca llajtata, macanacunacunatapishmi charinguichij.
3 Cancunapaj amitopaj churicunamanta ashtahuan yalli alli cajta agllaichij. Paitaca paipaj yayapaj tiyarinapi churaichij. Chashna cancunapaj amitopaj familiamanta macanacuichij” nircami.
4 Pero paicunaca achca manchaita charishpami: “¡Ricuichij! Ishquindij reycunaca Jehuhuanca mana chꞌimbapurai tucurcacunachu, ñucanchijcarin maitataj Jehuhuanca chꞌimbapurai tucushunyari” nircacuna.
5 Chaimi reypaj huasita ricujpish, llajtata mandajpish, autoridadcunapish, cuidajcunapish Jehuman cai huillaita cacharcacuna: “Cancunata sirvijcunami canchij. Can tucui ima nishcata rurashunllami. Maijanta rey cachunca mana agllashunchu. Cambaj ima alli cana cajpica rurailla” nircacuna.
6 Jehuca cutin shujtaj cartata quillcashpaca: “Cancuna ñucapaj lado cashpa, ñucata cazusha nishpaca cambaj amopaj churicunapaj umata apamuichij. Caya cai horasllataj Jezreelpi ricunaman shamunguichij” nircami.
Reypaj 70 churicunaca paicunata huiñachij chai llajtapi rijsishca runacunahuanmi carca.
7 Chai cartata chasquishpami reypaj churicunata japishpa huañuchircacuna. Tucui huañujcunaca 70 cꞌaricunami carca. Paicunapaj umacunataca canastacunapimi churarca. Chashnami Jezreelpi caj Jehuman cacharcacuna.
8 Huillaj runa Jehupajman chayamushpaca: “Reypaj churicunapaj umacunatami apamushcacuna” nircami. Chashna nijpimi Jehuca: “Cai llajta yaicuna pungupi ishqui montonta rurashpa churaichij. Chaitaca caya tutamantacama chaipi saquinguichij” nirca.
9 Cayandij tutamanta llujshishpaca tucui gentecunapaj ñaupajpimi Jehuca cashna nirca: “Ñucami ñuca amopaj contra jatarishpa paitaca huañuchircani. Chaimantami cancunaca ima culpata mana charinguichij. Shinapish ¿tucui caicunataca pitaj huañuchirca?
10 Caita yachaichij, Jehová Diosca Acabpaj familiapaj contrami parlarca. Jehová Dios parlashca shimicunaca shujllapish mana pajtarishpaca mana saquiringachu. Jehová Diosca paita sirvij Eliasman nishcacunatami pajtachishca” nircami.
11 Shinallataj Jehuca Jezreelpi saquirij Acabpaj familiacunataca tucuitami huañuchirca. Paipaj importante runacunatapish, rijsishcacunatapish, paipaj sacerdotecunatapish tucuimi huañuchirca. Chashnami Acabpaj familiamantaca ni shujllapish causashpa catichunca mana saquirca.
12 Chaimanta jatarishpami Jehuca Samariaman rirca. Pai rina ñanpica ovejacunata rutuna huasimi tiyarca.
13 Chaipimi Jehuca Judá llajtata mandaj rey Ocoziaspaj huauquicunahuan tupashpaca: “¿Cancunaca picunataj canguichij?” nishpa tapurca. Chashna nijpimi paicunaca: “Ocoziaspaj huauquicunami canchij. Reypaj churicunatapish, reypaj mamapaj churicunatapish allilla cashcata o mana allilla cashcata ricunamanmi ricunchij” nircacuna.
14 Chai ratomi Jehuca paipaj soldadocunataca: “¡Paicunata causajta japichij!” nishpa mandarca. Chashna nijpimi paicunataca causajta japishpa, ovejacunata rutuna huasi cꞌuchupi saquirij yacuta tandana jutcu ladopi huañuchircacuna. Tucui huañujcunaca 42 cꞌaricunami carca. Jehuca paicunamanta shujllapish causashpa catichunca mana saquircachu.
15 Chaimanta rishpaca paica Recabpaj churi Jehonadabhuanmi tuparca. Jehonadabca Jehuta tupanamanmi shamucushca carca. Jehonadab saludajpica:* “¿Ñuca canta tucui shunguhuan apoyaj shinallatajchu canpish ñucataca tucui shunguhuan apoyangui?” nishpami tapurca.
Jehonadabca: “Ari, chashnami can” nircami.
Chashna nijpimi Jehuca: “Chashna cajpica cambaj maquita cui” nirca.
Chaimi paica Jehumanca maquita curca. Shinallataj Jehuca paitaca paipaj carretamanmi huichiyachirca.
16 Jehuca: “Ñucahuan jacu, ñucaca Jehová Diospaj contra yallitaj juchata rurajcunataca mana saquishachu” nircami. Chashna nishpami Jehuca paipaj macanacuna carretapi paita pushashpa rirca.
17 Jehú runa Samariaman chayashpaca Jehová Dios Eliasman nishca shinami Acabpaj familiamanta Samaria llajtapi tucui saquirijcunataca huañuchirca.
18 Shinallataj Jehuca tucui gentecunata tandachishpaca cashnami nirca: “Acabca Baal diostaca ashallatami adorarca. Shinapish Jehuca chaitapish yallimi adoranga.
19 Ñucaca Baal diosmanmi jatun sacrificiota cugrini. Chaimanta Baal diospaj profetacunata, Baal diosta tucui adorajcunata, Baal diosta adoraj tucui sacerdotecunata cayaichij. Shujllapish ama illachun. Pero maijanpish mana shamujca huañungami” nircami. Pero paicunata chashna nishpaca Jehuca nij tucucurcallami. Paica Baal diosta tucui adorajcunatami tucuchisha nirca.
20 Shinallataj Jehuca: “Baal diospaj shuj jatun tandanacui tiyanata huillaichij”* nircami. Chaitami paicunaca huillarcacuna.
21 Chai huashaca Jehú chaita tucui Israel llajtapi huillachijpimi, Baal diosta adorajcunaca tucuicuna tandanacurcacuna. Shujllapish mana illarcacunachu. Paicuna Baal diospaj huasiman yaicujpica Baal diospaj huasica jundami tucurca.
22 Jehuca shuj cuartopi ropacunata cuidaj runataca: “Baal diosta tucui adorajcunapaj ropacunata surcui” nircami. Chashna nijpimi chai ropacunataca surcurca.
23 Jehupish, Recabpaj churi Jehonadabpish Baal diospaj huasimanmi yaicurcacuna. Chaimi Jehuca Baal diosta adorajcunamanca: “Jehová Diosta sirvijcuna caipi shujllapish ama tiyachunca alli ricushpa mashcanguichij. Baal diosta adorajcunalla tiyachun ricunguichij” nirca.
24 Chaimi paicunaca sacrificiocunata, rupachishca ofrendacunata Baal diosman cungapaj yaicurcacuna. Jehuca chai canlla ladopimi 80 cꞌaricunata churarca. Paicunataca: “Cai runacunataca cancunapaj maquipimi entregani. Maijanpish paicunata richun saquijca paicunapaj randimi huañunga” nircami.
25 Rupachishca ofrendata cushca huashallami Jehuca guardiacunata,* paita sirvij soldadocunataca: “¡Yaicushpa huañuchichij! ¡Shujllapish chaimanta llujshichunca amataj saquinguichij!” nirca. Chaimi guardiacunapish, sirvij soldadocunapish paicunata espadahuan huañuchircacuna. Chai huashaca paicunapaj cuerpotaca canllamanmi shitarcacuna. Shinallataj paicunaca Baal diospaj templopi caj ashtahuan ucu cuartomanmi* yaicurcacuna.
26 Chai Baal diospaj huasimanta adorana pilarcunatami llujshichishpa tucui rupachircacuna.
27 Baal diosta adorana pilartapishmi urmachircacuna. Shinallataj Baal diospaj huasita urmachishpami chaipica bañocunata rurarcacuna. Chaica cunancamami tiyashpa catin.
28 Chashnami Jehuca Israelmanta Baal diosta adoranata chingachirca.
29 Nebatpaj churi Jeroboanca juchacunata rurashpami israelitacunataca juchacunapi urmachirca. Paicunataca Betelpi tiyaj oro bizicunata, Danpi tiyaj oro bizicunatami adorachirca. Jehupish chai juchacunallatatajmi rurashpa catirca.
30 Jehová Diosca Jehutaca: “Ñuca ñahuipica allitami rurashcangui. Acabpaj familiahuanca ñuca shungupi munashca shinami rurashcangui. Chaimantami cambaj churicunataca chuscu huahua huahuacama Israelpi mandachun jatun tiyarinapi churasha” nircami.
31 Pero Jehuca israelitacunapaj Jehová Dios cushca leytaca mana tucui shunguhuan catircachu. Jeroboanca juchacunata rurashpami israelitacunatapish juchacunapi urmachirca. Jehupish chashna juchacunatami rurashpa catirca.
32 Chai punllacunapica Jehová Diosca israelitacunapaj allpataca shujtajcuna asha asha quichuchunmi saquirca. Hazaelca tucui Israel llajtatami llaquichirca.
33 Chashnami paica Jordán jatun yacumantaca inti llujshin ladocama Galaad tucui allpacunata mishashpa japirca. Galaad llajtapica Gadpaj familia, Rubenpaj familia, Manasespaj familiami causajcuna carca. Galaad llajtaca Aroer llajtamantaca Galaad, Basán llajtacamami carca. Aroer llajtaca Arnón pugru pamba cꞌuchupimi carca.
34 Jehupaj causaipish, tucui paipaj poderpish, pai tucui imalla rurashcapish Israel llajtamanta reycunapaj causaimanta parlaj libropimi quillcashca tiyacun.
35 Jehuca huañurcami.* Chaimi paitaca Samariapi pambarcacuna. Qꞌuipaca paipaj churi Jehoacazmi catij rey tucurca.
36 Jehuca Samaria llajtamantami Israel llajtata mandarca. Pai mandashca tiempoca* 28 huatacunami carca.
Notacuna
^ Hebreo rimaipica: “ancianocunapajpish” ninmi.
^ Hebreo rimaipica: “Acabpaj cuidajcunapajpishmi” ninmi.
^ O “bendiciajpica”.
^ Hebreo rimaipica: “chuyayachichij” ninmi.
^ Hebreo rimaipica: “callpajcunata” ninmi.
^ Hebreo rimaipica: “llajtamanmi” ninmi.
^ O “paipaj ñaupa yayacunahuanmi samarirca”.
^ Hebreo rimaipica: “punllacunaca” ninmi.
