2 Reyes 22:1-20
22 Josiasca pusaj huatacunata charishpami mandai callarirca. Paica 31 huatacunatami Jerusalenpi mandarca. Paipaj mamaca Bozcat llajtamanta Adayapaj ushushi Jedidá shutimi carca.
2 Josiasca Jehová Diospaj ñaupajpica allicunatami rurarca. Paica paipaj ñaupa yaya Davidpaj ejemplotami catirca. Paica alli ladomanpish, lluqui ladomanpish mana anchurishpami ima pandata mana rurarca.
3 Rey Josiasca 18 huatacunata mandacushpami Jehová Diospaj huasiman secretario Safanta cacharca. Safanca Azaliaspaj churimi carca. Azaliasca Mesulampaj churimi carca. Josiasca Safanmanca caitami nirca:
4 “Sacerdotecunata jatun mandaj Hilquiasta ricunaman huichiyai. Hilquiasmi Jehová Diospaj huasiman apashca tucui cullquitaca tandachina can. Punguta cuidajcunami chai cullquitaca gentecuna cushcata tandashcacuna carca.
5 Shinallataj Jehová Diospaj huasipi trabajota ricujcunapish chai cullquita chasquichun ricungui. Paicunami Jehová Diospaj huasipi dañarishcacunata* allichishpa trabajajcunaman cullquita cunga.
6 Artesanocunapish, obrerocunapish, albañilcunapishmi chai trabajocunataca rurangacuna. Paicunami chai cullquihuan Diospaj huasita allichingapaj caspicunata, labrashca rumicunata randingacuna.
7 Pero paicuna chasquishca cullquimantaca ima cuentata ama mañanguichij. Paicunaca tucuita imatapish alli pajtachij runacunami can” nircami.
8 Qꞌuipamanca sacerdotecunata jatun mandaj Hilquiasca secretario Safanmanca: “Jehová Diospaj huasipimari Leyta quillcashca librota japini” nircami. Chai librotami Hilquiasca secretario Safanman curca. Chaimi Safán runaca chai librota liyi callarirca.
9 Shinaca secretario Safanca reyta ricunaman rishpami: “Canta sirvijcunaca Diospaj huasipi tiyaj cullquitami tandashcacuna. Chashna tandashpami Jehová Diospaj huasipi trabajocunata ricujcunaman curcacuna” nirca.
10 Chai qꞌuipaca secretario Safán runaca reymanca: “Sacerdote Hilquiasmi cai librota curca” nishpami reypaj ñaupajpi liyi callarirca.
11 Reyca Leyta quillcashca libropi ima nishcata uyashcahuanmi paipaj churanata lliquirirca.
12 Chaimi reyca sacerdote Hilquiasmanpish, Safanpaj churi Ahicammanpish, Micayapaj churi Acbormanpish, secretario Safanmanpish, reyta sirvij Asayamanpish caita mandarca:
13 “Richij, cancuna japishca libropi ima nishcata ñucamantapish, gentecunamantapish, tucui Judapi causajcunamantapish Jehová Diosta tapugrichij. Ñucanchij ñaupa yayacunaca chai libropi quillcashca shimicunataca mana cazurcacunachu, ñucanchijpaj tucui imalla quillcashcacunatapish mana pajtachircacunachu. Chaimantami Jehová Diosca ñucanchijhuan yallitaj pꞌiñarishca can” nircami.
14 Chaimi sacerdote Hilquiasca, Ahicamhuan, Acborhuan, Safanhuan, Asayahuan profeta Huldá huarmita ricunaman rircacuna. Huldaca Salumpaj huarmimi carca. Salumca Ticvapaj churimi carca. Ticvá runaca Harhaspaj churimi carca. Salumca shuj cuartopimi ropacunata cuidaj carca. Profeta Huldá huarmica Jerusalenpi saquirij mushuj barriopimi causaj carca. Paicunaca chaipimi Huldá huarmihuanca parlarcacuna.
15 Huldá huarmica paicunamanca: “Israelitacunapaj Jehová Diosca cashnami nin: ‘Ñucata ricunaman cachaj runamanca caita nichij:
16 “Caitami Jehová Diosca nin: ‘Cai llajtatapish tucuchishami. Chaipi causajcunatapish castigashami. Judá llajtamanta rey liyishca libropi tucui imalla nishcacunatapishmi pajtachisha.
17 Cancunaca ñucatami saquishcanguichij. Shujtaj dioscunamanpish sacrificiocunata rupachishpami cushnichicunguichij. Chashnami cancunapaj tucui ruraicunahuan ñucata yallitaj pꞌiñachicunguichij. Chaimantami cai lugarhuan yallitaj pꞌiñarishpa nina sindirij shina pꞌiñarinataca manataj saquisha’ ninmi” ninguichij.
18 Pero Jehová Diosta tapunaman cachaj Judá llajtamanta reymanca cashna nichij: “Israelitacunapaj Jehová Diosca cashnami nin: ‘Canca chai quillcashcacunata uyashcahuanmi
19 cambaj shungupica llaquirircangui. Cai lugarmanta, caipi causajcunamanta imata nishcata uyashpaca cambaj Jehová Diospaj ñaupajpimi humillarircangui. (Paicunaca maldicishcami cangacuna. Chaita uyashpami gentecunapish paicunamanta mancharingacuna). Cambaj ropatapish lliquirishpami ñuca ñaupajpi huacarcangui. Chaimi ñucaca canta uyarcani. Ñuca, Jehová Diosllatajmi chashna nini.
20 Chaimantami cai lugartapish, chaipi causaj gentecunatapish ñuca llaquichigrishcata cambaj ñahuihuanca mana ricungui. Chai llaquicunata mana ricushpami canca tranquilo pambashca cangui. Cantaca cambaj ñaupa yayacunahuanmi tandachisha’ ninmi”’” nircami. Chaimi paicunaca Dios ima nishcataca reyman huillanaman rircacuna.
Notacuna
^ O “chijtarishcacunata”.
