2 Samuel 22:1-51
22 Jehová Dios paipaj tucui contracunapaj maquimantapish, Saulpaj maquimantapish quishpichishcamantami Davidca cai cantota Jehová Diosman cantarca.
2 Paica:
“Jehová Diosca ñuca jatun pata rumimari, ñuca jatun pircamari,* ñucata quishpichijmari.
3 Ñuca Diosca ñuca jatun rumimari, paipimari miticui tucuni.Paica ñuca escudomari, ñuca jatun quishpichijmari,* paica ñuca miticunatajmari.Paica ñuca miticuna lugarmari, ñucata quishpichijmari. Canmi ñucataca millai runacunamanta quishpichingui.
4 Ñucaca Jehová Diostami cayani, paillami alabashca cana can.Ñuca contracunamantapish quishpichishcami casha.
5 Huañuchij mama cucha yacuca jatarishpami ñuca muyundijpi carca.Imapaj mana valij runacunapish yacu jundashpa shamuj shinami manchachirca.
6 Pambana Jutcu* huascacunapish ñuca muyundijpimari carca.Huañuchij trampacunapish ñuca ñaupajpimari carca.
7 Ñuca llaquilla cashpaca Jehová Diostami cayarcani,ñuca Diostami cayashpa catircani.
Chaimi Diosca ñuca cayashcataca paipajlla chꞌicanyachishca huasimanta uyarca,ayudachun sinchita ñuca caparishcacunapish paipaj rinrincunamanmi chayarca.
8 Allpaca cuyurishpami chujchui callarirca.Cielopaj cimientocunapish chujchurcami.Dios pꞌiñarishcamantami chashna cuyurircacuna.
9 Paipaj singamantapish cushnimi llujshirca,paipaj shimimantapish lunyacuj ninami llujshirca.Paimantaca pucanicuj carbonpishmi llujshicurca.
10 Pai uriyamucushpaca jahua pachatami cumurichirca,paipaj chaquicuna ucupica yana amsa pꞌuyucunapishmi tiyarca.
11 Querubín jahuapi montashpami volashpa shamurca.
Shuj angelpaj alascuna jahuapimi ricurirca.
12 Paica paipaj muyundijpimi miticuna shina amsata churarca.Yana yacucunatapish, amsa pꞌuyucunatapishmi churarca.
13 Paipaj ñaupajpi achijnicuj tiyashcamantami pucanicuj carbón llujshirca.
14 Chashnami Jehová Diosca jahua pachamanta cꞌulun ni callarirca.Jatun Diosca pai rimashcatamari uyachirca.
15 Flechacunata shitashpamari ñuca contracunataca caita chaita cacharca.Paipaj rayocunata cachashpamari paicunata manchachirca.
16 Jehová Dios sinchita rimajpi,paipaj singapish sinchita pꞌucujpimari mama cucha yacu asientoca aliri saquirirca,allpapaj cimientocunapish aliri saquirirca.
17 Paica jahuamanta paipaj maquita chutashpamari ñucata japirca.Shinallataj jatun yacucuna ucujmantamari ñucata llujshichirca.
18 Paica ñucapaj sinchi contracunamanta,ñucata pꞌiñajcunamantami quishpichirca. Paicunaca ñucata yalli sinchimi carcacuna.
19 Ñucata pꞌiñajcunaca ñuca llaquicunahuan cajpimi ñucata llaquichircacuna.Pero Jehová Diosmari ñucataca ayudarca.
20 Paimi ñucataca llaquimanta quishpichirca.Paica ñucahuan cushilla cashcamantami ñucata quishpichirca.
21 Ñuca cashcata rurashca shinallatajmi Jehová Diosca ñucaman cun.Ñuca chuya maqui cashca shinallatajmi paica ñucamanca pagan.
22 Ñucaca Jehová Diospaj ñancunapimari purishcani.Ñucaca Diosmantaca mana caruyashcanichu, paimanta caruyanaca jatun juchamari.
23 Tucui pai imalla rurachun nishcacunataca yuyaipimi charini.Paipaj mandashcacunamantaca manataj caruyashachu.
24 Paipaj ñaupajpica jucha illajmari catisha,ñucaca ima pandata ruranamantapish cuidarishamari.
25 Ñuca cashcata rurashca shinallataj Jehová Dios pagachun,paipaj ñaupajpi mana culpayuj cashcamantami paica ñucamanca pagan.
26 Mana tucurij cꞌuyaita ricuchijmanca canca mana tucurij cꞌuyaitamari ricuchingui.Jucha illaj runataca* canca jucha illaj runata shinallatajmari tratangui.
27 Chuya cajmanca canpish chuya cashcallatatajmi ricuchingui.Pero millai runamanca canca yachaisapa cashcatami ricuchingui.*
28 Canca humildecunataca quishpichinguimi.Pero jatun tucushcacunataca humillashpami mana ricunayachingui.
29 Jehová Dioslla, canca ñuca lamparamari cangui.Ñuca muyundijpi caj amsatapish Jehová Diosmari achijyachin.
30 Cambaj ayudahuanmi achca shuhuacunahuan macanacui tucuni.Diospaj poderhuanmi shuj pircatapish huichiyai tucuni.
31 Dios tucui imalla rurashcacunaca jucha illajmari,Jehová Dios nishcacunapish chuyamari.*
Paica paipi tucui miticujcunapajca shuj escudo shinamari.
32 ¿Jehová Diosmantaca pi shujtaj Diostaj tiyanyari?
¿Dios shina jatun rumica pitaj tiyanyari?
33 Diosca ñuca sinchi miticunamari,paimari ñuca ñantaca allichinga.
34 Paimari ñucataca tarugata shina saltachin.Paimari cꞌaca quinricunapipish ñucataca sinchita shayachin.
35 Paimari macanacungapajpish ñuca maquicunata yachachin.Ñuca rigracunaca shuj cobre arcotamari chutai tucun.
36 Canca ñuca quishpirichunmi cambaj escudota cungui.Cambaj humildadmari ñucataca jatunyachin.
37 Ñuca purina ñantami jatunyachingui,chashnami ñuca chaquicunaca mana lluchcaringa.
38 Ñucapaj contracunatami catisha, paicunataca tucuchishami.Paicunata tucuchingacama mana tigrashachu.
39 Paicuna ama jatarichunca paicunataca llapishpami tucuchisha.Paicunaca ñuca chaquicuna ucupimi urmangacuna.
40 Ñuca macanacungapajca canmi fuerzahuan chumbillichingui.Canmi ñucapaj contracunata ñuca ñaupajpi urmachingui.
41 Ñuca contracuna ñucamanta miticushpa richunmi saquingui.*Ñucata pꞌiñajcunataca tucuchishami.*
42 Paicunaca ayudachunmi caparincuna, pero paicunataca ni pi mana quishpichi tucunchu.Jehová Diostapishmi caparincuna, pero paicuna caparishcataca Diosca mana cutichinchu.
43 Paicunataca ñutu allpa shina tucungacamami cutasha.Paicunataca ñutushami, ñancunapi tiyaj lodota shinami sarusha.
44 Ñuca llajta gentecuna cꞌamishcamantami canca ñucata quishpichingui.
Llajtacunata pushaj cachunmi canca ñucata cuidangui.Mana rijsishca gentecunami ñucata sirvingacuna.
45 Shujtaj llajtamanta runacunaca manchaihuanmi ñuca ñaupajpi cumuringacuna.Ñucamanta uyashpami paicunaca ñucata cazungacuna.
46 Shujtaj llajtamanta runacunaca fuerza illajmi saquiringacuna.Paicunapaj miticunacunamantapish manchaihuanmi shamungacuna.
47 ¡Jehová Diosca causaj Diosmari! ¡Ñuca Jatun Rumilla alabashca cachun!
¡Ñucata quishpichij jatun rumi, ñuca Diosca alabashca cachun!
48 Paica ñucata llaquichijcunata llaquichij Diosmi,paica llajtacunata ñuca chaqui ucupi churajmi.
49 Canca ñucataca contracunamantami quishpichingui.
Canca ñucata llaquichijcunapaj jahuamanta ashtahuan jahuamanmi churangui.Canca millai runamantapish quishpichinguimi.
50 Chaimantami ñuca Jehová Dioslla, llajtacunapaj chaupipi cantaca pagui nisha.Cambaj shutitapish alabashpami cantasha.
51 Can agllashca reytaca mancharina cosascunata rurashpami quishpichingui.Can agllashca Davidman, paipaj huahua huahuacunamanpishcambaj mana tucurij cꞌuyaitami huiñaipaj ricuchingui” nircami.
Notacuna
^ Caipica muyundijta jatun pircamantami parlacun.
^ Hebreo rimaipica: “quishpichij gachumari” ninmi. “Quispichij gachu” shimita huasha diccionariopi ricui.
^ O “Seol”. Cai shimica huañushcacuna samaricujta ricuchingapajllami can. “Seol” shimita huasha diccionariopi ricui.
^ Hebreo rimaipica: “sinchi runataca” ninmi.
^ Caitaca “muspa cashca shimami comportaringui” nishpapishmi traducishcacuna.
^ O “ninahuan chuyayachishcamari”.
^ O “Ñuca contracunapaj huashacunatami entregangui”.
^ Hebreo rimaipica: “upallachishami” ninmi.