2 Samuel 2:1-32
2 Chai qꞌuipaca Davidca Jehová Diostaca: “¿Judapi tiyaj llajtacunamanta shuj llajtaman huichiyashachu?” nishpami tapurca. Chashna tapujpimi Jehová Diosca: “Ari, huichiyailla” nirca. Chaimi Davidca: “¿Maimantaj risha?” nishpa tapurca. Shina nijpimi Diosca: “Hebronman huichiyai” nishpa cutichirca.
2 Davidca paipaj ishqui huarmicunahuanmi Hebronman huichiyarca. Shujca Jezreel llajtamanta Ahinoam huarmimi carca. Cutin caishujca Abigailmi carca. Paica Nabalmantami viuda saquirishca carca. Nabalca carmelitacunapuramantami carca.
3 Shinallataj Davidca paihuan caj runacunatapishmi pusharca. Cada unotami paicunapaj familiandij pusharca. Chai runacunaca Hebrón llajtapi, chai cꞌuchullapi tiyaj llajtacunapimi causai callarircacuna.
4 Judapaj familiamantami huaquin runacuna shamurcacuna. Paicunaca Davidtami Judapaj familiapaj rey cachun agllarcacuna.
Shinallataj paicunaca Davidmanca: “Jabés-Galaadmanta runacunami Saultaca pambarcacuna” nircacunami.
5 Davidca Jabés-Galaadpi causaj runacunamanca huillajcunatami cacharca. Paica caita nichunmi cacharca: “Jehová Dios cancunata bendiciachun. Cancunapaj amito rey Saulta pambashpaca mana tucurij cꞌuyaitami ricuchishcanguichij.
6 Cancunamanca mana tucurij cꞌuyaita Jehová Dios siempre ricuchichun. Cancuna imata rurashcamantaca ñucapish cꞌuyaitami ricuchisha.
7 Cunanca sinchicuna,* mana manchajcuna caichij. Cancunapaj amito Saulca huañushcami. Judapaj familiaca ñucatami paicunapaj rey cachun agllashca” nircami.
8 Saulpaj soldadocunata mandaj Nerpaj churi Abnerca Saulpaj churi Is-Bosettami jatun yacu caishuj ladopi tiyaj Mahanaim lugarman pushashca carca.
9 Abnermi Is-Bosettaca Galaadpaj, asuritacunapaj, Jezreelpaj, Efrainpaj, Benjaminpaj, tucui Israelpaj allpacunata mandachun churashca carca.
10 Saulpaj churi Is-Bosetca 40 huatacunata charishpami Israelpi rey tucurca. Paica ishqui huatacunatami mandarca. Shinapish Judapaj familiaca Davidtami apoyarcacuna.
11 Davidca canchis* huatacunata sujta* quillacunatami Judapaj familiataca Hebrón llajtapi mandarca.
12 Tiempo qꞌuipaca Nerpaj churi Abnerpish, Saulpaj churi Is-Bosetpaj sirvijcunapish Mahanaim lugarmanta llujshishpami Gabaonman rircacuna.
13 Zeruyapaj churi Joabpish, Davidta sirvijcunapishmi Gabaonpaj jatun tanque yacu cꞌuchupi tupanacungapaj llujshircacuna. Shuj grupoca jatun tanque shuj ladoman, cutin caishuj grupoca jatun tanque caishuj ladomanmi tiyarircacuna.
14 Chaimi Abnerca Joabtaca: “Jovencuna jatarishpa ñucanchij ñaupajpi macanacuchun”* nirca. Chashna nijpimi Joabca: “Paicuna jatarichun” nirca.
15 Shina nijpimi jatarishpa chai jovencunaca ñaupajman pasarcacuna. Numeropipish igualmi carcacuna. Saulpaj churi Is-Bosetpaj grupomantaca 12 benjaminitacunami carcacuna. Cutin Davidpaj sirvijcunamantaca 12-mi carcacuna.
16 Paicunaca caishujmanta chaishujmantami uma ajchamanta aisarinacurcacuna. Qꞌuipaca caishujmanta chaishujmantami paicunapaj espadahuan costilla ladopi satinacurcacuna. Chashnami tandalla tucuicuna huañurcacuna. Chaimantami Gabaonpi saquirij chai lugartaca Helcat-Hazurim* nishpa shutichircacuna.
17 Chai punllaca sinchi macanacuimi callarirca. Chashnami Davidta sirvijcunaca Abnertapish, israelitacunatapish misharcacuna.
18 Chaipimi Zeruyapaj quimsa churicunaca carca. Paicunaca Joab, Abisái, Asahelmi carca. Asahelca sacha gacela shina rato callpajmi carca.
19 Chaimi Asahelca Abnerta catishpa paipaj huashata callpashpa rirca. Paica alli ladomanpish, lluqui ladomanpish mana anchurishpami catirashpa rirca.
20 Abnerca huashaman tigralla ricushpaca: “¿Asahel, canchu cangui?” nishpami tapurca. Chashna tapujpimi: “Ari, ñucami cani” nishpa cutichirca.
21 Chaipimi Abnerca Asaheltaca: “Alli ladoman, mana cashpaca lluqui ladoman rishpa jovencunamanta shuj joventa japi. Pai imalla charishca cosascunatapish tucui quichui” nirca. Pero Asahelca paita catinataca mana saquisha nircachu.
22 Abnerca cutinllatajmi Asaheltaca: “Ñucata catinata saqui. ¿Imamantataj canta huañuchichun obligangui? ¿Chashna rurashpaca cambaj huauqui Joabtaca ima shinataj ñahui ñahuica ricushayari?” nircami.
23 Pero Asahelca paita catinataca mana saquircachu. Chaimi Abnerca lanza huasha ladohuan Asahelpaj huijsata chugrichijpi chai lanzaca paipaj huashaman pasarca. Chashna rurajpimi Asahelca chaillapitaj urmashpa huañurca. Chaita pasajcunaca tucuicunami Asahel urmashpa, huañushcata ricungapaj shuj rato saquirijcuna carca.
24 Chaimi Joabpish, Abisaipish Abnerta cati callarircacuna. Ña inti huashicujpica paicunaca Amá shuti lomamanmi chayarcacuna. Amá lomaca Guíah lugar chꞌimba ladopi, Gabaón chaquishca pambaman rina ñanpimi saquirin.
25 Shinallataj benjaminitacunaca Abnerpaj muyundijpimi tandanacurcacuna. Chashnami paicunaca shuj grupo soldadocuna tucushpa macanacungapaj caishuj loma puntapi shayarircacuna.
26 Abnerca Joabta caparishpaca: “¿Ima horacamataj canca espadacunahuan macanacushpa catingui? ¿Manachu cashna macanacushpaca achca llaquicunata apamucushcata cuentata cungui? ¿Cambaj gentecunataca paicunapaj huauquicunahuan macanacunata saquichun ningapajca imatataj shuyacunguiyari?” nircami.
27 Chashna nijpimi Joabca: “Causaj Diospaj shutipimi jurani. Can imata mana nishca cajpica caya tutamantacamami gentecunaca paicunapaj huauquicunata catinataca mana saquinman carca” nirca.
28 Shina nijpimi Joabca gachupi tocarca. Paipaj runacunapish israelitacunata catinata saquijpimi macanacuipish tucurirca.
29 Abnerpish, paihuan caj runacunapish chai tucui tutallatajmi Arabá ñanta purircacuna. Chashnami Jordán jatun yacuta chꞌimbarcacuna. Shinallataj pugru pambata* pasashpami Mahanaim lugarman chayarcacuna.
30 Abnerta catinata saquishca qꞌuipaca Joabca tucui gentecunatami tandachirca. Chaimi Davidta sirvijcunamantaca 19 runacuna illarca. Asahelpishmi illarca.
31 Pero Davidta sirvijcunaca benjaminitacunatapish, Abnerpaj runacunatapishmi mishashcacuna carca. Paicunapaj runacunamantaca 360-mi huañushcacuna carca.
32 Asahelta apashpaca paipaj yayata pambashca jutcupimi pambarcacuna. Chai jutcuca Belenpimi carca. Chai huashaca Joabpish, paipaj runacunapish tucui tuta purishpami Hebronman pacarinata chayarcacuna.
Notacuna
^ O “cancunapaj maquicunata sinchiyachichij”.
^ O “siete”.
^ O “seis”.
^ O “mishanacuchun”.
^ “Helcat-Hazurim” shutica ‘pedernal rumimanta cuchillocuna tiyan campo’ nisha ninmi.
^ Caitaca “tucui Bitronta” nishpapishmi traducishcacuna.
