2 Reyes 13:1-25
13 Judá llajtamanta rey Ocoziaspaj churi Jehoás 23 huatacunata mandacujpimi, Israel llajtamanta rey Jehupaj churi Jehoacazca mandai callarirca. Jehoacazca 17 huatacunatami mandarca.
2 Jehová Diospaj ñaupajpica mana allicunallatami ruraj carca. Shinallataj Jehoacazca Nebatpaj churi Jeroboán juchacunata rurashpa, israelitacunatapish juchacunapi urmachishca shinallatajmi rurashpa catij carca. Chaita ruranamantaca mana anchurircachu.
3 Chaimantami Jehová Diosca israelitacunahuanca yallitaj pꞌiñarirca. Chaimi achca huatacunata Siriamanta rey Hazaelpaj maquipi, Hazaelpaj churi Ben-Hadadpaj maquipi Diosca paicunata entregarca.
4 Tiempo qꞌuipaca Jehoacazca Jehová Diostami rogarishpa mañarca. Chashna mañajpimi Jehová Diosca paita uyarca. Diosca Siria llajtamanta rey israelitacunata ima shina llaquichicushcatami ricurca.
5 Chaita ricushpami Jehová Diosca israelitacunata Siriamanta cacharichishpa quishpichichun shuj quishpichijta cacharca. Chaimantami israelitacunaca ñaupa shina tranquilo paicunapaj huasicunapi causai tucurcacuna.
6 (Shinapish Jeroboanpaj familia juchacunata rurashca shinallatajmi rurashpa catircacuna. Paica israelitacunatapish chai juchacunallapitajmi urmachishca carca. Israelitacunaca chai juchacunallatatajmi rurashpa catircacuna. Samariapipish adorana posteca* tiyashpami catirca).
7 Siria llajtamanta rey trillana granomanta tꞌamota shina tucuchishpa paicunata saquishcamantami Jehoacazca caballopi purij 50 soldadocunahuan, chunga carretacunahuan, 10.000 soldadocunallahuan saquirirca.
8 Jehoacazpaj causaipish, pai tucui imalla rurashcapish, paipaj poderpish Israel llajtamanta reycunapaj causaimanta parlaj libropimi quillcashca tiyacun.
9 Chai huashaca Jehoacazca huañurcami.* Paitaca Samariapimi pambarcacuna. Qꞌuipaca paipaj churi Jehoasmi catij rey tucurca.
10 Judá llajtamanta rey Jehoás 37 huatacunata mandacujpimi Israel llajtamanta rey Jehoacazpaj churi Jehoasca Samariapi mandai callarirca. Paica 16 huatacunatami mandarca.
11 Jehová Diospaj ñaupajpica mana allicunallatami ruraj carca. Shinallataj Jehoasca Nebatpaj churi Jeroboán juchacunata rurashpa israelitacunatapish juchacunapi urmachishca shinallatajmi rurashpa catij carca. Jehoasca Jeroboán rurashca juchacunallatatajmi rurarca.
12 Jehoaspaj causaipish, pai tucui imalla rurashcapish, paipaj poderpish, Judá llajtamanta rey Amasiaspaj contra macanacushcapish Israel llajtamanta reycunapaj causaimanta parlaj libropimi quillcashca tiyacun.
13 Qꞌuipaca Jehoasca huañurcami. Jeroboanca* Jehoás mandana jatun tiyarinapimi tiyarirca. Jehoastaca Israelpaj reycunahuanmi Samariapi pambarcacuna.
14 Eliseo shuj ungüihuan cajpimi Israelmanta rey Jehoasca paita ricungapaj uriyarca. Eliseoca asha tiempo qꞌuipaca chai ungüihuanmi huañurca. Eliseota rey ricunaman rishpaca paipaj jahuapi huacashpami: “¡Ñuca yayitulla, ñuca yayitulla! ¡Ricui, Israelpaj carretata, paipaj caballocunapi purijcunatapish!” nirca.
15 Chashna nijpimi Eliseoca: “Shuj arcota, flechacunata apamui” nirca. Chaimi paica shuj arcota, flechacunata apamurca.
16 Eliseoca Israelmanta reytaca: “Cambaj maquipi arcota charirai” nircami. Chaimi paica arcota charirarca. Chashna charicujpimi Eliseoca paipaj maquicunataca reypaj maquicuna jahuapi churarca.
17 Chaipimi Eliseoca: “Inti llujshin lado ventanata pascai” nirca. Chashna nijpimi paica chai ventanata pascarca. Eliseoca paitaca: “¡Flechata shitai!” nircami. Chaimi reyca flechata shitarca. Chaipimi Eliseoca paitaca: “¡Caica Jehová Diospaj mishachina* flechami, cai flechaca Siria llajtatami mishachinga! Siria llajtataca Afecpimi tucuchishpa mishangui” nirca.
18 Qꞌuipaca Eliseoca: “Chai flechacunata charirai” nircami. Shina nijpimi reyca chai flechacunata charirarca. Chaimi Eliseoca Israelmanta reytaca: “Pambata huajtai” nirca. Chashna mandajpimi paica quimsa cutinlla pambata huajtarca.
19 Chashna rurajpimi Diosta sirvij runaca yallitaj paihuan pꞌiñarishpaca: “¡Pambataca pichca o sujta cutinmi huajtana carcangui! Canca chashna rurashpaca Siria llajtataca tucuchinguimanmi carca. Shinapish canca Siria llajtataca quimsa cutinllami mishangui” nirca.
20 Chai qꞌuipaca Eliseo huañujpimi paitaca pambarcacuna. Huata callari punllacunapica Moab llajtamanta achca shuhuacunami Israel llajtamanca yaicujcuna carca.
21 Shuj punllaca huaquin runacunami shuj huañushca runata pambacushpa achca shuhuacunata ricurcacuna. Chaita ricushpami paicunaca chai huañushcapaj cuerpota Eliseopaj pambashcapi shitashcahuan chaimanta miticunaman rircacuna. Chai huañushca runa Eliseopaj tullucunahuan tuparishpaca cutin causarishpami shayarirca.
22 Jehoacaz mandacui punllacunapimi Siria llajtamanta rey Hazaelca Israel llajtata llaquichirca.
23 Ashtahuanpish Jehová Diosca paicunamanca cꞌuyashcata, llaquishcatami ricuchirca. Abrahanhuan, Isaachuan, Jacobhuan shuj ari ninacuita rurashcamantami paicunataca llaquirca. Chaimantami paicunataca mana tucuchirca. Cunan punllacunacamami paipaj ñaupajmantapish mana anchuchishca.
24 Siria llajtamanta rey Hazael huañujpimi paipaj churi Ben-Hadadca catij rey tucurca.
25 Hazaelca macanacushpami Jehoacaztaca llajtacunata quichushca carca. Chai llajtacunatami Jehoacazpaj churi Jehoasca Hazaelpaj churi Ben-Hadadta quichurca. Jehoasca quimsa cutin mishashpami Israel llajtapi tiyaj llajtacunata japirca.
Notacuna
^ “Adorana poste” shimita huasha diccionariopi ricui.
^ O “paipaj ñaupa yayacunahuanmi samarirca”.
^ Caipica Jeroboán II mandajmantami parlacun.
^ O “quishpichina”.
