2 Samuel 12:1-31
12 Jehová Diosca Davidta ricunamanmi Natanta cacharca. Davidpaj ñaupajpi cashpaca Natanca cashnami nirca: “Shuj llajtapica ishqui runacunami tiyarca. Shujca charij runa, caishujca pobre runami carca.
2 Charij runaca yallitaj ovejacunata, huagracunatami charirca.
3 Pero pobre runaca shuj uchilla randishca ovejallatami charirca. Chai ovejitatami paica cuidaj carca. Chai ovejitaca chai runapaj ñaupajpi, paipaj churicunapaj ñaupajpimi huiñashpa catirca. Chai ovejitaca chai runa ashalla micunata charishcamantapishmi micuj carca. Shinallataj paipaj vasomantapishmi ubyaj carca. Paipaj rigrapimi dormij carca. Chai runapajca chai ovejitaca shuj ushushi shinami carca.
4 Shuj punllaca charij runaca paita visitanaman shamuj shuj viajaj runatami chasquirca. Pero charij runaca shamuj runaman carangapajca paipaj propio ovejacunata, huagracunata mana huañuchisha nircachu. Chaipaj randica chai pobre runapaj ovejitata japishpami micunata preparashpa shamuj runaman cararca” nircami.
5 Chaita uyashpami Davidca chai runahuan yallitaj pꞌiñarishpa Natanmanca cashna nirca: “¡Causaj Jehová Diospaj shutipimi jurani. Chaita ruraj runaca huañunatajmi can!
6 Chai runaca chashna rurashcamanta, mana llaquishcamantapishmi chuscu ovejitahuan pagana can” nircami.
7 Natanca Davidmanca cashnami nirca: “¡Chai runaca canmi cangui! Israelitacunapaj Jehová Diosca cashnami nin: ‘Ñucami cantaca Israelpaj rey cachun agllarcani. Saulpaj maquimantapish ñucami quishpichircani.
8 Ñucaca cambaj amopaj tucui imalla charishca cosascunatapishmi canman curcani. Cambaj amopaj huarmicunatapish cambaj rigrapimi curcani. Shinallataj Israelta, Judata mandachunmi cantaca rey cachun churarcani. Chai cushcacuna ashalla cashca cajpipish canmanca ashtahuan cungapajmi listo carcani.
9 ¿Imamantataj Jehová Diospaj ñaupajpi mana allita rurashpa Dios nishcacunata mana valichircangui? ¡Hititacunapuramanta Uriastaca espadahuanmi huañuchircangui! Shinallataj ammonitacunapaj espadahuan huañuchishca qꞌuipaca, paipaj huarmita japishpami paihuan saquirishpa cazararcangui.
10 Canca hititacunapuramanta Uriaspaj huarmita quichushpa, paihuan cazarashpami ñucata mana valichircangui. Chaimantami cambaj familiamantaca espadaca manataj anchunga’ ninmi.
11 Jehová Diosca caitami nin: ‘Cunanmi llaquicunata canman cachagrini. Chai llaquicunaca cambaj propio familiamantami llujshinga. Cambaj ñahuicunapaj ñaupajmantami cambaj huarmicunata quichushpa shujtajman cusha. Paica tucuicuna ricucun ñaupajpimi cambaj huarmicunahuan chayaringa.
12 Tucui caicunataca canca pacallami rurarcangui. Pero ñucaca tucui israelitacuna ricuchunmi paicunapaj ñaupajpi chashna rurasha’ ninmi” nircami.
13 Davidca Natanmanca: “Ñucaca Jehová Diospaj contrami juchata rurashcani” nircami. Natanca Davidmanca cashnami nirca: “Jehová Diosca cambaj juchataca perdonashcami.* Chaimantami mana huañungui.
14 Shinapish Jehová Diosta mana respetashcamantami can charishca huahuaca huañungataj” nircami.
15 Chai qꞌuipaca Natanca paipaj huasimanmi tigrarca.
Cutin Jehová Diosca, David Uriaspaj huarmihuan charishca huahuatami unguchirca.
16 Davidca paipaj huahuamantami Diosta rogarca. Shinallataj paica ayunotami rurai callarirca. Paipaj cuartopi huichcarishpami tucui tuta pambapi sirishpa pasaj carca.
17 Davidpaj huasipi mayorlla sirvijcuna cꞌuchuyashpami paitaca pambamanta jatarichinata yuyarcacuna. Pero Davidca mana jatarinata munarcachu. Paicunahuanpish mana micusha nircachu.
18 Séptimo punllapica huahuaca huañurcami. Davidta sirvijcunaca huahua huañushcata huillangapajca manchaitami charircacuna. Paicunaca: “Huahua causacujpiraj reyhuan parlanaman rijpica paica mana uyasha nijchu carca. Cunancarin, ¿ima shinataj huahua huañushcataca huillashunyari? Huillajpica paillatajmi ima mana allita rurari tucun” nircacunami.
19 Davidca paita sirvijcuna paicunapura allijlla parlanacucujtami ricurca. Chaita ricushpami paica huahua ña huañushcata cuentata curca. Chaimantami Davidca paita sirvijcunataca: “¿Huahuaca huañurcachu?” nishpa tapurca. Paicunaca: “Ari, huañurcami” nishpami cutichircacuna.
20 Chashna nijpimi Davidca pambamanta jatarishpa, armarishpa, aceiteta churarishpa, ropata cambiarishpa Jehová Diospaj huasiman paita adoranaman rirca. Qꞌuipaca paipaj huasiman* rishpami imata micungapaj apamuchun mañarca. Chaimi paica micurca.
21 Paita sirvijcunaca: “¿Imamantataj canca chashna ruracunguiyari? Huahua causacujpica ayunanata, huacanatapish mana saquircanguichu. Pero huahua huañujpica jatarishpami micushcangui” nishpami tapurcacuna.
22 Chashna nijpimi Davidca cashna cutichirca: “‘Jehová Diosca ñucata llaquishpa, huahua causashpa catichun saquingapishchari’ yuyashpami huahua causacujpica ayunashpa huacacurcani.
23 Cunanca huahua ñami huañushca, ¿imapajtaj ayunashayari? ¿Ñucaca huahuata cutin causachi tucunichu? Ñucami paihuanca pambana jutcupi tandanacusha. Pero paica ñucapajmanca ña mana tigramungachu” nircami.
24 Davidca paipaj huarmi Bat-Sebatami animarca. Qꞌuipaca Davidca paipaj huarmihuanmi chayarirca. Tiempohuanca paipaj huarmica shuj churitami huacharca. Chai huahuataca Salomón* nishpami shutichircacuna. Salomontaca Jehová Diosmi cꞌuyarca.
25 Jehová Diosca chai huahuata cꞌuyashcamantami, Jedidías* shutita churachun profeta Natanta cacharca.
26 Joabca ammonitacunapaj Rabá llajtapaj contrami macanacushpa catirca. Chashnami reypaj llajtata mishashpa japirca.
27 Chaimi Joabca Davidmanca cashna nichun huillajcunata cacharca: “Ñucaca Rabá llajtapaj contrami macanacushcani, yacucuna* tiyan llajtata mishashpami japishcani.
28 Cunanca saquirij soldadocunata tandachishpa, chai llajtapaj contra macanacushpa,* chai llajtata mishashpa can japi. Cashnami ñucaca chai llajtata mana mishashpa japisha, mana jatunyachishcapish casha” nircami.
29 Chaimi Davidca tucui soldadocunata tandachishpa Rabá llajtaman rirca. Chai llajtapaj contra macanacushpami mishashpa japirca.
30 Chaipimi Davidca Malcampaj* umamanta coronata quichurca. Chai coronaca shuj talento* orotami pesarca. Sumaj rumicunatapishmi charirca. Chai coronataca Davidpaj umapimi churarcacuna. Paica chai llajtamanta quichushca achca cosascunatami aparca.
31 Rabá llajtapi causaj tucui gentecunatapish llujshichishpami paicunataca rumicunata sierracunahuan cuchushpa trabajachun churarca. Shinallataj fierromanta rurashca hachacunahuan, fierromanta rurashca shujtaj afilashca herramientacunahuan trabajachunmi churarca. Ladrillocunatapish rurashpa trabajachunmi churarca. Davidca ammonitacuna causashca tucui llajtacunahuanca chashnallatajmi rurarca. Chaita rurashca qꞌuipaca Davidca paipaj soldadocunahuanmi Jerusalenman tigrarca.
Notacuna
^ O “pasachun saquishcami”.
^ O “palacioman”.
^ “Salomón” shutica hebreo rimaipica ‘sumaj causaita charij’ nisha ninmi.
^ “Jedidías” shutica ‘Jah cꞌuyashca’ nisha ninmi.
^ Caipica chai llajtapaj pugyu yacucunamantami parlacuj yuyachin.
^ O “carpa huasicunapi saquirishpa”.
^ “Malcam” shutita huasha diccionariopi ricui.
^ Shuj talentoca 34.2 kilogramocunatami charirca. Ayuda B14-ta ricui.
