2 Samuel 15:1-37
15 Chai qꞌuipaca Absalonca shuj carretata, caballocunatami japirca. Paipaj ñaupajpi callpashpa richunpish 50 runacunatami japirca.
2 Shinallataj Absalonca tutamanta ladoman utca jatarishpami llajtapaj yaicun punguman rina ñan cꞌuchupi shayarij carca. Maijan runa shuj demandata apamushpa reypaj ñaupajpi cashcata rurashpa juzgachun mañanaman shamujpica Absalonca chai runata cayashpami: “¿Canca maijan llajtamantataj cangui?” nishpa tapuj carca. Chashna tapujpimi chai runaca: “Canta sirvijca Israelpaj shuj familiamantami cani” nishpa cutichij carca.
3 Shinallataj Absalonca: “Ricui, can imata mañacushcaca ciertomi can. Pero cambaj demandata uyachunca reypaj partemantaca ni pi mana tiyanchu” nijmi carca.
4 Chai qꞌuipaca Absalonca: “¡Cai llajtapi ñucata juez cachun nombrajpichari alli canman! Chashnami maijanpish shuj demandata charishpa, shuj quejata charishpaca ñucata ricunaman shamui tucunman. Paita cashcata rurashpa juzgachunpishmi ñucallataj ricuiman” nijmi carca.
5 Shuj runa Absalonpaj ñaupajpi cumuringapaj cꞌuchuyajpica Absalonca paipaj maquita chutashpami chai runata jatarichishpa muchaj carca.
6 Absalonca cashcata rurashpa juzgachun reyta mañanaman shamuj tucui israelitacunahuanmi chashna ruraj carca. Chashnami Absalonca tucui Israel runacunapaj shunguta shuhuaj carca.
7 Chuscu* huatacuna ña pajtajpica Absalonca reymanca cashnami nirca: “Jehová Diosman ñuca ari nishcata Hebronpi pajtachinaman richun saquihuai.
8 Canta sirvijca Siria llajtapi saquirij Guesurpi causacushpami cai ari ninacuita rurarcani. Ñucaca: ‘Jehová Dios ñucata Jerusalenman cutin pushamujpica Jehová Diosmanmi shuj ofrendata cusha’* nircanimi” nircami.
9 Chaimi reyca paitaca: “Tranquilo rilla” nirca. Chashna nijpimi Absalonca Hebronman rirca.
10 Absalonca pacalla ricujcunataca Israelpaj tucui familiacunapajmanmi cacharca. Paicunataca: “Gachupi tocashca uyarijpica: ‘¡Absalonca Hebronpimi rey tucushca!’ ninami canguichij” nircami.
11 Shinallataj Jerusalenmanta 200 runacunaca Absalonhuanmi Hebronman rishcacuna carca. Absalón invitajpica ima tucucushcata mana yachashpapish paicunaca Absalonhuanmi rircallacuna.
12 Absalón sacrificiocunata cucushpaca guilonitacunapuramanta Davidpaj consejaj Ahitofeltami cayanaman cacharca. Ahitofelca paipaj llajta Guilopimi carca. Reypaj contra tucushpa Absalonhuan tandanacujcunaca ashtahuanmi mirashpa catirca.
13 Tiempo qꞌuipaca shuj runa shamushpami Davidmanca: “Israelmanta runacunaca Absalonpaj partemi tucushcacuna” nishpa huillarca.
14 Chai ratomi Davidca paihuan Jerusalenpi caj tucui sirvijcunataca: “¡Jacuchij, caimanta miticushpa rishunchij. Mana chashna rurajpica ñucanchijmantaca ni shujllapish Absalonmantaca mana quishpirishunchu! ¡Ñucanchij mana yuyashcapi ama llaquichichun, cai llajtapi caj gentecunatapish ama huañuchichunca rato, jacuchij!” nircami.
15 Reyta sirvijcunaca: “Ñucanchij amito reylla, canta sirvijcunaca can imata ruranata agllashcatami rurashun” nishpami cutichircacuna.
16 Chaimanta rey llujshijpica paipaj huasipi tucui cajcunapish paita catishpami llujshircacuna. Pero reyca paipaj huasita* cuidachunmi chunga caishuj huarmicunata* saquirca.
17 Reyca chai llajtamantaca achca gentecunata paipaj huashata catichishpami llujshishpa rirca. Shinallataj paicunaca Bet-Merhacpimi shayarircacuna.
18 Tucui paita sirvijcunapish, tucui keretitacunapish, tucui peletitacunapish, tucui guititacunapishmi paihuan ricurcacuna. Guititacunapuramanta 600 runacunaca Gat llajtamantami paita catishpa rishcacuna carca. Paicuna pasacujpica reyca paicunapuramanta shujllapish mana illashcata yachangapajmi ricucurca.
19 Chaimi reyca guititacunapuramanta Ittaitaca cashna nirca: “¿Imapajtaj canpish shamugringui? Canca shujtaj llajtamanta runami cangui. Cambaj llajtamanpish mana tigrai tucunguichu. Chaimanta tigrashpa mushuj reyhuan saquirilla.
20 Canca cainallamari chayamurcangui. Cunanca ñucahuan jacu nishpaca maitataj cantaca obligai tucushayari. Ñucapish maiman rinataca mana yachanichu. ¡Shinaca cambaj huauquicunata pushashpa tigrailla. Jehová Dios mana tucurij cꞌuyaita canman siempre ricuchichun!” nircami.
21 Pero Ittái runaca reymanca: “¡Jehová Diospaj shutipi, ñuca amito reypaj shutipimi jurani. Ñuca amito reylla, can maipi cajpipish ñuca, canta sirvijca causangapajpish, huañungapajpish chaipimi casha!” nircami.
22 Chaimi Davidca Ittái runataca: “Rilla, cai pugru pambata pasai” nirca. Chaimantami guititacunapuramanta Ittái runaca paihuan caj tucui runacunahuan, paicunapaj churicunahuanpish pasarca.
23 Tucui chai gentecuna pasacujpica chai cꞌuchullapi causaj gentecunaca caparishpami huacacurcacuna. Reyca Cedrón pugru pamba cꞌuchupimi shayacurca. Shinapish Davidhuan caj tucui gentecunapish pugru pambata, chaquishca pambaman rina ñan ladomanmi pasacurcacuna.
24 Sadocpish chaipimi carca. Tucui levitacunapish Dioshuan ari ninacushca arcatami paihuan apashpa ricurcacuna. Paicuna shayarishpami Diospaj Arcataca pambapi churarcacuna. Gentecuna Jerusalenmanta pugru pambata ña chꞌimbashpa tucuchicujpimi Abiatarca chayarca.
25 Pero reyca Sadocmanca cashnami nirca: “Diospaj Arcata llajtallamantaj tigra apai. Jehová Diospaj ñaupajpi ñuca alli ricurijpica paimi ñucata tigra apamushpa Arcatapish, Arca maipi churashca carpa huasitapish ricuchun saquinga.
26 Pero Dios ‘Canhuanca mana contento canichu’ nijpica pai munashca shina ñucahuanca imatapish rurachun” nircami.
27 Rey Davidca sacerdote Sadocmanca cashnami nirca: “¿Manachu canca Dios ricuchishcata huillaj cangui? Cancunaca llajtaman tranquilo tigraichij. Cancunapaj ishqui churicunatapish pushaichij. Cambaj churi Ahimaazta, Abiatarpaj churi Jonatantapish pushaichij.
28 Ricui, ñucaca cancuna ima nishca noticiata uyangapajmi Jordán jatun yacuta chꞌimbana ñancuna ladopi, chaquishca pamba cꞌuchupi shuyasha” nircami.
29 Chaimi Sadocpish, Abiatarpish Diospaj Arcataca Jerusalenman cutin aparcacuna. Paicunaca chaipimi saquirircacuna.
30 Davidca Olivos yuracuna tiyan urcutami* huacashpa huichiyacurca. Paica lluchu chaquilla, umatapish taparishcami huichiyacurca. Paihuan caj tucui gentecunapish umata taparishpami huacashpa urcuta huichiyacurcacuna.
31 Chaipimi Davidmanca: “Ahitofelpish Absalonhuan cajcunahuan tucushpami cambaj contra jatarishca” nircacuna. Chaita uyashpami Davidca: “¡Aij Jehová Dioslla, Ahitofelpaj consejocunaca shuj muspa runa mandashca shina tucuchunmi rogahuani” nirca.
32 Gentecunaca urcu puntapimi Diosta adorajcuna* carca. Chaiman David chayajpica arkitacunapuramanta Husái runami chaipi paita shuyacurca. Husái runaca paipaj churanata lliquirishca, umapipish allpatami churarishca carca.
33 Ashtahuanpish Davidca Husaitaca: “Can ñucahuan rishpaca ñucataca mana ayudai tucunguichu.
34 Chaipaj randica llajtaman tigrashpa, Ahitofelpaj consejocunata jarcashpami ayudai tucungui. Shinallataj Absalonmanca ‘Ñuca reylla, ñucaca canta sirvijmi cani. Ñaupaca cambaj yayatami sirvij carcani. Pero cunanca canta sirvijmi cani’ ningui.
35 ¿Manachu sacerdotecuna Sadocpish, Abiatarpish chaipi canhuan can? Reypaj huasipi tucui imalla huillashcatami sacerdotecuna Sadocmanpish, Abiatarmanpish huillana cangui.
36 Ricui, paicunahuanca paicunapaj ishqui churicunapishmi chaipi can. Sadocpaj churi Ahimaazpish, Abiatarpaj churi Jonatanpishmi chaipi can. Cancuna imalla uyashcataca paicunahuanmi ñucamanca huillana canguichij” nircami.
37 Absalón Jerusalenman yaicucujpimi Davidpaj amigo Husaica chai llajtaman chai rato yaicurca.
Notacuna
^ Caitaca “40” nishpapishmi traducishcacuna.
^ O “Diostami adorasha”. Hebreo rimaipica: “sirvisha” ninmi.
^ O “palaciota”.
^ O “concubinacunata”.
^ O “shayaj huichitami”.
^ O “Diospaj ñaupajpi cumurijcuna”.
