2 Reyes 12:1-21
12 Jehú séptimo huatata ña mandacujpimi Jehoasca rey tucurca. Paica 40 huatacunatami Jerusalenpi mandarca. Paipaj mamaca Beer-Sebamanta Zibíah shuti huarmimi carca.
2 Sacerdote Jehoiadá causashca punllacunapi Jehoasta yachachijpica paica Jehová Diospaj ñaupajpica allicunatami rurarca.
3 Pero Jehoasca adorana lugarcunataca* mana anchuchircachu. Chaimantami gentecunaca chaicunapi sacrificiocunata ruranatapish, sacrificiota rupachishpa cushnichinatapish mana saquircacuna.
4 Jehoasca sacerdotecunamanca cashnami nirca: “Jehová Diospaj huasiman apamushca tucui cullquita chasquichij: cada uno impuesto pagashca cullquita, cada gentemanta mashna cullquita pagashcata, shungumanta cada uno Jehová Diospaj huasipaj cushca cullquitapish chasquichij. Chai cullquica Diospajlla chꞌicanyachishca ofrendacunapajmi can.
5 Gentecuna cushca cullquitaca sacerdotecunallami tandangacuna. Paicuna cushca cullquihuanca Diospaj huasi maipi dañarishcatami* allichingacuna” nircami.
6 Rey Jehoás 23 huatacunata mandacujpica sacerdotecunaca Diospaj huasi dañarishcacunataca manaraj allichishcacunachu carca.
7 Chaimi rey Jehoasca sacerdote Jehoiadatapish, shujtaj sacerdotecunatapish cayashpaca: “¿Imamantataj Diospaj huasitaca mana allichicunguichij? Gentecuna cushca cullquitaca ña ama chasquichijchu. Diospaj huasita allichina cajllapi cullquitaca chasquinguichij” nirca.
8 Sacerdotecunaca gentecuna cushca cullquita ña mana ashtahuan japingapajmi yuyarircacuna. Diospaj huasitapish mana allichinatami yuyarircacuna.
9 Sacerdote Jehoiadaca shuj cajata japishpami tapapi shuj jutcuta rurarca. Chai cajataca Jehová Diospaj huasiman yaicuna alli ladopi tiyaj altar cꞌuchupimi churarca. Punguta cuidaj sacerdotecunaca Jehová Diospaj huasiman apamushca cullquitami chaipi churajcuna carca.
10 Cajapi achca cullqui tiyashcata ricushpaca reypaj secretariopish, sacerdotecunata jatun mandajpish huichiyashpami chai cullquita tandajcuna* carca. Jehová Diospaj huasiman apamushca cullquitapishmi paicunaca cuentajcuna carca.
11 Paicunaca chai cuentashca cullquitaca Jehová Diospaj huasipi ruracushca trabajota ricujcunamanmi entregajcuna carca. Cutin ricujcunaca chai cullquitaca carpinterocunaman, Jehová Diospaj huasipi trabajocunata rurajcunamanmi pagajcuna carca.
12 Shinallataj albañilcunaman, rumita pꞌaquijcunamanpishmi pagajcuna carca. Jehová Diospaj huasita allichingapajca maderacunata, labrashca rumicunatapishmi randircacuna. Chai cullquitaca chai huasipi tiyaj shujtaj gastocunapajpishmi utilizarcacuna.
13 Ashtahuanpish chai cullquihuanca Jehová Diospaj huasipaj cullqui lavacaracunata, ninata huañuchinacunata, tazoncunata, trompetacunatapish mana ruranaman cachajcunachu carca. Jehová Diospaj huasipajpish oromanta, cullquimanta ima shujtaj cosascunataca mana ruranaman cachajcunachu carca.
14 Tucui chai cullquitaca chai trabajota rurajcunallamanmi cuj carcacuna. Chai cullquihuanmi paicunaca Jehová Diospaj huasita allichijcuna carca.
15 Trabajadorcunaman pagangapaj cullquita chasquij runacunataca tucuita alli pajtachijcuna cashcamantami cullquimantaca ima cuentata mana mañajcuna carca.
16 Shinapish culpamanta ofrendacunapaj cullquita, juchamanta ofrendacunapaj cullquitaca Jehová Diospaj huasimanca mana apamujcunachu carca. Ashtahuanpish chai cullquica sacerdotecunapajllami carca.
17 Siria llajtamanta rey Hazaelca Gad llajtaman huichiyashpami chai llajtahuan macanacushpa chai llajtata japirca. Chai qꞌuipaca paica Jerusalenta llaquichinatami decidirca.
18 Judá llajtamanta rey Jehoasca paipaj ñaupa yayacuna Jehosafat, Jehoram, Ocozías Diospajlla chꞌicanyachishca ofrendacunata cushcatami tandachirca. Paicunaca Judá llajtamanta reycunami carca. Jehoasca Diospajlla chꞌicanyachishca paipaj ofrendacunatapishmi tandachirca. Shinallataj Jehová Diospaj huasipi, reypaj huasipi* achca valij cosascunata huaquichina cuartocunapi tiyaj orotapishmi tandachirca. Tucui caicunatami Jehoasca Siria llajtamanta rey Hazaelman cushpa cacharca. Chaimi rey Hazaelca Jerusalenmanta rirca.
19 Jehoaspaj causaipish, pai tucui imalla rurashcapish Judá llajtamanta reycunapaj causaimanta parlaj libropimi quillcashca tiyacun.
20 Shinapish Jehoaspaj sirvijcunami paipaj contra jatarishpa Miló* nishca loma huasipi huañuchircacuna. Chai huasica Silaman uriyana ñanpimi carca.
21 Paita sirvij Simeatpaj churi Jozacarpish, Somerpaj churi Jehozabadpish Jehoastaca macashpami huañuchircacuna. Qꞌuipaca Davidpaj Llajtapimi paipaj ñaupa yayacunahuan paitaca pambarcacuna. Chai huashaca paipaj churi Amasiasmi catij rey tucurca.
Notacuna
^ Hebreo rimaipica: “alto lugarcunataca” ninmi.
^ O “chijtarishcatami”.
^ O “bolsacunapi churajcuna”. Hebreo rimaipica: “huatajcuna” ninmi.
^ O “palaciopi”.
^ O “Bet-Miló”.
