2 Samuel 21:1-22
21 Davidpaj punllacunapica quimsa huatacunatami yaricai tiyarca. Chaimi Davidca Jehová Diosta tapurca. Jehová Diosca: “Saulmi gabaonitacunata huañuchirca. Chaimantami paipish, paipaj familiapish yahuarta jichashcamanta culpablecuna can” nishpami cutichirca.
2 (Gabaonitacunaca mana israelitacunapuramanta carcachu. Paicunaca saquirij amorreocunapuramantami carca. Israelitacunaca paicunataca mana huañuchishun nishpami jurashca carcacuna. Pero Saulca Israelmanta, Judamanta gentecunata ayudanata munashcamantami paicunataca tucuchisha nirca). Chaimantami reyca gabaonitacunahuan parlangapaj paicunata cayanaman cacharca.
3 Davidca gabaonitacunataca: “¿Cancunamantaca imatataj rurai tucuniyari? ¿Cancuna Jehová Diospaj herenciata bendiciachunca ñucanchij juchamantaca ima shinataj pagai tucuniyari?” nircami.
4 Gabaonitacunaca: “Saulpish, paipaj familiapish ñucanchijta imata rurashcamantaca ni cullquihuan, ni orohuan mana pagai tucuncunachu. Ñucanchijpish Israelpica ni pita mana huañuchi tucunchijchu” nishpami cutichircacuna. Chashna nijpimi Davidca: “Cancuna ima munashcata mañaichijlla, ñucaca chaita rurashallami” nirca.
5 Gabaonitacunaca reymanca: “Chai runaca ñucanchijtami tucuchinata munarca. Shinallataj Israelpica ñucanchijmanta shujllapish causaihuan ama saquirichunmi yuyacurca.
6 Chaimantami paipaj canchis churicunata ñucanchijman cuchun mañanchij. Chashnami Jehová Diospaj ñaupajpi huañushca cuerpocunata huarcushun.* Chaitaca Jehová Dios agllashca Saúl causacushca Guibeá llajtapimi chashna rurashun” nircacunami. Chaimi reyca: “Ñucallatajmi paicunataca entregasha” nirca.
7 Davidca Saulpaj churi Jonatanhuanmi Jehová Diospaj ñaupajpi shuj ari ninacuita rurashca carca. Chaimantami reyca Mefibosetman cꞌuyaita ricuchirca. Mefibosetca Jonatanpaj churimi carca. Jonatanca Saulpaj churimi carca.
8 Reyca Armonitapish, Mefibosettapishmi agllarca. Cai ishqui churicunatami Ayá runapaj ushushi Rizpá huarmica Saulhuan charishca carca. Saulpaj ushushi Mical* charishca pichca churicunatapishmi agllarca. Cai churicunataca Micalca meholatitacunapuramanta Barzilaipaj churi Adrielhuanmi charishca carca.
9 Chashna agllashpami paicunataca gabaonitacunaman entregarca. Gabaonitacunaca huañushca cuerpocunatami urcupi Jehová Diospaj ñaupajpi huarcurcacuna. Chashnami canchis runacunaca tandalla huañurcacuna. Cosechana punta punllacunapimi paicunataca huañuchircacuna. Chai punllacunaca cebadata cosechana punta punllacunami carca.
10 Chai qꞌuipaca Ayapaj ushushi Rizpaca shuj racu sacota* japishpami jatun rumi jahuapi tindirca. Chashnami cosecha callarimanta huañushca cuerpocunapaj jahuapi jahua pachamanta tamya urmangacama chaipi saquirirca. Paica punllapica jahuata volaj animalcuna chai huañushcacunapaj cuerpo jahuapi tiyarichunca mana saquircachu. Cutin tutapish sachapi causaj animalcuna cꞌuchuyachunca mana saquircachu.
11 Davidmanca Saulpaj caishuj huarmi* imata rurashcatami parlarcacuna. Rizpá huarmica Ayá runapaj ushushimi can.
12 Davidca Saulpaj, paipaj churi Jonatanpaj tullucunatami mashcanaman rirca. Jabés-Galaadmanta pushajcunaca paicunapaj tullucunatami Bet-San plazamanta shuhuashpa charicushcacuna carca. Chaipimi filisteocunaca Guilboa urcupi Saulta mishashca punllaca Saultapish, Jonatantapish huarcushcacuna carca.
13 Davidca chaimantami Saulpaj tullucunata, paipaj churi Jonatanpaj tullucunatapish apamurca. Shinallataj gabaonitacuna huañuchishca runacunapaj tullucunatapishmi tandachircacuna.
14 Saulpaj tullucunatapish, paipaj churi Jonatanpaj tullucunatapish Saulpaj yaya Quis runata pambashcapimi Benjaminpaj allpapi caj Zelá llajtapi pambarcacuna. Rey imalla mandashcata paicuna utca tucuita pajtachijpimi israelitacuna paicunapaj llajtamanta mañashcataca Diosca uyarca.
15 Filisteocunahuan, israelitacunahuanca cutinllatajmi macanacui callarircacuna. Chaimi Davidca paipaj sirvijcunahuan filisteocunapaj contra macanacunaman uriyarca. Pero Davidca yallitajmi shaicushca sintirirca.
16 Refaimcunapaj huahua huahuacunamanta Isbí-Benob shuti runami Davidta huañuchisha nirca. Paica cobremanta rurashca 300 siclota* pesaj lanzatapish, shuj mushuj espadatapishmi charirca.
17 Chai ratomi Zeruyapaj churi Abisaica Davidta quishpichinaman shamurca. Abisaica filisteo runata llaquichishpami huañuchirca. Chaimi Davidpaj runacunaca reymanca: “¡Israelpaj lamparata ama huañuchingui. Can ñucanchijhuan macanacunaman llujshichunca ña mana saquishunchu!” nishpa jurarcacuna.
18 Chai qꞌuipaca cutinmi Gob llajtapi filisteocunahuan macanacurcacuna. Chaipimi husatitacunapuramanta Sibecái runaca refaimcunapaj huahua huahuacunamanta Saf runata huañuchirca.
19 Cutinllatajmi filisteocunapaj contra Gob llajtapi macanacui callarircacuna. Betlemitacunapuramanta Jaaré-Oreguimpaj churi Elhananca guititacunapuramanta Goliattami huañuchirca. Goliatca telarpaj shuj pilluna caspi shina jatun lanzatami charirca.
20 Qꞌuipamanca Gatpimi cutin macanacui tiyarca. Chaipica manchanai shuj jatun runami tiyarca. Chai runaca cada maquipica sujta dedocunata, cada chaquipipish sujta dedocunatami charirca, tucuica 24 dedocunatami charirca. Paica refaimcunapaj huahua huahuacunamantami carca.
21 Chai runa israelitacunata yangapi churashpa, cꞌaminata manataj saquijpimi Simeipaj churi Jonatanca paita huañuchirca. Paica Davidpaj huauquimi carca.
22 Cai chuscu runacunaca Gat llajtapimi refaimcunapaj huahua huahuacuna carca. Paicunatami Davidpish, paita sirvijcunapish huañuchircacuna.
Notacuna
^ Caipica paicunapaj maquicunata, chaquicunata pꞌaquishpa huarcunamantami parlacun. “Caspi” shimita huasha diccionariopi ricui.
^ Caitaca “Merab” nishpapishmi traducishcacuna.
^ O “pꞌaza sacota”, “cañamazu sacota”.
^ O “concubina”.
^ Casi 3.42 kilogramocunata (7.5 libracunatami) charirca. Ayuda B14-ta ricui.
