2 Samuel 14:1-33
14 Zeruyapaj churi Joabca rey David paipaj shungupi Absalonta yallitaj ricuna munaita charishcatami yachaj chayarca.
2 Chaimi Joabca Tecoa llajtamanta yachaj tucushca huarmita mashcanaman cacharca. Paica chai huarmitaca: “Huañushca punllapi llaquiricuj shina comportaringui. Huañushca punllapi churana ropatapish churaringui. Aceitehuanpish ama llihuiringui.* Achca tiempota maijan huañushcamanta huacacuj huarmi shina comportaringui.
3 Qꞌuipaca reypaj ñaupajman rishpa ñuca canman imata nigrishcata paiman huillangui” nircami. Joabca pai imata nina cashcatami paimanca nirca.
4 Tecoa llajtamanta huarmica reypaj ñaupajmanmi rirca. Chaiman rishpaca pambacama cumurishpa, cungurishpami: “¡Ñuca reylla, ayudahuai!” nishpa rogarirca.
5 Chashna nijpimi reyca: “¿Imataj tucungui?” nishpa cutichirca. Shina cutichijpimi chai huarmica: “¡Aij ñucalla! Viudamari cani. Ñuca cusapish huañushcamari can.
6 Ñuca canta sirvijca ishqui churicunatami charircani. Paicuna campopi cashpaca paicunapurami macanacui callarircacuna. Chaipi pi mana cashcamantami paicunataca ni pi mana separai tucurcacuna. Chaimi shujca caishujta chugrichishpa huañuchirca.
7 Cunanca tucui familiami canta sirvijpaj contra tucushcacuna. Paicunaca pai herenciata japina cashcata yachashpapish: ‘¡Paipaj huauquita huañuchijta, paitapish huañuchingapaj ñucanchijman entregai. Chashnami pai huañuchishca huauquipaj causaimanta paganga!’ nincunami. Paicunaca nina japirishca carbonta huañuchij shinami huañuchingacuna. Chaita rurashpaca paicunaca ñuca cusapaj shutitapish, paipaj huahua huahuacunatapish tucui cai allpamantami anchuchingacuna” nircami.
8 Reyca chai huarmitaca: “Cambaj huasiman rilla. Ñucami cai problemata allichingapaj imata rurana cashcata mandasha” nircami.
9 Chaimi Tecoamanta huarmica reymanca: “Ñuca amito reylla, cai culpaca ñuca jahuapipish, ñuca yayapaj familia jahuapipish urmachun. Pero reypish, paipaj jatun tiyarinapish culpa illaj saquirichun” nirca.
10 Chai qꞌuipami reyca: “Maijanpish canta imatapish cutin nijpica paita pushamungui. Chashnami cantaca paica nunca ña mana molestanga” nirca.
11 Shinapish chai huarmica: “Reylla, huañuchishca runapaj familia ama ashtahuan dañota rurashpa ñuca churita ama huañuchichun cambaj Jehová Diosta yuyaripai” nircami. Chaimi reyca: “Causaj Jehová Diospaj shutipimi jurani. Cambaj churipaj uma ajchaca shujllapish pambamanca mana urmangachu”* nircami.
12 Chashna nijpimi chai huarmica: “Ñuca amito reyman canta sirvij imallatapish nichun saquihuai” nirca. Chaimi reyca: “Parlailla” nishpa cutichirca.
13 Paica caitami nirca: “Ñuca reylla, ¿canca ima nishpataj Diospaj pueblopaj contra chashna ruranata yuyashcangui? Cambaj propio churita llajtamanta llujshichishpa cachashcataca mana tigrachimui tucushcanguichu. Can nishcahuanca canllatajmi culpayuj tucucungui.
14 Ñucanchijca huañushuntajmi. Yacuta pambapi tallijpi chai yacuta mana tandai tucuj shinami cashun. Shinapish Diosca shuj causaitaca maitataj quichungayari. Shujtaj llajtaman llujshichishpa cachashca runataca Diosca imamanta paipajman cutin tigrachimuna cashcatami mashcan.
15 Gentecunaca ñucatami manchachishcacuna. Chaitami ñuca amito reymanca huillanaman shamurcani. Canta sirvij huarmica cashnami nirca: ‘Ñuca amito reyhuan parlachun saquihuaichij. Cashna parlajpi paita sirvijta tal vez rey uyangapishchari.
16 Rey paita sirvijta uyashpa huañuchij runapaj maquimanta quishpichingapishchari. Chai runaca ñucamanpish, ñuca shujlla churimanpish Dios cushca herenciatami quichusha nin’ nircami.
17 Chaimi canta sirvijca: ‘Ñuca amito reypaj nishca shimicuna ñucata cushichichun’ nirca. Ñuca amito reyca ima alli cashcatapish, ima mana alli cashcatapish Diospaj ángel shinami yachan. Cambaj Jehová Dios canhuan cachun” nircami.
18 Reyca chai huarmimanca: “Shuj tapuitami rurasha nini. Imatapish ama pacashpa tucuita huillangui” nishpami cutichirca. Chashna nijpimi chai huarmica: “Ñuca amito reylla, tapupailla” nirca.
19 Reyca: “¿Joabchu tucui caicunata nichun cacharca?” nishpami tapurca. Chashna nijpimi chai huarmica cashna cutichirca: “Ñuca amito reylla, cambaj shutipimi jurani. Ñuca amito rey nishca shinallatajmi canta sirvij Joabca caicunata nichun cacharca. Shinallataj canta sirvijmanca tucui imallata ninatami huillashpa cacharca.
20 Canta sirvij Joabmi canpish caimanta shujtaj shina yuyachun chashna rurashca. Pero can, ñuca amitoca Diospaj ángel shina yachajmi cangui. Chaimantami canca cai llajtapi tucui ima pasacushcataca alli yachangui” nircami.
21 Chai qꞌuipaca reyca Joabmanca: “Can nishcatami rurasha. Joven Absalonpajman rishpa paita tigra pushamugri” nircami.
22 Chashna nijpimi Joabca pambacama cumurishpa, cungurishpa reyta alabai callarirca. Shinallataj Joabca: “Ñuca amito reylla, canta sirvij ima mañashcatami canca cutichishcangui. Chaimantami ñuca, canta sirvijca cambaj ñaupajpi alli ricurishcata cunanca yachani” nircami.
23 Joabca jatarishpami Guesurman rirca. Chashnami Absalontaca Jerusalenman pushamurca.
24 Shinapish reyca: “Absalonca paipaj huasillamantaj tigrachun. Pero ñucataca ama ricunaman shamuchun” nircami. Chashna nijpimi Absalonca paipaj huasiman tigrarca. Reytapish mana ricunaman rircachu.
25 Absalón yallitaj sumaj cashcamantami tucuicuna paita alabajcuna carca. Tucui Israel llajtapica Absalón shina alabashca shuj runallapish mana tiyarcachu. Absalonpica chaqui puntamanta callarishpaca uma puntacama ima mana allica mana tiyarcachu.
26 Absalonca cada huata tucuripimi paipaj uma ajcha yallitaj pesaj cashcamanta rutuchij carca. Chai rutuchishca ajchata reypaj pesana rumipi* pesajpica 200 siclocunatami* pesaj carca.
27 Absalonca quimsa churicunatami charirca. Tamar shuti shuj ushushitapishmi charirca. Tamarca sumaj huarmimi carca.
28 Absalonca ishqui huata jundatami Jerusalenpi causarca. Shinapish reytaca mana ricunaman rircachu.
29 Absalonca reypajman cachangapajmi Joabta cayaj cacharca. Pero Joabca mana shamusha nircachu. Cutinllataj cayaj cachajpipish paica manataj shamusha nircachu.
30 Chaimi Absalonca paita sirvijcunataca: “Joabpaj allpaca ñuca allpa cꞌuchullapimi can. Chaipimi paica asha cebadata tarpushcata charin. Chaiman rishpa ninata japichigrichij” nirca. Chashna nijpimi Absalonta sirvijcunaca chai allpaman rishpa ninata japichircacuna.
31 Chashna tucujpimi, Joabca Absalonpaj huasiman rishpaca: “¿Canta sirvijcunaca imamantataj ñuca allpapi ninata japichircacuna?” nirca.
32 Absalonca Joabtaca: “Ricui, ñucami cai huillaita canman cacharcani: ‘Caiman shamui, ñuca partemanta reytaca: “¿Ñucaca imapajtaj Guesurmantaca shamurcaniyari? Ñucapajca chaipi saquirinami ashtahuan alli canman carca. Ñuca reylla, cunanca ñuca canta ricunaman richun saquihuai. Ñuca ima culpata charijpica huañuchinami cangui” nishpa tapungui’” nircami.
33 Chashna nijta uyashpami Joabca reypajman rishpa pai ima nishcata yachaj chayachirca. Chashna huillajpimi reyca Absalonta cayarca. Absalonca reypajman shamushpami paipaj ñaupajpi pambacama cungurirca. Chai qꞌuipaca reyca Absalontami mucharca.
Notacuna
^ O “cꞌahuiringui”.
^ O “Cambaj churitaca ni shuj ajchallapipish mana tuparingacunachu”.
^ Cai rumitaca palaciopimi huaquichij cashcanga. Mana cashpaca shujtaj pesana rumicunata yallimi pesaj cashcanga. Chaimantami cai rumitaca “reypaj siclomi” can nishpa shutichijcuna carca.
^ Casi 2.3 kilogramocunata (5 libracunatami) charirca. Ayuda B14-ta ricui.
