2 Samuel 1:1-27
1 Saúl huañushca qꞌuipaca Davidca amalequitacunata mishashpami tigramushca carca. Paica ishqui punllacunatami Ziclag llajtapi saquirirca.
2 Ña quimsa punlla tucujpica Saulpaj soldadocunamantami shuj runa shamurca. Paica lliqui ropata churarishca, llaquilla cashcamanta umapipish ñutu allpata churarishcami shamurca. Chai runa Davidpajman cꞌuchuyashpaca pambaman urmashpami cungurirca.
3 Davidca: “¿Maimantataj shamungui?” nishpami tapurca. Chashna tapujpica chai runaca: “Israelitacunapaj soldadocuna macanacucuj lugarmantami miticushpa shamuni” nircami.
4 Chaimi Davidca: “¿Macanacuipi ima tucushcata huillahuai?” nishpa tapurca. Chashna tapujpimi chai runaca: “Macanacuimantami gentecunaca miticushpa rishcacuna. Achcacunami huañushcacuna. Saulpish, paipaj churi Jonatanpishmi huañushca” nishpa cutichirca.
5 Chashna nijpimi Davidca chai huillaita apamuj joventaca: “¿Ima shinataj Saulpish, paipaj churi Jonatanpish huañushca cashcataca yachangui?” nishpa tapurca.
6 Chai jovenca: “Ñucaca Guilboa urcupimi carcani. Chaipimi Saúl paipaj lanzallapitaj taunaricujta ricurcani. Macanacuna carretacunapish, caballopi purijcunapish paipajman cꞌuchuyacujtami ricurcani.
7 Saulca tigralla ricushpaca ñucatami cayarca. Chaimi ñucaca: ‘‘¿Imatataj canmantaca rurai tucuni?” nishpa tapurcani.
8 Saulca: ‘¿Canca pitaj cangui?’ nishpami tapurca. Shina tapujpimi ‘Ñucaca shuj amalequitami cani’ nishpa cutichircani.
9 Chashna cutichijpimi paica: ‘Caiman shamupai, ñucata huañuchi, ñucaca yallitaj nanaihuanmari cani, chashna jahuapish ñucaca causacunirajmari’ nirca.
10 Chashna nijpimi ñucaca pai yallitaj chugririshca cashcamanta, ña mana causana cashcata yachashpa paipajman cꞌuchuyashpa huañuchircani. Chaimi paipaj umamanta coronatapish,* paipaj rigrapi caj brazaletetapish quichushpa ñuca amitopajman apamurcani” nircami.
11 Chaita uyashpami Davidca paipaj churanata lliquirirca. Paihuan caj tucui runacunapish chashnallatajmi rurarcacuna.
12 Saultapish, paipaj churi Jonatantapish, Jehová Diospaj pueblomanta achca gentecunatapish, achca israelitacunatapish espadahuan huañuchishcamantami paicunaca caparishpa, huacashpa chishiyangacama ayunarcacuna.
13 Davidca noticiata apamuj joventaca: “¿Canca maimantataj cangui?” nishpami tapurca. Chaimi chai jovenca: “Ñucaca shujtaj llajtamanta shamushca, shuj amalequitapaj churimi cani” nishpa cutichirca.
14 Chashna nijpimi Davidca: “¿Jehová Dios agllashca runapaj jahuapica imamantataj cambaj maquita churashpa huañuchircanguiyari?” nirca.
15 Chashna nishpami Davidca paihuan caj runacunamanta shuj runata cayashpaca: “Shamui, paita huañuchi” nirca. Chashna nijpimi chai runaca paita espadahuan chugrichishpa huañuchirca.
16 Davidca chai joventaca: “‘Jehová Dios agllashca runataca ñucallatajmi huañuchircani’ nishpaca cambaj shimillahuantajmi juchachirishcangui. Chaimantami cambaj huañuimantaca canllataj culpayuj cangui”* nircami
17 Davidca Saulmantapish, Saulpaj churi Jonatanmantapish llaquilla cantotami cantarca.
18 Chai cantotaca Judamanta gentecunamanpish yachachinami can nircami. Cai llaquilla cantoca “Arco” nishca shutimi carca. Cai cantoca Jasar shuti libropimi quillcashca can. Chaipica:
19 “¡Aij Israel llajtalla! Sumaj gentecunaca cambaj urcucunapimari huañushcacuna.
¡Sinchi runacunaca macanacuipimari huañushcacuna!
20 Chaitaca Gat llajtapica ama parlaichijchu.Asquelón ñancunapipish ama huillaichijchu.Filisteocunapaj ushushicuna ama cushicuchun,circuncisionta mana rurashcacunapaj ushushicuna cushicushpa ama tushuchun.
21 Guilboa urcucunalla,cancunapaj jahuapica shullapish, tamyapish ama tiyachun,cancunapaj allpacunapish Diospajlla chꞌicanyachishca ofrendacunata ama pꞌucuchun.Chaipimi sinchi runacunapaj escudoca mapayachishca carca.Saulpaj escudopish aceitehuan ña mana agllashcachu.
22 Huañushcacunapaj yahuar ñaupajpi, sinchi runacunapaj huira ñaupajpica,Jonatanpaj arcoca mana huashaman tigrajchu carca.Saulpaj espadapish mana mishashpaca mana tigrajchu carca.
23 Saulpish, Jonatanpish causacujpica paicunataca achcatami cꞌuyarcacuna,paicunataca huañuipish mana chꞌicanyachircachu.
Paicunaca aguilacunatapish yalli volajcunami carcacuna,leoncunatapish yalli sinchimi carcacuna.
24 Israelitacunapaj ushushicunalla, Saulmanta huacaichijyari.Paimi cancunamanca pucanicuj ropata, yallitaj sumaj ropata churachirca.Cancunapaj ropapipish oro adornocunatami churachirca.
25 ¡Israel llajtalla, sinchi runacunaca macanacuipimari huañushcacuna!
¡Jonatanca cambaj urcucunapimari huañushca!
26 Ñuca huauqui Jonatanlla, canmantaca yallitaj llaquillamari cani.Cantaca yallitajmari cꞌuyarcani.
Ñucapajca cambaj cꞌuyaica huarmicunapaj cꞌuyaimantapish yallimari carca.
27 ¡Sinchi runacunaca huañushcamari,macanacuipaj macanacunacunapish chingarishcamari!” nircami.
Notacuna
^ O “diadematapish”.
^ Hebreo rimaipica: “cambaj yahuarta jichashcaca cambaj jahuallapitaj canga” ninmi.
