2 Samuel 24:1-25
24 Pitajshi shamushpami Davidtaca: “Israelpi, Judapi shuj censota ruranaman ri” nishpa mandarca. Chaita rurashcamantami Jehová Diosca israelitacunahuanca cutinllataj yallitaj pꞌiñarirca.
2 Reyca paihuan chaipi caj soldadocunata mandaj Joabtaca: “Israelpaj tucui familiacunapajman rishpa Danmanta Beer-Sebacama mashna gentecuna tiyashcata ñuca yachangapaj tucui gentecunata registrapai” nircami.
3 Pero Joabca reymanca: “Cambaj Jehová Dios paipaj pueblota 100 cutinhuan mirachichun. Chaitaca ñuca amito reyllataj paipaj propio ñahuicunahuan ricuchun. Pero ñuca amito reylla, ¿caitaca imapajtaj rurasha ninguiyari?” nircami.
4 Ashtahuanpish reyca Joab nishcacunata, soldadocunata mandajcuna nishcacunatapish mana uyasha nircachu. Chaimi Joabpish, soldadocunata mandajcunapish Israel llajtapi causajcunata registrangapaj reypaj ñaupajmanta llujshishpa rircacuna.
5 Paicunaca Jordán jatun yacuta chꞌimbashpami Aroerpi carpa huasicunapi saquirircacuna. Aroerca pugru pamba chaupipi caj llajtapaj alli ladomanmi* saquirirca. Chai huashaca paicunaca gaditacunapaj allpaman rina ladotami rircacuna. Qꞌuipaca Jazermanmi rircacuna.
6 Chai qꞌuipaca Galaadman, Tahtim-Hodsí allpamanmi rircacuna. Chaimantaca Dan-Jaancamami rircacuna. Chai huashaca Sidonman ringapajmi vueltata curcacuna.
7 Cutin chaimantaca jatun pircacunayuj Tiro llajtamanmi chayarcacuna. Shinallataj heveocunapaj, cananeocunapaj tucui llajtacunamanpishmi chayarcacuna. Ultimopica Beer-Sebamanmi chayarcacuna. Chaica Judapi saquirij Neguebpimi carca.
8 Chashnami tucui llajtata purishpa Jerusalenmanca iscun* quillapi 20 punllacunapi chayarcacuna.
9 Joabca tucui mashna registrashcacunatami reyman huillarca. Israelpica macanacungapaj espadata charij 800.000 macanacujcunami tiyarca. Cutin Judapaj familiamantaca 500.000 runacunami tiyarca.
10 David gentecunata yupashca qꞌuipaca paipaj shungumi* paitaca mana alli sintichirca. Paica Jehová Diosmanca: “Caita rurashpami yallitaj juchata rurashcani. Cunanca Jehová Dioslla, canta sirvijpaj pandarishcata perdonahuai, caita rurashpaca ñucaca muspa runa shinami cashcani” nircami.
11 Tutamanta lado David jatarijpica muscuipi shina ricushcata Davidpaj huillaj profeta Gad runaca Jehová Diosmantami cai huillaita chasquirca:
12 “Davidpajman rishpaca: ‘Jehová Diosca: “Quimsa castigocunatami can agllachun cuni. Caimanta can imata rurachun munashcata agllai” ninmi’ nigri” nishcatami chasquirca.
13 Gad runaca Davidpaj ñaupajman shamushpami: “¿Caimantaca maijantataj munangui? ¿Cambaj llajtapi canchis huatacuna yaricai tiyachunchu munangui? ¿Mana cashpaca cambaj contracuna catirashpa llaquichijpi quimsa quillacunata miticushpa purinatachu munangui? ¿Mana cashpaca quimsa punllacunata cambaj llajtapi millai ungüi tiyachunchu munangui? Cunanca alli yuyari. ¿Ñucata cachajmanca imatataj cutichichun ningui?” nirca.
14 Chaimi Davidca Gad runamanca: “Ñucaca yallitaj llaquillami cani. Jehová Dios ñucanchijta castigachunmi munani. Paica yallitaj llaquijmi can. Shinapish pi runa ñucata castigachunca mana munanichu” nirca.
15 Chashna nijpimi Jehová Diosca Israel llajtamanca shuj millai ungüita cacharca. Chai ungüica tutamanta ladomantaca Dios agllashca tiempocamami carca. Chai millai ungüimantaca 70.000 gentecunami Danmanta Beer-Sebacama huañurcacuna.
16 Shuj angelca Jerusalenta tucuchingapajmi chai ladoman paipaj maquita chutarca. Chashna chutajpica Jehová Diosca cai gentecunamantaca yallitaj llaquirishpami cai gentecunata tucuchicuj angeltaca: “¡Ama imata ruraichu! Cambaj maquita uriyachi” nirca. Jehová Diospaj angelca jebuseocunapuramanta Arauna runapaj trillana pamba cꞌuchupimi carca.
17 Davidca chai gentecunata ángel llaquichicujta ricushpami Jehová Diosmanca: “Ñucamari juchata rurashcani, ñucami pandarishcani. Shinapish cai ovejitacunaca ¿imatataj rurashcacunayari? Cambaj maquihuanca ñucata, ñuca yayapaj familiapi cajcunallata castigapai” nirca.
18 Chai punllallatajmi Gad runaca Davidta ricunaman rirca. Paica: “Jebuseocunapuramanta Araunapaj trillana pambaman huichiyashpa Jehová Diospaj shuj altarta ruragri” nircami.
19 Davidca Gad runa nishca shina, Jehová Dios mandashca shinami chai lugarman huichiyarca.
20 Arauna runa urilla ricushpaca reypish, paipaj sirvijcunapish shamucujtami ricurca. Chaita ricushpami chai rato llujshishpa reypaj ñaupajpi pambacama cumurirca.
21 Arauna runaca: “Ñuca amito reylla, ¿imamantataj canta sirvijta ricunaman shamurcangui?” nishpami tapurca. Chashna tapujpimi Davidca: “Jehová Diospaj shuj altarta shayachingapajmi cambaj trillana pambata randinaman shamurcani. Chashnami Diosca gentecunata castiganata saquinga” nirca.
22 Pero Araunaca Davidmanca cashnami nirca: “Ñuca amito rey, tucui caita japilla, Diosman can munashcata cuilla.* Rupachishca ofrendata cungapajca cai huagracunatami charingui. Trillana tablacunatapish, huagrapaj yugocunatapishmi yantapaj cachun cuni.
23 Ñuca amito reylla, ñucaca tucui caitami canman cuni” nircami. Shinallataj Araunaca: “Jehová Dios canta bendiciachun” nircami.
24 Shinaca rey Davidca Arauna runamanca: “Mana, ñucaca cai allpamantaca paganami cani. Ñuca Jehová Diosmanca rupachishca sacrificiocunataca imata mana pagashpa mana cushachu” nishpami cutichirca. Chashnami Davidca trillana pambatapish, huagracunatapish 50 siclo* cullquihuan randirca.
25 Chaimi Davidca Jehová Diospaj shuj altarta shayachishpa chaipi rupachishca sacrificiocunata, Dioshuan alli tucungapaj sacrificiocunatapish curca. Chaita rurajpimi Jehová Diosca llajtamanta David mañashcata uyashpa israelitacunata millai ungüihuan llaquichinata saquirca.
Notacuna
^ O “ura ladomanmi”.
^ O “nueve”.
^ O “concienciami”.
^ Hebreo rimaipica: “cambaj ñahuicunapi ima alli cashcata cuilla” ninmi.
^ Shuj sicloca 11.4 gramocunatami charirca. Ayuda B14-ta ricui.
