2 Samuel 20:1-26
20 Chaipica benjaminitacunapuramanta Bicrí runapaj churi problemata ruraj Seba shuti runami tiyarca. Paica gachupi tocashpaca: “Ñucanchijca Davidpaj familiamanta mana canchijchu. Jesepaj churica ñucanchijman imata mana cungachu. ¡Israelitacuna, jacuchij! ¡Cada uno cancunapaj dioscunata* mashcaichij!” nircami.
2 Chaita uyashpami tucui israelitacunaca Davidta catinata saquishpa Bicripaj churi Seba runata catircacuna. Pero Judapaj familiamanta runacunaca paicunapaj reytaca Jordán jatun yacumanta Jerusalencama compañashpa mana saquircacunachu.
3 Davidca Jerusalenpimi chunga caishuj huarmicunataca* paipaj huasita* cuidachun saquishca carca. Pai tigrashpaca chai chunga caishuj huarmicunata japishpami shuj huasipi churashpa guardiacuna cuidachun saquirca. Davidca chai huarmicunamanca siempremi micunata curca. Pero paicunahuanca cutinca ña mana chayarircachu. Chai huarmicunaca chai huasipimi huañungacama chꞌicanyachishca carcacuna. Paicunapaj cusa causacujpipish viudacuna shinami causarcacuna.
4 Reyca Amasá runamanca: “Quimsa punllacuna tucujpica Judapaj familiamanta runacuna ñucapajman shamuchun cayai. Canpish ñucapajman shamungui” nircami.
5 Chaimi Amasá runaca Judapaj familiamanta runacunata cayanaman rirca. Pero Amasaca rey nishca tiempopica mana shamurcachu.
6 Davidca Abisaimanca: “Bicripaj churi Seba runaca Absalontapish yallimi ñucanchijta llaquichi tucun. Muyundijta pircashca llajtacunaman yaicushpa pai ama miticuchun, ñucata sirvijcunata* pushashpa paita cati” nircami.
7 Chaimi Joabpaj runacunapish, keretitacunapish, peletitacunapish, fuerzasapa tucui runacunapish paita* catishpa llujshircacuna. Paicunaca Bicripaj churi Seba runata catingapajca Jerusalenmantami llujshircacuna.
8 Chashnami paicunaca Gabaonpi tiyaj jatun rumiman chayarcacuna. Chaipimi Amasaca paicunata tupanaman shamurca. Joabca paipaj macanacunaman rina ropata churarishca, paipaj cinturonpipish shuj espadata apashcami carca. Amasá runapajman Joab cꞌuchuyacujpica paipaj espadami huaquichinamanta urmarca.
9 Joabca Amasá runataca: “¿Ñuca huauquilla, allillachu cangui?” nircami. Chashnami Joabca muchagrij shina paipaj alli lado maquihuan Amasapaj barbasta japirca.
10 Joab paipaj maquipi espadata charicushcamantaca Amasaca mana cuidarircachu. Joabca chai espadahuanmi Amasapaj huijsapi satirca. Chaimi chunllullicuna llujshishpa pambaman urmarca. Espadata shujtaj cutinhuan satinaca mana minishtirircachu. Paita huañuchingapajca espadahuan shuj cutinlla satinami minishtirirca. Chai qꞌuipaca Joabpish, paipaj huauqui Abisaipish Bicripaj churi Sebatami catishpa rircacuna.
11 Joabpaj runacunamanta shuj runami Amasapaj cuerpo cꞌuchupi shayarishpaca: “¡Maijanpish Joabpaj lado cajpish, Davidtapish apoyajca Joabta catichun!” nirca.
12 Chashna ningacamaca Amasaca chai chaupi ñanpimi paipaj yahuarllapitaj singuricurca. Chaita ricungapaj tucui gentecuna shayarijta ricushpami chai runaca Amasataca ñanmanta llujshichishpa shuj ladoman churarca. Shinallataj Amasapaj cuerpo cꞌuchuta tucui pasajcuna shayarijta ricushpami paitaca shuj churanahuan taparca.
13 Chai runa Amasapaj cuerpota ñanmanta anchuchijpica Bicripaj churi Sebata catingapajmi tucui runacuna Joabta catishpa rircacuna.
14 Seba runaca Abel-bet-maacá llajtaman chayangapajmi Israel llajtamanta tucui familiacunapaj allpacunata pasashpa rirca. Shinallataj bicritacunapish tandanacushpami Seba runapaj huashata catishpa chai llajtaman yaicurcacuna.
15 Joabpish, paihuan caj runacunapish Abel-bet-maacá llajtaman chayashpami chai llajta muyundijta shayarircacuna. Chai llajtaca muyundijtami jatun pircayuj carca. Chaimantami chai llajtata llaquichingapajca allpata montonashpa churarcacuna. Shinallataj Joabpaj runacunaca chai llajtata urmachingapajmi pirca ucucunata allai callarircacuna.
16 Chai llajtamanta shuj yachaisapa huarmica: “¡Uyaichij, uyaichij! Ñucaca Joab runahuanmi parlasha nini, Joab shamuchun huillapaichij” nishpami capari callarirca.
17 Joab chai huarmipajman cꞌuchuyajpica chai huarmica: “¿Canca Joabchu cangui?” nishpami tapurca. Shina tapujpimi Joabca: “Ari, ñucallatajmi cani” nishpa cutichirca. Chaimi chai huarmica: “Canta sirvijpaj nishcacunata uyai” nirca. Chashna nijpimi Joabca: “A ver parlailla” nirca.
18 Chai huarmica cashna nishpami catirca: “Ñaupaca siempremi ‘Gentecuna shuj problemata charishpaca chaita allichingapaj Abel llajtapi consejota mañagrichun. Chashnami allichishca canga’ nijcuna carca.
19 Ñucaca tranquilo causajcunapaj, Israelpi tucui shunguhuan sirvijcunapaj shutipimi parlani. Canca Israelpi shuj mama shina caj llajtatami tucuchisha ningui. ¿Imamantataj canca Jehová Diospaj herenciataca tucuchigringui?”* nircami.
20 Joabca cashnami cutichirca: “Ñucaca chai llajtata tucuchinata, chingachinataca mana yuyashcanillapishchu.
21 Chaitaca ñucaca mana rurashachu. Efraín urcucunamanta caj Bicripaj churi Seba shuti runami Davidpaj contra tucushca.* Cancuna chai runata ñucaman entragajpica ñucaca cai llajtamanta rishallami” nircami. Chaimi chai huarmica Joabmanca: “¡Paipaj umataca pirca jahuatami shitashun!” nirca.
22 Chashna nishca qꞌuipami chai yachaisapa huarmica tucui gentecunahuan parlanaman rirca. Paicunaca Bicripaj churi Sebapaj umata pꞌitishpami Joabpajman shitarcacuna. Chashna rurajpimi Joabca gachupi tocarca. Gachupi tocajpica runacunaca chai llajtamanta anchushpami cada uno paicunapaj huasiman tigrarcacuna. Joabpish Jerusalenman, rey maipi cashcamanmi tigrarca.
23 Joabca Israelmanta tucui soldadocunata mandajmi carca. Jehoiadapaj churi Benayapish keretitacunata, peletitacunata mandajmi carca.
24 Adoram runaca sinchi trabajocunata rurachun tandachishca runacunatami mandacurca. Ahiludpaj churi Jehosafatpish registradormi carca.
25 Sevá runaca secretariomi carca. Cutin Sadocpish, Abiatarpish sacerdotecunami carca.
26 Jairitacunapuramanta Irá runaca Davidta sirvijcunapuramanta shuj importante cargotami charij* carca.
Notacuna
^ Caitaca “cancunapaj carpa huasicunata” nishpapishmi traducishcacuna.
^ O “concubinacunataca”.
^ O “palaciota”.
^ Hebreo rimaipica: “cambaj amitota sirvijcunata” ninmi.
^ Abisái runami cashca canga.
^ Hebreo rimaipica: “millpugringui” ninmi.
^ Hebreo rimaipica: “paipaj maquita jatarichishca” ninmi.
^ Hebreo rimaipica: “shuj sacerdotemi” ninmi.
