2 Samuel 23:1-39
23 Caica Davidpaj tucuri shimicunami:
“Jesepaj churi David nishcacunamari,jatunyachishca runapaj shimicunamari,paica Jacobpaj Dios agllashcami.Paica Israelmanta cantocunata sumajta cantaj runamari.
2 Jehová Diosmari paipaj shimita huillachun poderta curca.Paipaj shimicunatapish ñuca cꞌallupi churajpimi parlarcani.
3 Israelitacunapaj Diosmi parlarca,israelitacunapaj Jatun Rumica ñucamanca cashnami nirca:
‘Maijan mandajpish cashcata rurashpa gentecunata mandajpi,Diosta manchashpa mandajpica,
4 paipaj mandanaca tutamanta ladoman inti achijyachij luz shinamari,tutamanta lado pꞌuyu illaj shinamari.
Tamyashca qꞌuipa achijnicuj shinamari,chai achijnicuj, chai tamyami allpamanta qꞌuihuacunata huiñachin’ nircami.
5 ¿Manachu ñuca familiaca Diospaj ñaupajpica chashna can?
Paimi ñucahuanca huiñaipaj shuj ari ninacuita rurarca.Paica chaita ima shina ruranatami huillashca, pai nishcatapish pajtachinataj cashcatami yachani.
Cai ari ninacuica ñuca quishpirina, ñuca cushicunamari,¿manachu chaimanta ñuca familiataca sisata huiñachicuj shina paica huiñachicun?
6 Pero imapajpish mana valij gentecunaca zarza yuracuna shinami shitashcacuna can.Zarza yuracunataca maquicunahuanca mana japi tucuncunachu.
7 Shuj runa chaicunata japisha nishpacafierro macanacunahuan, lanza caspihuanmi allichirishca cana can.Chaicuna maipi huiñajpipish ninahuanmi tucuita rupachina can” nircami.
8 Davidpaj sinchi macanacujcunapaj shuticunaca caicunami can. Tahkemonitacunapuramanta Joseb-Basébet runaca quimsa sinchi macanacujcunata pushajmi carca. Paimi shuj cutinca 800 runacunata paipaj lanzahuan huañuchirca.
9 Joseb-Basebetpaj qꞌuipaca Dodó runapaj churi Eleazarmi carca. Dodó runaca Ahohipaj churimi carca. Davidca quimsa sinchi macanacujcunahuanmi filisteocunamanta burlarirca. Chai quimsa runacunamantaca shujca Eleazarmi carca. Filisteocunaca macanacungapajmi tandanacushcacuna carca. Israelmanta runacuna chaimanta rijpica
10 Eleazarca maipi cashcapimi saquirirca. Chashnami paica filisteocunataca paipaj rigra shaicungacama huañuchirca. Paipaj maquihuan espadata yallitaj charicushcamantami paipaj maquica mana cuyurirca. Chashnami Jehová Diosca chai punllaca paicunata quishpichirca. Soldadocunaca huañushcacunapaj valishca cosascunata quichungapajmi Eleazarpaj huashata catishpa rircacuna.
11 Eleazarpaj qꞌuipaca hararitacunapuramanta Aguepaj churi Samami carca. Filisteocuna Lehipi tandanacushca cajpimi soldadocunaca filisteocunamanta miticushpa rircacuna. Lehipica lentejacunata tarpushca shuj allpami tiyarca.
12 Shinapish Samaca tarpushca allpa chaupipi saquirishpami filisteocuna chagrata ama quichuchun macanacushpa filisteocunata huañuchishpa catirca. Chashnami Jehová Diosca jatunta mishashpa paipaj pueblota quishpichirca.
13 Treinta pushajcunamanta quimsami cosecha tiempopi Adulam jutcupi Davidta ricunaman uriyamurcacuna. Filisteocunapaj grupo soldadocunaca Refaím pugru pambapimi carpa huasicunapi saquiricurcacuna.
14 Davidca miticuna lugarpimi carca. Huaquin filisteocunapish Belenpimi carpa huasicunapi tandanacushca carcacuna.
15 Davidca imata munashcata huillashpami: “¡Belén pungu ladopi caj pugyumanta asha yacuta ubyashpaca allichari canman!” nirca.
16 Chaita uyashpami quimsa sinchi macanacujcunaca filisteocunapaj carpa huasicuna maipi saquiricujman a la fuerza yaicushpa, Belén pungu ladopi saquirij pugyumanta yacuta llujshichishpa Davidpaj aparcacuna. Shinapish paica chai yacutaca mana ubyasha nircachu. Ashtahuanpish Jehová Diospajmi tallirca.
17 Davidca: “¡Jehová Dioslla, chaitaca manataj rurashachu! Maitataj cai runacunapaj yahuartaca ubyashayari. ¿Manachu paicuna rishpaca paicunapaj causaita peligropi churashcacuna?” nircami. Shina nishpami Davidca mana ubyasha nirca. Davidpaj quimsa sinchi macanacujcunaca caicunatami rurarcacuna.
18 Zeruyapaj churi Joabpaj huauqui Abisaimi shujtaj quimsa runacunata pushaj carca. Paica 300 runacunatami paipaj lanzahuan huañuchirca. Chaimantami Abisaica caishuj quimsa runacuna shinallataj rijsishca carca.
19 Cai quimsa runacunamantaca Abisaimi yalli ashtahuan rijsishca carca. Shinallataj paica pushajmi carca. Shinapish Abisaica punta quimsa runacuna laya ashtahuan rijsishcaca mana carcachu.
20 Jehoiadapaj churi Benayaca mana manchaj runami carca. Paica Cabzeel llajtapica achca jatun cosascunatami rurarca. Moabmanta Arielpaj ishqui churicunatapishmi huañuchirca. Shinallataj Benayaca shuj rasu punllapimi jutcuman yaicushpa shuj leonta huañuchirca.
21 Shuj jatun egipcio runatapishmi huañuchirca. Benayaca shuj caspillatami charicurca. Cutin egipcio runaca paipaj maquipica shuj lanzatami charicurca. Chashna cajpipish egipcio runahuan macanacushpami paipaj lanzata quichushpa, chaillahuantaj huañuchirca.
22 Caicunatami Jehoiadapaj churi Benayaca rurarca. Paipish punta quimsa sinchi macanacujcuna shinallatajmi rijsishca carca.
23 Benayaca treinta soldadocunata ashtahuan yalli cashpapish quimsa sinchi macanacujcunahuanca mana igual carcachu. Chashna cajpipish Benayataca Davidca paita cuidaj guardiacunata mandaj cachunmi churarca.
24 Joabpaj huauqui Asahelca 30 runacunapuramanta shujmi carca. Caishujca Belenmanta Dodopaj churi Elhananmi carca.
25 Haroditacunapuramanta Samá, haroditacunapuramanta Elicá,
26 paltitacunapuramanta Hélez, tecoitacunapuramanta Iquespaj churi Irá,
27 Anatotmanta Abí-Ézer, husatitacunapuramanta Mebunái,
28 ahohitacunapuramanta Zalmón, netofatitacunapuramanta Maharái,
29 netofatitacunapuramanta Baanapaj churi Héleb, benjaminitacunapaj Guibeá llajtamanta Ribaipaj churi Ittái,
30 Piratonmanta Benaya, Gaas pugru pambacunamanta Hidái,
31 arbatitacunapuramanta Abí-Albón, bar-humitacunapuramanta Azmávet,
32 saalbonitacunapuramanta Eliahbá, Jasenpaj churicuna, Jonatán,
33 hararitacunapuramanta Samá, hararitacunapuramanta Sararpaj churi Ahiam,
34 maacatitacunapuramanta Ahasbaipaj churi Elifélet, guilonitacunapuramanta Ahitofelpaj churi Eliam,
35 carmelitacunapuramanta Hezró, arbitacunapuramanta Paarái,
36 Zobamanta Natanpaj churi Igal, gaditacunapuramanta Baní,
37 ammonitacunapuramanta Zélec, beerotitacunapuramanta Naharái, Zeruyapaj churi Joabpaj escudota apaj runa,
38 itritacunapuramanta Irá, itritacunapuramanta Gareb,
39 hititacunapuramanta Uriasmi carca. Tucuica 37 runacunami carca.
