2 Samuel 18:1-33
18 Davidca paihuan caj runacunatami yuparca. Shinallataj paicunataca 1.000 gentecunata pushajcuna, 100 gentecunata pushajcuna mandachunmi churarca.
2 Davidca paihuan caj gentecunataca quimsa grupocunapimi churarca. Shuj grupotaca Joab mandachunmi churarca. Caishuj grupotaca Joabpaj huauqui Zeruyapaj churi Abisái mandachunmi churarca. Cutin caishuj grupotaca guititacunapuramanta Ittái mandachunmi churarca. Chai qꞌuipaca reyca runacunamanca: “Ñucapish cancunahuanmi risha” nircami.
3 Paicunaca: “Ama shamuichu, ñucanchij paicunamanta miticushpa rijpica paicunapajca ima mana cangachu,* ñucanchijpaj chaupi soldadocuna huañujpipish paicunapajca ima mana cangachu. Canca ñucanchijcunamanta 10.000 soldadocuna valijmari cangui. Ashtahuanpish llajtamanta ñucanchijman ayudata cachanami alli canman” nircacunami.
4 Reyca paicunamanca: “Cancunapaj ima ashtahuan alli cashcatami rurasha” nircami. Chaimi reyca chai llajtapaj pungu yaicun cꞌuchupi saquirirca. Tucui runacunaca grupocunapimi llujshircacuna. Huaquincunaca 100-pi, shujtajcunaca 1.000-pimi llujshircacuna.
5 Qꞌuipaca reyca Joabman, Abisaiman, Ittaimanca: “Joven Absalontaca ñucamanta cꞌuyaihuan tratanguichij” nishpami mandarca. Absalón runamanta pushajcunaman rey imata mandashcataca tucui runacunami uyarcacuna.
6 Runacunaca israelitacunahuan tupanacungapajmi campoman llujshircacuna. Paicunaca Efrainpi tiyaj bosquepimi macanacurca.
7 Davidta sirvijcunaca chaipimi Israelmanta runacunata misharcacuna. Chai punllapica achcacunami huañurcacuna. Tucuica 20.000 runacunami carca.
8 Macanacuica tucui llajtapimi ashtahuan mirashpa catirca. Shinallataj chai punllapi runacunaca espadamanta huañunapaj randica bosquepimi ashtahuan runacuna huañurca.
9 Absalonca Davidta sirvijcunahuanmi chꞌimbapura tupanacurca. Absalonca shuj mulapimi tiyarishca ricurca. Chai mulaca jatun yura achca ramacuna tiyan ucutami yaicurca. Chaimi Absalonpaj ajchaca chai yurapi pillurishpa saquirirca. Mula chai yura ucuta pasashpa rijpica paica chaipimi huarcurishca saquirirca.
10 Chaitaca shuj runa ricushpami Joabmanca: “¡Ricui! Absalontaca shuj jatun yurapi huarcurishcatami ricuni” nishpa huillanaman rirca.
11 Joabca chai runamanca: “Can ricushca cashpaca, ¿imamantataj mana chaillapitaj huañuchircangui? Can chashna rurashca cajpica cushicushpami canmanca chunga siclo cullquita, shuj cinturonta cuiman carcani” nishpami cutichirca.
12 Pero chai runaca Joabmanca: “Can ñucaman 1.000 siclo cullquita cujpipish* reypaj churipaj jahuapica ñuca maquitaca mana churashachu. Reyca canmanpish, Abisaimanpish, Ittaimanpish: ‘Joven Absalontaca ni pi ama dañota rurachun alli cuidanguichij’ nishpa mandashcataca ñucanchijca uyarcanchijmi.
13 Ñuca mana cazushpa Absalonpaj causaita quichushca cajpica chaitaca reyca yachaj chayanmanmi carca. Canpish ñucataca mana cuidanguimanchu carca” nircami.
14 Chaita uyashpami Joabca: “¡Canhuanca ña mana ashtahuan tiempota pirdishachu!” nirca. Absalón jatun yurapaj ramacuna chaupipi causaihuan cajpirajmi Joabca quimsa puntanicuj caspicunata* japishpa Absalonpaj shungupi satirca.
15 Chaimi Joabpaj macanacunacunata apashpa ayudaj chunga runacuna shamushpaca Absalonta huañungacama macarcacuna.
16 Ama macanacushpa catichunmi Joabca gachupi tocarca. Chaimi chai runacunaca israelitacunata catinata saquircacuna.
17 Absalonpaj cuerpota japishpaca bosquepi tiyaj jatun jutcupimi shitarcacuna. Chai jahuapica achca rumicunatami montonashpa churarcacuna. Israelmanta caj tucui runacunaca paicunapaj huasicunamanmi miticushpa rircacuna.
18 Absalón causacushparajca: “Ñucaca, ñuca shutita charij shuj churitaca mana charinichu” nishpami Rey nishca pugru pambapi shuj pilarta shayachirca. Paica chai pilartaca Absalonpaj Monumento nishpami shutichirca. Cunan punllacunacamami chai shutihuan rijsishca can.
19 Sadocpaj churi Ahimaazca: “Jehová Diosmari reytaca paipaj contracunamanta cashcata rurashpa quishpichishca. Chaimanta reypajman utca callpashpa cai noticiata huillanaman richun saquihuai” nircami.
20 Pero Joabca: “Cunanca ima noticiata huillanaman mana rinachu cangui. Reypaj propio churimari huañushca. Chaimantami noticiacunataca cunanca mana huillanaman rina cangui. Shujtaj punllami huillanaman ri tucungui” nircami.
21 Chaimi Joabca Cus* llajtamanta shuj runamanca: “Can imata ricushcata reyman huillagri” nirca. Chashna nijpimi Cus llajtamanta runaca Joabpaj ñaupajpi cumurishca qꞌuipaca callpashpa llujshishpa rirca.
22 Sadocpaj churi Ahimaazca Joabtaca cutinllatajmi: “Ñuca ima tucungapajpish Cus llajtamanta runapaj huashata callpashpa richun saquihuai” nirca. Pero Joabca: “Ñuca huahualla, ¿canpish imapajtaj rigringuiyari? Ima noticiata cunataca ña mana charinguica” nircami.
23 Chashna nijpipish Ahimaazca: “Ñuca ima tucungapajpish richun saquihuai” nishpami cutin cutin rogarirca. Chaimi Joabca: “¡Callpashpa rilla!” nirca. Shina nijpimi Ahimaazca Jordán pamba ñanta callpashpa llujshirca. Chashnami paica Cus llajtamanta runata ñaupashpa rirca.
24 Davidca chai llajtapaj ucuman tiyaj pungucunapaj, canllaman tiyaj pungucunapaj chaupipimi tiyacurca. Chapaj runaca pungu jahuapi tiyaj terrazamanmi huichiyarca. Chai pungu cꞌuchupica shuj pircami tiyarca. Chai chapaj runa huichilla ricushpaca shuj runa pailla callpashpa shamucujtami ricurca.
25 Chaimi chapaj runaca reyman huillangapaj caparirca. Reyca: “Pailla cashpaca noticiacunatami apamucunga” nircami. Callpaj runa cꞌuchuyamucujpica
26 chapaj runaca shujtaj runa callpacujtami ricurca. Chaimi punguta cuidajtaca: “¡Ricui! ¡Shujtaj runamari pailla callpacun!” nishpa caparirca. Chashna nijpimi reyca: “Chai runapish noticiacunatami apamucunga” nirca.
27 Shinallataj chapaj runaca: “Puntaca Sadocpaj churi Ahimáaz shinami callpacun” nircami. Shina nijpimi reyca: “Cai runaca alli runami can. Paica alli noticiacunatamari apamucunga” nirca.
28 Chaimi Ahimaazca reymanca: “¡Alli huillaicunatami charini!” nishpa caparirca. Chai qꞌuipaca reypaj ñaupajpi pambacama cumurishpami paica: “¡Cambaj Jehová Dios alabashca cachun, paimi cambaj contra tucujcunataca* cambaj maquipi entregashca!” nirca.
29 Ashtahuanpish reyca paitaca: “¿Joven Absalonca allillachu can?” nishpami tapurca. Chashna nijpimi Ahimaazca: “Ñucatapish, reypaj caishuj sirvijtapish Joab cachai ratoca yallitaj bulla tiyashcatami ricurcani. Pero chai bulla imamanta tiyashcataca ñucaca mana yacharcanichu” nishpa cutichirca.
30 Chaimi reyca Ahimaaztaca: “Ladoman tucui, caipi shayari” nirca. Chashna nijpimi Ahimaazca shuj ladoman shayarishpa chaipi saquirirca.
31 Qꞌuipaca Cus llajtamanta runa chayashpami reymanca: “Ñuca amito reypajmi noticiacunata apamuni. Cunanca cambaj tucui contra tucujcunapaj maquimantami Jehová Diosca cashcata rurashpa canta quishpichishca” nirca.
32 Pero reyca Cus llajtamanta runamanca: “¿Joven Absalonca allillachu can?” nircami. Chashna nijpimi Cus llajtamanta runaca: “¡Ñuca amito reylla, cambaj tucui enemigocunapish, canta llaquichingapaj cambaj tucui contra tucujcunapish chai joven shinallataj huañuchun!” nishpa cutichirca.
33 Chaita uyashpami reyca yallitaj llaquilla carca. Paica pungu jahuapi tiyaj terrazaman huichiyashpami chaipi tiyaj cuartoman yaicurca. Chaipimi huacai callarirca. Paica caiman chaiman purishpami: “¡Absalón, ñuca huahualla! ¡Ñuca huahualla! ¡Absalón, ñuca huahualla! ¡Cambaj randi ñuca huañushca cashpachari alli canman carca! ¡Absalón, ñuca huahualla, ñuca huahualla!” nirca.
Notacuna
^ Hebreo rimaipica: “ñucanchijpica shunguta mana churangacunachu” ninmi.
^ Hebreo rimaipica: “1.000 siclo cullquita ñuca maqui shungupi pesacushpapish” ninmi.
^ Caitaca “lanzacunata” nishpapishmi traducishcacuna. Hebreo rimaipica: “varacunata” ninmi.
^ O “Etiopía”.
^ Hebreo rimaipica: “paicunapaj maquita alzajcunataca” ninmi.
