2 Samuel 10:1-19
-
Ammonitacunata, siriocunata mishashcamanta (1-19)
10 Chai qꞌuipaca ammonitacunapaj reymi huañurca. Pai huañujpica paipaj churi Hanunmi mushuj rey tucurca.
2 Chaimi Davidca: “Nahasca ñucamanca mana tucurij cꞌuyaitami ricuchirca. Chaimantami ñucapish paipaj churi Hanunmanca mana tucurij cꞌuyaita ricuchisha” nirca. Davidca paipaj sirvijcunatami Hanunpaj yaya huañushcamanta Hanunta cushichichun cacharca. Chashnami Davidpaj sirvijcunaca ammonitacunapaj llajtaman chayarcacuna.
3 Ammonitacunata mandajcunaca paicunapaj amito Hanuntaca: “¿Davidca canta cushichingapaj paita sirvijcunata cachashpaca cambaj yayata respetashcatachu yuyangui? ¿Manachu paicunaca ñucanchijta pacalla ricunaman, cai llajta ima shina cashcata yachashpa cai llajtata tucuchingapaj mandashca canga?” nircacunami.
4 Shina nijpimi Hanunca Davidpaj sirvijcunata japishpaca shuj lado barbatapish rasurashpa,* churanacunatapish siqui patacama utushpa paicunata tigrachishpa cacharca.
5 Chai runacunata yallitaj pingaipi churashcatami rey Davidman huillarcacuna. Chaimi Davidca chai runacunata huaquin runacuna tupanaman richun chai rato cachashpaca: “Cancunapaj barbacuna huiñangacama Jericó llajtapi saquirichij. Chai qꞌuipaca tigranguichijlla” nirca.
6 Tiempo qꞌuipaca ammonitacunaca David paicunata pꞌiñashcatami* cuentata curcacuna. Chaimi paicunaca Bet-Rehobmanta, Zobamanta siriocunata contratachun huillajcunata cacharcacuna. Tucuica 20.000 chaquillahuan purij soldadocunami carca. Shinallataj paicunaca Maacamanta reytapish paipaj 1.000 runacunahuan, Istobmanta* 12.000 runacunatapishmi contratarcacuna.
7 Chaita yachaj chayashpami Davidca Joabtapish, tucui soldadocunatapish, macanacungapaj ashtahuan sinchi soldadocunatapish cacharca.
8 Ammonitacuna llujshishpaca chai llajta pungu yaicunpimi macanacungapaj allichirishca shayacurcacuna. Cutin Zobamanta, Rehobmanta siriocunaca Istobhuan, Maacahuanmi tandalla caishuj lado pambapi carcacuna.
9 Joabca ñaupaj ladomanta, huasha ladomanta contra soldadocuna paicunata llaquichinaman shamucujtami ricurca. Chaimi Joabca Israelmanta ashtahuan alli macanacuj soldadocunata agllarca. Shinallataj paicunataca siriocunahuan macanacuchunmi macanacungapaj allichirishca cachun churarca.
10 Cutin caishuj soldadocuna macanacungapaj allichirishca cachun, ammonitacunahuanpish macanacuchunmi paicunataca paipaj huauqui Abisái mandachun churarca.
11 Shinapish paica: “Siriocuna ñucata yalli sinchi cajpica, can ñucata ayudanaman shamungui. Cutin ammonitacuna canta yalli sinchi cajpica ñucami canta ayudanaman risha.
12 Ñucanchij gentecunamanta, ñucanchij Diospaj llajtacunamantami ñucanchijca sinchi, mana manchajcuna cana canchij. Chashna rurajpica Jehová Diospish pai munashca shinami* ruranga” nircami.
13 Joabpish, paipaj soldadocunapish siriocunahuanmi macanacurcacuna. Chaimi siriocunaca Joabmanta miticushpa rircacuna.
14 Ammonitacunaca siriocuna miticushpa rishcata yachaj chayashpami paicunapish Abisaimanta miticushpa paicunapaj llajtaman yaicurcacuna. Chai qꞌuipaca Joabca ammonitacunata saquishpami Jerusalenman tigrarca.
15 Siriocunaca israelitacuna paicunata mishajta ricushpami cutinllataj tandanacurcacuna.
16 Hadadezerca Éufrates jatun yacu ladocunapi caj siriocunatami tandachirca. Paicunaca Sobac pushajpimi Helamman shamurcacuna. Sobacca Hadadezerpaj soldadocunata mandajmi carca.
17 Davidman ima tucushcata huillajpimi paica chai rato Israelmanta tucui soldadocunata tandachirca. Chashnami Davidca Jordán jatun yacuta chꞌimbashpa Helamman chayarca. Cutin siriocunaca Davidpaj contra macanacungapajmi allichirishpa shayarircacuna. Shinallataj paipaj contrami macanacurcacuna.
18 Shinapish siriocunaca israelitacunamanta miticushpami rircacuna. Davidca 700 carretacunata manejajcunatami huañuchirca. Shinallataj 40.000 caballopi purij siriocunatami huañuchirca. Soldadocunata mandaj Sobac runatapish chugrichijpimi paica chaipi huañurca.
19 Hadadézer mandacun ucupi tiyaj tucui reycunaca israelitacuna mishashcata ricushpami israelitacunahuan utca alli tucurcacuna. Paicunaca israelitacunata sirvijcunapishmi tucurca. Shinallataj siriocunaca ammonitacunataca ña mana ashtahuan ayudasha nircachu.
Notacuna
^ O “tucui raspashpa”.
^ O “millanayachishcatami”.
^ O “Tobmanta”.
^ O “paipaj ñuahuipi alli ricurishca shinami”.
