2 Samuel 16:1-23
16 Urcu puntamanta David uriyamushpaca Mefibosetta sirvij Zibá runahuanmi tuparca. Zibá runaca 200 tandacunata, chaquishca uvacunahuan rurashca 100 tortacunata, palma yuramanta pꞌucushca frutacunahuanpish, higocunahuanpish rurashca 100 tortacunata, shuj jatun jarra vinotapish parejashca ishqui burrocunapi apachishcami urcupi Davidta shuyacushca carca.
2 Reyca Zibá runataca: “¿Cai cosascunataca imapajtaj apamurcangui?” nishpami tapurca. Chaimi Zibá runaca: “Burrocunaca reypaj familia tiyarichunmi can. Tandacunapish, frutacunapish runacuna micuchunmi can. Vinopish chaquishca pambapi yallitaj shaicushca cajcunapajmi can” nishpa cutichirca.
3 Cashna nijpimi reyca: “¿Cambaj amopaj nieto* Mefibosetca maipitaj can?” nishpa tapurca. Chaimi Zibá runaca reymanca: “Jerusalenpimi saquirirca. Mefibosetca: ‘Cunanca israelitacunaca ñuca abuelopaj* mandanatami tigrachinga’ nircami” nishpa cutichirca.
4 Reyca Zibá runamanca: “Ricui, Mefibóset tucui charishca cosascunaca cambajmi can” nircami. Chaimi Zibá runaca: “Cambaj ñaupajpimi cumurini. Ñuca amito reylla, cambaj ñaupajpi alli ricurishca cashapishchari” nirca.
5 Rey David Bahurim puebloman chayajpica Saulpaj familiamanta shuj runami llujshirca. Chai runaca Guerapaj churi Simeí shutimi carca. Paica Davidta maldicishpami caparirishpa paipajman cꞌuchuyarca.
6 Simeí runaca Davidtapish, paipaj tucui sirvijcunatapish, tucui caishuj runacunatapish, rey Davidpaj alli ladoman, lluqui ladoman caj sinchi macanacujcunatapishmi rumicunahuan shitacurca.
7 Simeí runaca cashna nishpami maldicicurca: “¡Huañuchij runa,* imapajpish mana valij runa! ¡Caimanta llujshishpa ri, caimanta llujshishpa ri!
8 Jehová Diosca Saulta, paipaj familiata huañuchishcamantami cantaca chashnallataj tigra llaquichishca. Canca Saultami paipaj mandanata quichurcangui. Chaimantami Jehová Diosca cambaj mandanataca cambaj churi Absalonpaj maquipi churashca. ¡Huañuchij runa cashcamantami cunanca llaquicunaca cantapish japicun!” nircami.
9 Chaimi Zeruyapaj churi Abisaica reymanca: “¿Shuj huañushca allcu shinalla runaca maitataj ñuca amito reytaca chashna maldicina canyari? Ñuca paipajman rishpa paipaj umata pꞌitichun saquihuai” nirca.
10 Shinapish reyca: “¿Zeruyapaj churicuna, cancunaca imamantataj caimanta preocuparinguichij? Pai ñucata maldicichun saquichij. Jehová Diosllatajmi paitaca: ‘¡Davidta maldici!’ nishca carca. Chashna cajpica, ¿maijanpish paitaca ‘imamantataj chashna rurangui’? nishpa tapui tucunchu” nircami.
11 Davidca Abisaimanpish, tucui paita sirvijcunamanpish cashnami nirca: “Ricuichij, ñucamanta llujshishca ñuca propio churillatajmari ñucata huañuchisha* nin. ¡Benjaminitacunapuramanta caj runacarin chaitapish yallimari rurasha ninga! ¡Ñucata maldicichun saquichij! ¡Jehová Diosllatajmari chaita rurachun nishca!
12 Jehová Dios ñuca llaquicunata ricungapishchari. Cunan punllaca Simeí maldicishcata chasquinapaj randica Jehová Dios bendicioncunata ñucaman cuchun” nircami.
13 Chai qꞌuipaca Davidpish, paipaj runacunapish ñantami ricurcacuna. Chaicamaca Simeí runaca paipaj chꞌimba lado urcu cꞌuchutami maldicishpa, rumicunahuan shitashpa, ñutu allpahuanpish shitashpa paipaj chꞌimbapurata ricurca.
14 Chai qꞌuipaca reypish, paihuan caj tucui gentecunapish paicuna maiman chayana lugarmanmi chayarcacuna. Paicunaca yallitaj shaicushca cashcamantami samaringapaj shayarircacuna.
15 Chaicamaca Absalonpish, Israelmanta tucui runacunapish Jerusalenmanmi chayarcacuna. Ahitofelpish paihuanmi carca.
16 Arkitacunapuramanta Davidpaj amigo Husái runaca Absalón maipi cashcamanmi yaicurca. Chaipimi: “¡Viva rey Absalón! ¡Viva rey Absalón!” ni callarirca.
17 Chaita uyashpami Absalonca Husaitaca: “¿Chashnachu mana tucurij cꞌuyaitaca cambaj amigomanca ricuchingui? ¿Imamantataj cambaj amigohuanca mana rircangui?” nishpa tapurca.
18 Husái runaca Absalonmanca cashnami cutichirca: “Ñucaca Jehová Diospish, caipi caj runacunapish, Israelmanta caishuj tucui runacunapish agllashca runapaj partemi cani. Ñucaca canhuanmi saquirisha.
19 Cutinllatajmi caita nini, ¿pitataj sirvishayari? ¿Manachu ñuca amigopaj churita sirvina caniyari? Ima shinami cambaj yayata sirvircani chashnallatajmi ñucapish canta sirvisha” nircami.
20 Chai qꞌuipaca Absalonca Ahitofelmanca: “¿Imatataj rurashun? Consejota cui” nircami.
21 Ahitofelca Absalonmanca: “Cambaj yayapaj caishuj huarmicunahuan* chayarinacui. Cai huarmicunataca cambaj yayaca paipaj huasita* cuidachunmi saquirca. Chaita rurajpimi tucui israelitacunaca cambaj yaya canta pꞌiñashcata* yachaj chayangacuna. Chashnami canta apoyajcunaca sinchiyangacuna” nircami.
22 Chaimi Absalonpajca terraza jahuapi shuj carpa huasita shayachircacuna. Chaipimi Absalonca tucui israelitacunapaj ñaupajpi paipaj yayapaj caishuj huarmicunahuan chayarirca.
23 Chai punllacunapica Ahitofelpaj consejocunataca Diosmanta shamuj consejocunata shinami chasquijcuna carca. Chashnami Davidpish, Absalonpish Ahitofelpaj tucui consejocunataca ricujcuna carca.
Notacuna
^ Hebreo rimaipica: “churi” ninmi.
^ Hebreo rimaipica: “yayapaj” ninmi.
^ Hebreo rimaipica: “Yahuarta jichashcamanta culpayuj runa” ninmi.
^ O “ñuca causaita quichusha”.
^ O “concubinacunahuan”.
^ O “palaciota”.
^ O “millanayachishcata”.