2 Reyes 16:1-20
16 Remaliaspaj churi Pécah 17 huatacunata mandacujpimi rey Jotanpaj churi Acazca Judá llajtata mandai callarirca.
2 Acazca 20 huatacunata charishpami mandai callarirca. Paica Jerusalenpica 16 huatacunatami mandarca. Paipaj Jehová Diospaj ñaupajpica paica mana allicunatami rurarca. Paipaj ñaupa yaya David rurashca shinaca mana rurarcachu.
3 Chaipaj randica Israel llajtamanta reycunapaj ejemplotami catirca. Paica israelitacunapaj ñaupajmanta Jehová Dios llujshichishpa cachashca llajtacuna shinallatajmi millanana ruraicunata rurashpa causarca. Paipaj churitapish ninapimi rupachirca.
4 Adorana lugarcunapi,* urcucunapi, tucui pꞌangasapa yura ucucunapipishmi sacrificiocunata rurarca. Shinallataj sacrificiota rupachishpami cushnichij carca.
5 Siria llajtamanta rey Rezinpish, Israel llajtamanta Remaliaspaj churi rey Pecahpish Acazpaj contrami macanacunaman llujshircacuna. Paicunaca chai llajta muyundijta shayarishpapish chai llajtataca mana japircacunachu.
6 Chai qꞌuipaca Siria llajtamanta rey Rezinmi Elat llajtata japishpa Edomman tigrachirca. Qꞌuipaca Elatpi caj judiocunatami* llujshichishpa cacharca. Chashna llujshichishpa cachajpimi edomitacunaca Elatpi causarcacuna. Paicunaca cunancamami chaipi causashpa catincuna.
7 Chaimi Acazca Asiriamanta rey Tiglat-Pilesermanca huillajcunata cacharca. Paica: “Ñucaca canta sirvij, cambaj churimi cani. Siria llajta reypaj maquimanta, Israel llajta reypaj maquimantapish ñucata quishpichingui huichiyamui. Paicunami ñucataca llaquichicuncuna” nircami.
8 Acazca Jehová Diospaj huasimanta, reypaj huasimanta* achca valij cosascunata huaquichina cuartopi caj cullquita, orota japishpami Asiriamanta reyman shuj camarita shina cacharca.
9 Asiriamanta reyca paita ayudangapajmi Damascoman huichiyarca. Chaipimi chai llajtata japishpa, chai llajtapi causaj gentecunatapish Quir llajtaman prezu cacharca. Rezintapish huañuchircami.
10 Rey Acazca Asiriamanta rey Tiglat-Pilesertami Damascopi ricunaman rirca. Rey Acazca Damascopi altarta ricushpami sacerdote Uriyamanca chai altar ima shina dibujashca cashcata, ima shina rurashca cashcata shuj planopi cacharca.
11 Sacerdote Uriyaca rey Acaz mandashca shinami shuj altarta rurarca. Chaita rurachunca Damascomantami mandashca carca. Manaraj rey Acaz Damascomanta tigrajpimi sacerdote Uriyaca chai altarta ruranataca ña tucuchirca.
12 Rey Acaz Damascomanta tigramushpaca chai altarta ricushpami, chai altarman cꞌuchuyashpa chaipi ofrendacunata curca.
13 Chai altarpimi rupachishca ofrendacunata, grano ofrendacunata cushnichishpa catirca. Shinallataj chai altarpica vino ofrendacunatapishmi tallirca. Shujtaj sacrificiocunapaj* yahuartapishmi altarpi tsiraparca.
14 Jehová Diospaj ñaupajpi caj cobre altartaca huasi ñaupajpi tiyacushca lugarmantami anchuchirca. (Chai cobre altarca pai rurachishca mushuj altarhuan, Jehová Diospaj huasihuan chaupipimi carca). Chashna anchuchishpami chai cobre altartaca pai rurashca mushuj altarpaj janaj ladopi churarca.
15 Rey Acazca sacerdote Uriyamanca: “Chai jatun altarpica tutamanta ladopi cuna rupachishca ofrendatapish, chishi ladopi cuna grano ofrendatapish, reypaj rupachishca ofrendatapish, paipaj grano ofrendatapish cushnichingui. Shinallataj rupachishca ofrendacunatapish, grano ofrendacunatapish, tucui gentecuna cushca vino ofrendacunatapish chai altarpi rupachishpa cushnichingui. Cutin rupachishca sacrificiocunapaj tucui yahuartapish, shujtaj sacrificiocunapaj tucui yahuartapish tsirapangui. Chai cobremanta rurashca altarhuan imata ruranataca ñucami decidisha” nircami.
16 Sacerdote Uriyaca rey Acaz imata mandashcatami tucuita rurarca.
17 Shinallataj rey Acazca chai uchilla carretacunapaj ladocunapi tiyaj planchacunataca mirga mirgami pꞌitirca, tanquecunatapishmi anchuchirca. Cobrehuan rurashca torocunapaj jahuapi tiyaj jatun tanquetapish* uriyachishpami rumicuna tiyan pamba jahuapi churarca.
18 Rey Acazca Jehová Diospaj huasimanta sábado punllapaj rurashca huasi techotami anchuchirca. Canlla ladomanta rey yaicunatapishmi anchuchirca. Tucui caitaca Asiria llajta reymantami chashna rurarca.
19 Acazpaj causaipish, pai tucui imalla rurashcapish Judá llajtamanta reycunapaj causaimanta parlaj libropimi quillcashca tiyacun.
20 Acazca huañurcami.* Paitaca Davidpaj Llajtapimi paipaj ñaupa yayacunahuan pambarca. Chai qꞌuipaca paipaj churi Ezequiasmi* catij rey tucurca.
Notacuna
^ Hebreo rimaipica: “Alto lugarcunapi” ninmi.
^ O “Judamanta cꞌaricunatami”. “Judío” shimita huasha diccionariopi ricui.
^ O “palaciomanta”.
^ O “Dioshuan alli tucungapaj cushca sacrificiocunapaj”.
^ Hebreo rimaipica: “Mama cuchatapish” ninmi.
^ O “paipaj ñaupa yayacunahuanmi samarirca”.
^ “Ezequías” shutica ‘Jehová Diosmi sinchiyachin’ nisha ninmi.
