2 Samuel 17:1-29
17 Ahitofelca Absalonmanca cashnami nirca: “12.000 runacunata agllashpa cunan tuta Davidta catingapaj saquihuai.
2 Pai shaicushca cajpi, fuerza illaj cajpimi paitaca mana yuyashcapi yallitaj manchachisha. Shina manchachijpimi paihuan caj tucui gentecunaca miticushpa ringacuna. Chashnami reyllata huañuchisha.
3 Chai qꞌuipaca tucui gentecunatami tigra pushamusha. Can mashcacushca runata huañuchijpica tucui paipaj gentecunami cambajman tigramungacuna. Chaita rurajpimi tucui gentecunaca tranquilo causangacuna” nircami.
4 Pai nishcaca Absalonpajpish, israelitacunata tucui pushajcunapajpish* alli shinami ricurirca.
5 Pero Absalonca: “Arkitacunapuramanta Husái runata cayamupaichij. Pai ima nishcata uyashunchij” nircami.
6 Chaimi Husaica Absalonpaj ñaupajman rirca. Absalonca paimanca: “Ahitofelca ñucanchijmanca cashnami consejarca. ¿Paipaj consejotaca cazunachu canchij? Mana chashna cajpica can ñucanchij imata rurana cashcata huillailla” nircami.
7 Husaica Absalonmanca: “Ahitofel cushca consejoca cunanca mana allichu” nircami.
8 Husaica caitapish nishpami catirca: “Canca cambaj yayapish, paipaj runacunapish sinchi runacuna cashcataca allimi yachangui. Paicunaca shuj osa paipaj huahuacunata campopi chingachij shinami yallitaj pꞌiñarishcacuna can. Ashtahuancarin cambaj yayaca macanacujmi can. Chaimantami paica gentecunapurapi tutaca mana pasanga.
9 Cunanllatajmi paica maijan jutcupi, mana cashpaca maijan shujtaj lugarpi miticushca canga. Davidraj cambaj runacunata llaquichijpica cai noticiata uyajcunaca: ‘¡Absalonta apoyajcunataca mishashcacunamari!’ ningacunami.
10 Leonpaj shunguta charij shina ashtahuan mana manchaj runapish manchaimantami fuerza illaj saquiringa. Tucui israelitacunami cambaj yaya sinchi cajta, paipaj runacunapish mana manchaj cajta yachancuna.
11 Ñuca consejoca caimi can: tucui israelita runacunaca mama cucha uripi tiyaj arena shina achcacunami Danmanta callarishpa Beer-Sebacama tandanacuna can. Canmi chai macanacuimanca paicunata pushana cangui.
12 Davidtaca pai maipi cajpipish llaquichishunmi. Shulla tamya pambaman urmaj shinami achca soldadocunahuan paitaca llaquichishun. Paipish, paipaj runacunapish ni maijan causaihuanca mana saquiringachu.
13 David maijan llajtapi miticujpipish tucui israelitacuna huascacunata apashpami chai llajtataca tucui pircacunandij pugru pambaman aisashun. Chashna rurajpimi chai llajtapica ima uchilla rumillapish mana saquiringa” nircami.
14 Chaita uyashpami Absalonpish, Israelmanta tucui runacunapish: “¡Arkitacunapuramanta Husái runa cushca consejoca Ahitofel cushca consejotapish yalli allimi can!” nircacuna. Jehová Diosca Ahitofelpaj consejo alli cajpipish paipaj consejota ama catichunmi decidishca* carca. Chashnami Jehová Diosca Absalontaca llaquiman apagrirca.
15 Qꞌuipaca Husaica sacerdotecuna Sadocman, Abiatarmanca cashnami nirca: “Absalonmanpish, israelitacunata pushajcunamanpish Ahitofelca cai consejotami curca. Pero ñucaca cai consejotami paicunaman curcani.
16 Cunanca rato Davidman caita huillanaman cachaichij: ‘Cai tutaca chaquishca pambapi Jordán jatun yacuta chꞌimbana ñancunapica ama saquiringui. Jordán jatun yacutami chꞌimbana cangui. Mana chashna rurajpica reytapish, paihuan caj tucui gentecunatapishmi paicunaca huañuchingacuna’ ninguichij” nircami.
17 Jonatanpish, Ahimaazpish llajta canlla ladopimi ni pi ama ricuchun nishpa En-Roguel pugyupi saquiricurcacuna. Chaimi shuj sirvij huarmi paicunapajman rishpaca ima tucucushcata tucuita huillarca. Chaitami paicunaca rey Davidman huillanaman rircacuna.
18 Pero shuj jovenca paicunata ricushpami Absalonman huillanaman rirca. Jonatanpish, Ahimaazpish rato rishpami Bahurim pueblopi saquirij shuj runapaj huasiman chayarcacuna. Chai runaca paipaj huasi patiopimi shuj pugyu yacuta charirca. Chai pugyu yacupimi paicunaca miticurcacuna.
19 Shinallataj chai runapaj huarmica pugyutaca shuj telahuanmi taparca. Chai qꞌuipaca partishca granotami chai jahuapi shitarca. Chaimantami ima tucushcataca ni pi mana cuentata curcacuna.
20 Absalonpaj sirvijcunaca chai huarmipaj huasimanmi chayarcacuna. Paicunaca: “¿Ahimaazpish, Jonatanpish maipitaj can?” nishpami tapurcacuna. Chaimi chai huarmica: “Paicunaca yacucuna tiyan ladotami rircacuna” nishpa cutichirca. Chashna nijpimi chai runacunaca paicunata mashcanaman rishpapish mana japircacuna. Chaimantami paicunaca Jerusalenman tigrarcacuna.
21 Chai runacuna rishca qꞌuipaca paicunaca pugyumanta llujshishpami Davidpajman rishpa: “Ahitofelca cancunapaj contrami caita chaita nishpa consejarca. Chaimanta rato jatun yacuta chꞌimbaichij” nircacuna.
22 Chai ratomi Davidpish, paihuan caj tucui gentecunapish Jordán jatun yacuta pasarcacuna. Chai tuta pacarinapajca tucuicunami Jordán jatun yacuta pasarcacuna.
23 Ahitofelca pai nishca consejocunata mana catishcata ricushpaca shuj burrota parejashpami paipaj pueblopi saquirij paipaj huasiman rirca. Paipaj familiaman imata rurachun mandashca qꞌuipaca paillataj sipirishpami huañurca. Paitaca paipaj ñaupa yayacunata maipi pambashcapimi pambarcacuna.
24 Chaicamaca Davidca Mahanaim lugarmanmi rirca. Cutin Absalonca Israelmanta tucui runacunahuanmi Jordán jatun yacuta pasarca.
25 Absalón runaca Amasatami Joabpaj randi soldadocunata mandachun churarca. Amasaca israelitacunapuramanta Itrá shuti runapaj churimi carca. Itrá runaca Nahaspaj ushushi Abigailhuanmi chayarinacurca. Abigailca Zeruyapaj ñañami carca. Zeruyaca Joabpaj mamami carca.
26 Absalonpish, Israelmanta runacunapish Galaad allpapimi carpa huasicunapi saquirircacuna.
27 Davidca Mahanaim lugarmanmi chayarca. Chai ratomi ammonitacunapaj Rabá llajtamanta Nahaspaj churi Sobipish, Lo-Debarmanta Amielpaj churi Makirpish, Roguelimmanta caj galaaditacunapuramanta Barzilaipish
28 camacunata, bateacunata, barro puñucunata, trigota, cebadata, harinata, camchashca granota, habasta, lentejasta, shujtaj camchashca granocunatapish apamurcacuna.
29 Shinallataj mieltapish, mantequillatapish, ovejacunatapish, quesotapishmi apamurcacuna. Tucui caicunatami Davidpajman, paihuan caj gentecunapajman micuchun apamurcacuna. Paicunaca: “Cai gentecunaca chaquishca pambapica yaricaihuan, yacunaihuan, shaicushcacunami can” nircacunami.
