2 Reyes 24:1-20
24 Jehoiaquim mandacui punllacunapimi Babilonia llajtamanta rey Nabucodonosorca paihuan macanacungapaj shamurca. Jehoiaquimca quimsa huatacunatami rey Nabucodonosorta sirvij carca. Qꞌuipaca Jehoiaquimca rey Nabucodonosorpaj contrami jatarirca.
2 Jehová Diosca caldeocunamanta, siriocunamanta, moabitacunamanta, ammonitacunamantami achca shuhuacunata Jehoiaquimpaj contra cachai callarirca. Jehová Dios paita sirvij profetacunaman nishca shinami Judá llajtata tucuchingapaj chashna cacharca.
3 Jehová Dios mandashcamantami Judá llajtahuanca chashna tucurca. Diosca Manasés juchacunata rurashcamantami paicunataca chashna paipaj ñaupajmanta anchuchinata munarca.
4 Manasesca mana culpata charij runacunatami huañuchirca. Chashnami Jerusalenpica achca yahuarta jicharca. Chaimantami Jehová Diosca Judá llajtata mana perdonasha nirca.
5 Jehoiaquimpaj causaipish, pai tucui imalla rurashcapish Judá llajtamanta reycunapaj causaimanta parlaj libropimi quillcashca tiyacun.
6 Jehoiaquimca huañurcami.* Chai qꞌuipaca paipaj churi Joaquinmi catij rey tucurca.
7 Babilonia llajtamanta reyca Egipto llajtamanta reytaca Egipto pugru pambamanta Éufrates jatun yacucamami tucuita quichushca carca. Chaimantami Egipto llajtamanta reyca paipaj llajtamanta mana ashtahuan llujshirca.
8 Joaquinca 18 huatacunata charishpami rey tucurca. Paica quimsa quillacunatami Jerusalenpi mandarca. Paipaj mamaca Jerusalenmanta Elnatanpaj ushushi Nehustá huarmimi carca.
9 Joaquinca paipaj yaya shinallatajmi Jehová Diospaj ñaupajpica mana allicunata ruraj carca.
10 Chai tiempopica Babilonia llajtamanta rey Nabucodonosorpaj soldadocunaca Jerusalenhuan macanacungapajmi huichiyarcacuna. Chaimantami chai llajta muyundijta shayarircacuna.
11 Babiloniamanta soldadocuna chai llajta muyundijta shayaringacamaca rey Nabucodonosorca Jerusalenmanmi shamurca.
12 Judá llajtamanta rey Joaquinca paipaj llajtamanta llujshishpami paipaj mamandij, paita sirvijcunandij, paipaj mandajcunandij, paipaj palaciopi achca autoridadta charijcunandij Babilonia llajtamanta reyman entregarircacuna. Pusaj huatacunata rey Nabucodonosor mandacushpami paitaca prezu aparca.
13 Babilonia llajtamanta reyca Jehová Diospaj huasimantapish, reypaj huasimantapishmi* achca valij cosascunata llujshichirca. Shinallataj oromanta rurashca tucui shujtaj cosascunatami ñutuchirca. Chaicunataca Israel llajtamanta rey Salomonmi Jehová Diospaj huasipaj rurashca carca. Chaica Jehová Dios nishcacuna pajtarichunmi chashna tucurca.
14 Jerusalenmanta tucui mandajcunata, tucui sinchi macanacujcunata, tucui artesanocunata, fierrohuan trabajajcunatapishmi* tucuicunata prezu aparca. Tucuitaca 10.000 gentecunatami prezu aparca. Paicunamantaca shujllapish mana saquirircachu. Pobre gentecunallami chai llajtapica saquirirca.
15 Chashnami rey Joaquintaca Babiloniaman prezu aparca. Shinallataj paipaj mamatapish, reypaj huarmicunatapish, palaciopi achca autoridadta charijcunatapish, chai llajtamanta rijsishca cꞌaricunatapishmi Jerusalenmanta Babiloniaman prezu aparca.
16 Babilonia llajtamanta reyca 7.000 macanacujcunata, 1.000 artesanocunata, fierrohuan trabajajcunatapishmi Babilonia llajtaman prezu aparca. Paicunaca tucuicunami fuerzasapa runacuna, macanacunata alli yachajcuna carca.
17 Babiloniamanta reyca Joaquinpaj randimi Mataniasta rey cachun churarca. Mataniasca Joaquinpaj tiomi carca. Mataniastaca Sedequías shutihuanmi cambiarca.
18 Sedequiasca 21 huatacunata charishpami rey tucurca. Paica 11 huatacunatami Jerusalenpica mandarca. Paipaj mamaca Libná llajtamanta Jeremiaspaj ushushi Hamutal huarmimi carca.
19 Sedequiasca Jehoiaquim shinallatajmi Jehová Diospaj ñaupajpica mana allicunata ruraj carca.
20 Jehová Diosca Jerusalenpi, Judapi causajcunahuan yallitaj pꞌiñarishca cashcamantami tucui chaicuna tucuchun saquirca. Cashnami Diosca paipaj ñaupajmanta paicunataca anchuchirca. Qꞌuipaca Sedequiasca Babilonia llajtamanta reypaj contrami jatarirca.
Notacuna
^ O “paipaj ñaupa yayacunahuanmi samarirca”.
^ O “palaciomantapishmi”.
^ Caitaca “sinchi pircacunata shayachijcuna” nishpapishmi traducishcacuna.
