2 Reyes 6:1-33
6 Profetacunapaj churicunaca Eliseomanca cashnami nircacuna: “¡Ricui! Ñucanchij canhuan causacushca lugarca yallitaj uchillamari can.
2 Jordán jatun yacuman richun saquihuai. Chaimanta yuracunata pꞌitishpa, apamushpa ñucanchij maipi causana lugarta rurangapaj saquihuai” nircacunami. Shina nijpimi paica: “Richijlla” nirca.
3 Paicunapuramanta shujmi: “¿Canta sirvijcunahuan huichiyai tucunguichu?” nirca. Chashna nijpimi Eliseoca: “Ari, cancunahuan rishallami” nirca.
4 Chashnami paicunahuan rishpa, Jordanman chayashpaca chaipi yuracunata pꞌiti callarircacuna.
5 Paicunamanta shuj runa yurata pꞌiticujpimi hachapaj umaca yacuman urmarca. Chaimi: “¡Aij ñuca amitolla! ¡Chai hachaca mañachishcallamari carca!” nishpa sinchita caparirca.
6 Shina nijpimi Diosta sirvij runaca: “¿Maipitaj urmarca?” nishpa tapurca. Chashna tapujpimi maipi urmashcata ricuchirca. Chaimi Eliseoca shuj caspita pꞌitishpa, chai hacha urmashcapi shitarca. Chashna shitajpimi chai hacha umaca yacu jahuapi huamburca.
7 Chaipimi paitaca: “Hachata llujshichi” nirca. Chaimi chai runaca maquita chutashpa hachata yacumanta llujshichirca.
8 Siria llajtamanta reyca Israelpaj contrami macanacunaman rirca. Chaipimi Siriamanta reyca paita sirvijcunata tapushpa, carpa huasicunapi paipish, paita sirvijcunapish maipi saquirina cashcata huillarca.
9 Ashtahuanpish Diosta sirvij runaca Israel llajtamanta reytaca cashna ninamanmi cacharca: “Cuidaringui, chai lugartaca ama pasangui. Siriocunami macanacungapaj uriyamucun” nirca.
10 Chaimi Israelmanta reyca Diosta sirvij runa nishca lugarpi caj paipaj gentecuna cuidarichun huillaj cacharca. Eliseo advirtishpa catishcamantami reyca chai lugarcunamantaca achca cutin caruyarca.
11 Siria llajtamanta reyca* yallitaj pꞌiñarishpami paita sirvijcunata tandachishpa: “¡Huillaichij! ¿Ñucanchijpuramantaca maijantaj Israelpaj parte canguichij?” nirca.
12 Chaimi paita sirvijmanta shujca: “¡Ñuca amito reylla, mana pi paipaj parte canchijchu! Israelitacunapaj profeta Eliseomari can. Paimari Israel llajtamanta reymanca cambaj dormina cuartopi imalla nishcata parlan” nishpa cutichirca.
13 Chaimi reyca: “Eliseo maipi cashcata mashcanaman richij. Chashnami huaquin runacunata paita japinaman cachanguichij” nirca. Asha tiempo qꞌuipaca: “Eliseoca Dotán llajtapimari can” nircacunami.
14 Shina nincami caballocunata, macanacuna carretacunata, achca soldadocunata chaiman cacharca. Chashnami paicunaca tuta chayashpa chai llajta muyundijpi shayarircacuna.
15 Diosta sirvij Eliseo runata sirvij runaca tutamanta utca jatarishpami canllaman llujshirca. Chaipimi soldadocuna caballocunahuan, macanacuna carretacunahuan chai llajta muyundijta shayacujta ricurca. Chai ratomi Eliseota sirvij runaca: “¡Aij ñuca amito! ¿Cunanca imatataj rurashunyari?” nirca.
16 Shinapish Eliseoca: “¡Ama manchaichu! Ñucanchijhuan cajcunamari paicunata ashtahuan yalli” nishpami cutichirca.
17 Chaimi Eliseoca Diosta mañashpaca: “Ñuca Jehová Dioslla, pai ricuchun paipaj ñahuita pascachunmi rogapani” nirca. Chashna nincami Eliseota sirvijpaj ñahuita Jehová Dios pascajpi paica ricui tucurca. ¡Chai urcucunapica ninahuan yallitaj caballocunapish, macanacuna carretacunapish Eliseopaj muyundijpi shayacujtami ricurca!
18 Siriamanta cajcuna Eliseo maipi cashcaman uriyajpica Eliseoca Jehová Diostami mañarca. Paica: “Cai gentecunata mana ricujta rurapai” nircami. Chashna nijpimi Eliseo mañashca shina Diosca tucuicunapaj ñahuita mana ricujta rurarca.
19 Chaimi Eliseoca chai runacunataca: “Cai ñanca mana cancuna rina llajtaman pushanchu. Ñucata catichij, cancuna mashcacushca runapajmanmi cancunataca pushasha” nirca. Pero paicunataca Samariamanmi pusharca.
20 Paicuna Samaria llajtaman chayajpica Eliseoca: “Ñuca Jehová Dioslla, paicunapaj ñahuicunata pascapai” nircami. Chashna nijpimi Jehová Diosca paicunapaj ñahuicunata pascarca. Chaimi paicunaca Samaria llajta chaupipi cashcata ricurcacuna.
21 Israelmanta rey paicunata ricushpaca Eliseotaca: “¿Ñuca yayitulla, paicunataca huañuchishachu? ¿Huañuchishachu?” nircami.
22 Shinapish Eliseoca: “Ama huañuchichu. Canca cambaj espadahuan, cambaj arcohuan prezu apamushcacunataca mana huañuchinguichu ¿nachu? Ashtahuanpish paicuna tandata micuchun, yacuta ubyachun cui. Chashna paicunapaj amopajman tigrachun saqui” nircami.
23 Chaimantami paicunapaj shuj jatun micuita rurajpi paicunaca micurcacuna, ubyarcacuna. Qꞌuipaca paicunapaj amopajmanmi tigrachishpa cacharca. Chaimi Siria llajtamanta achca shuhua soldadocunaca Israel allpacunaman mana ashtahuan tigrarcacuna.
24 Chai huashaca Siria llajtata mandaj rey Ben-Hadadca tucui soldadocunatami tandachirca. Chashnami Samaria llajtaman huichiyashpa chai llajta muyundijpi shayarircacuna.
25 Chaimantami Samaria llajtapica yallitaj yaricaihuan sufrircacuna. Siria soldadocuna chai llajta muyundijta shayarishcamantami shuj burro umaca 80 siclo cullqui valirca. Shinallataj ishqui puñado* palomapaj ismacunapish 5 siclo cullquimi valirca.
26 Israel llajtamanta rey, pirca jahuata puricujpimi shuj huarmica: “¡Aij ñuca amito reylla! ¡Ñucanchijta ayudahuai!” nishpa caparirca.
27 Chashna caparijpimi reyca: “Canta Jehová Dios mana ayudajpica, ¿ñucaca canta ayudangapajca maimantataj imata llujshichishayari? ¿Canca micunata, vinota, aceiteta ñuca cui tucushcatachu yuyangui?” nirca.
28 Reyca paitaca: “¿Imataj tucungui?” nishpami tapurca. Chashna nijpimi paica: “Cai huarmimi ñucataca: ‘Cunanca cambaj churita micungapaj cui, cutin cayaca ñuca churitami micushun’ nirca.
29 Chaimi ñuca huahuata yanushpa micurcanchij. Cayandij punllataca ñucaca: ‘Cambaj huahuata apamui yanushpa micungapaj’ nircanimi. Pero paica paipaj huahuataca pacashcami carca” nircami.
30 Chai huarmi chashna nishcata uyashpami reyca paipaj churanata lliquirirca. Rey pirca jahuapi puricujpimi gentecunaca paipaj churana ucupi racu sacota* churashcata ricurcacuna.
31 Chaimi reyca: “¡Cunanllataj Safatpaj churi Eliseopaj umata mana pꞌitijpica Diosllataj ñucata sinchita castigachun!” nirca.
32 Eliseoca paipaj huasipimi autoridadcunahuan* tiyacurca. Reyca paita ñaupashpa richunmi shuj huillajta cacharca. Shinapish chai huillaj runa manaraj chayajpimi Eliseoca chai autoridadcunamanca: “¿Huañuchij runapaj chai churi ñuca umata pꞌitinaman cachashcata ricushcanguichijchu? Chai huillaj runa chayajta chapanguichij. Pai ama pascachunca punguta huichcaichij, huichcashpaca jarcanguichij. ¿Chai huillajpaj huashata paipaj amo shamucujtaca manachu uyanguichij?” nirca.
33 Eliseo paicunahuan parlacujpirajmi chai huillaj runaca chayamurca. Chaimi rey shamushpaca: “Cai llaquica Jehová Diosmantami shamun. ¿Imamantataj Jehová Diospaj ayudata shuyashpa catishayari?” nirca.
Notacuna
^ Hebreo rimaipica: “reypaj shunguca” ninmi.
^ Hebreo rimaipica: “shuj cabta chushcupi chuapishca shuj parte” ninmi. Shuj cabca 1.22 litrocunatami charirca. Ayuda B14-ta ricui. “Cab” shimita huasha diccionariopi ricui.
^ O “pꞌaza sacota”, “cañamazu sacota”.
^ Hebreo rimaipica: “ancianocunahuan” ninmi.
