2 Samuel 13:1-39
13 Davidpaj churi Absalonca Tamar shuti panitami charirca. Tamarca yallitaj sumaj huarmimi carca. Davidpaj caishuj churi Amnonca Tamarmantami enamorarirca.
2 Amnonca paipaj pani Tamarta yallitaj munashcamantami ungurca. Tamarca cꞌarihuan manaraj chayarishcachu carca. Chaimi Amnonca Tamarhuan imata mana rurai tucushcata yuyarca.
3 Amnonca Simeapaj churi Jehonadabhuanmi alli apanacujcuna carca. Simeaca Davidpaj huauquimi carca. Jehonadabca yallitaj yachaj tucushcami carca.
4 Chaimi Jehonadabca: “¿Imamantataj canca reypaj churi cashpapish cada tutamanta yallitaj llaquilla cangui? ¿Can ima tucucushcataca imamantataj ñucaman mana huillangui?” nishpa tapurca. Chashna nijpimi Amnonca: “Ñuca huauqui Absalonpaj pani Tamarmantami enamorado cani” nishpa cutichirca.
5 Jehonadabca Amnonmanca: “Ungushca tucushpa camapi siriri. Cambaj yaya canta ricunaman shamujpica: ‘Ñuca pani Tamar ima micunata apamushpa ñucata ricunaman shamuchun cachahuai. Ungushcacunapaj micunata ñuca ñaupajpi pai preparashpa ñucaman cujpica, ñucaca micushallami’ ningui” nircami.
6 Amnonca ungushca tucushpami camapi siririrca. Chaimi reyca paita ricunaman shamurca. Amnonca reytaca: “Ñuca pani Tamar ñucata ricunaman shamuchun cachahuai. Pai ñuca ñaupajpi corazón laya ishqui tandata rurashpa ñucaman cujpica ñucaca micushallami” nircami.
7 Shina nijpimi Davidca Tamar huasipi cajpi caita huillachun cacharca. Davidca: “Cambaj turi Amnonpaj huasiman rishpa micunata preparashpa caragri” nircami.
8 Chashna nijpimi Tamarca paipaj turi Amnonpaj huasiman rishpa pai maipi siricunman chayarca. Chaipimi Tamarca masata japishpa, masashpa Amnonpaj ñaupajpi tandacunata rurashpa cusarca.
9 Chai qꞌuipaca paica tandacunata japishpami Amnonman curca. Pero Amnonca mana micusha nishpami: “¡Tucuicuna caimanta llujshichij!” nirca. Chaimi tucuicuna chaimanta llujshircacuna.
10 Chashna llujshichishpaca Amnonca paipaj pani Tamartaca: “Micunataca dormina cuartoman apamui. Chaipi ñucaman carangui” nircami. Chaimi Tamarca pai rurashca corazón laya tandacunata japishpa paipaj turi Amnón dormina cuartoman aparca.
11 Tamar micunata cunaman cꞌuchuyajpica Amnonca paita japishpami: “Ñuca panilla, shamui, ñucahuan siririshun” nirca.
12 Pero Tamarca: “¡Ñuca turilla, chaitaca mana rurashachu! Ñucataca ama pingaipi saquichu. Caitaca Israelpica mana rurachun saquincunachu. Cai yallitaj pinganai ruraitaca ama ruraichu.
13 ¿Ima shinataj ñucaca cai pingaihuan causashayari? Cantaca Israelpica imapajpish mana valij runata shinamari ricungacuna. Reyhuan parlapai. Ñuca cambaj cachunca paica mana jarcangachu” nircami.
14 Pero Amnonca mana uyasha nircachu. Paica Tamarta yalli fuerzata charishcamantami Tamarta japishpa violarca. Chashnami paitaca pingaipi churarca.
15 Amnonca Tamarhuan chayarinacushca qꞌuipaca yallitajmi paita pꞌiñai callarirca. Chashnami Tamartaca ñaupaman cꞌuyashcatapish yalli pꞌiñai callarirca. Chaimi paica: “¡Jatarishpa caimanta llujshishpa ri!” nirca.
16 Chashna nijpimi paica: “¡Ñuca turilla, caitaca ama ruraichu. Ñucataca caimanta ama llujshichishpa cachaichu! ¡Chaita rurashpaca puntaman mana allita rurashcatapish yallimari rurangui!” nirca. Pero Amnonca mana uyasha nircachu.
17 Amnonca paita ayudaj joventa cayashpaca: “Ñuca ñaupajmanta cai huarmita canllaman llujshichishpa cachapai. Pungutapish jatun aldabahuan churangui” nircami.
18 (Tamarca shuj sumaj* churanata churarishcami carca. Cꞌarihuan manaraj chayarishca reypaj ushushicunaca chashnami churarijcuna carca). Amnonta ayudajca Tamarta canllaman llujshichishpami pungupi jatun aldabata churarca.
19 Chaimi Tamarca ushpata* paipaj umapi churarirca. Shinallataj pai churashca sumaj churanatapish lliquirishpami purishpa rirca. Paipaj maquicunatapish uma jahuapi churashpami caparirishpa rirca.
20 Paipaj turi Absalón Tamarta ricushpaca: “¿Cai llaquitaca cambaj turi Amnonchu rurarca? Ñuca panilla, upalla cailla. Paica cambaj turimi can. Chai llaquitaca ama cambaj shungupi cutin cutin yuyarichu” nircami. Chai qꞌuipaca Tamarca shujtaj gentecunamanta carupi, paipaj turi Absalonpaj huasipimi causashpa saquirirca.
21 Rey David chaita yachaj yachashpaca yallitajmi pꞌiñarirca. Shinapish paipaj churi Amnón punta churi cashcamanta, paita cꞌuyashcamantami paipaj shungutaca mana llaquichisha nirca.
22 Absalonca paipaj pani Tamarta Amnón pingaipi churashcamantami paitaca pꞌiñarca. Chaimantami Absalonca Amnonmanca ima allitapish, ima mana allitapish mana nirca.
23 Ishqui huatacuna qꞌuipaca Absalonpaj ovejacunata rutuj runacunaca Efrainpaj allpa cꞌuchupi caj Baal-Hazorpimi ovejacunata rutucurcacuna. Chaimantami Absalonca reypaj tucui churicunata jatun micuiman invitarca.
24 Absalonca reyta ricunaman rishpaca: “Ñucaca ovejacunatami rutucuni. Reypish, canta sirvijcunapish ñucahuan jacuchij” nircami.
25 Shina nijpimi reyca: “Ñuca churilla, mana rishachu. Tucuicuna rishpaca cambajca shuj carga shinami cashun” nishpa cutichirca. Absalón cutin cutin paihuan richun nijpipish, reyca mana risha nircachu. Pero reyca paitaca bendiciarcami.
26 Chaimi Absalonca: “Can mana shamushpaca ñuca huauqui Amnón ñucanchijhuan richun saquihuai” nirca. Chaimi reyca: “¿Imamantataj pai richun ningui?” nishpa tapurca.
27 Absalón cutin cutin cachachun nijpimi reyca Amnontapish, paipaj tucui churicunatapish paihuan cacharca.
28 Chaimi Absalonca paita sirvijcunataca: “Amnonta ricuranguichij, Amnón vinota ubyashpa paipaj shungu cushilla cajpica ñucaca: ‘¡Amnonta llaquichichij!’ nishami. Ñuca chashna nijpimi paitaca huañuchina canguichij. Ama manchaichijchu. ¿Manachu chaita rurachunca ñuca mandacuni? Sinchi caichij, ama manchaichijchu” nishpa mandarca.
29 Absalonta sirvijcunaca pai mandashca shinami Amnonta huañuchircacuna. Chaita ricushpami reypaj caishuj churicunaca jatarishcahuan cada uno paicunapaj mulapi tiyarishpa miticushpa rircacuna.
30 Paicuna ñanta ricujpimi Davidca: “Absalonca tucui reypaj churicunatami huañuchishca, shujllapish mana causashpa catinchu” nishca noticiata chasquirca.
31 Chaita uyashpami reyca jatarishpa, pajpaj ropata lliquirishpa pambapi siririrca. Chaimi paita tucui sirvijcunaca paicunapaj ropacunata lliquirishpa, reypaj ladopi shayarishca saquirircacuna.
32 Pero Davidpaj huauqui Simeapaj churi Jehonadabca: “Ñuca amito, reypaj tucui churicunata huañuchishcataca ama crichu. Amnonllami huañurca. Absalonca paipaj pani Tamarta pingaipi churashca punllamantami Amnontaca huañuchinata decidishca carca. Chaimantami Absalón mandajpi paita huañuchircacuna.
33 Ñuca amito reylla, reypaj tucui churicuna huañushca nishca noticiataca ama crichu. Amnonllami huañushca” nircami.
34 Chaicamaca Absalonca miticushpami rirca. Chai qꞌuipaca chapaj runaca paipaj huasha lado ñanta achca gentecuna shamucujtami ricurca. Chai ñanca urcu cꞌuchupimi carca.
35 Chaimi Jehonadabca reymanca: “¡Ricui! Canta sirvij nishca shinami reypaj churicunaca tigramushca” nirca.
36 Parlashpa tucuchincami reypaj churicunaca yallitaj huacashpa yaicurcacuna. Chaimi reypish, tucui paita sirvijcunapish yallitaj llaquirishpa dimastij huacarcacuna.
37 Cutin Absalonca Guesur llajtamanta rey Talmái maipi cashcamanmi miticushpa rirca. Talmaica Amihudpaj churimi carca. Davidca achca punllacunatami paipaj churimanta llaquilla carca.
38 Guesur llajtaman miticushpa rishca qꞌuipaca Absalonca chaipimi quimsa huatacunata saquirirca.
39 Rey Davidca paipaj churi Amnón huañushcamantaca ña mana yalli llaquilla carcachu. Chaimantami Absalonta ricunaman rinata munarca.
